Read Runyoro - rutooro Is 28 Bible Online

Is 28 - Runyoro - rutooro bible

Is 28

¹Ziribabona abajwara ekondo abeekuliiriza ab'abatamiizi b'Efuraimu, n'ekyakyo ekirukuhotoka ekyoburungibwe obwekitinisa, ekyakyo ekinyakuli ha mutwe gw'ekihanga eky'orwezo eky'abo abaayehaire amarwa!

²MUKAMA, aina omuntu omu, ow'obusobozi kandi ow'amaani; arukusisana enjura enyingi ey'ekiyaga, ogu nuwe aliteera hansi atarukuganyira.

³Abajwara ekondo abeekuliiriza ab'abatamiizi b'Efuraimu balirubaatirirwa;

⁴kandi ekyakyo ekirukuhotoka ekigireetera oburungi ekinyakuli ha mutwe ogw'ekihanga eky'orwezo, kirisisana nk'ekijuma ky'omutini eky'okubanza ekyengere akasumi k'ekyanda katakahikire: omuntu obu akibona, ahonaaho akikwata akirya.

⁵Ha kiro eki MUKAMA ow'amahe aliba kondo ey'ekitiinisa, aliba nkufiira ey'oburungi bw'abantu be.

⁶Aliha omwoyo ogw'obwinganiza omuntu ogu omucwi w'emisango aliha amaani abantu abo abagarra enyuma obulemu bakabutangira ha irembo.

⁷Haroho na banu abatukumizibwa amarwa, abataratazibwa ekyokunywa eky'amaani, nuwe nyakatagara n'omurangi, amarwa gababuza amagezi, eky'okunywa eky'amaani kibaleetera kutaratara, tibeetegereza ebi boolekwa, tibacwa kurungi misango.

⁸Habwokuba emeeza zoona ziijwire entanaki, busaho kiikaro na kimu ekitali kirofu.

⁹Abantu nibantontorromera bati: “Amagezi aligeegesa oha kandi ebigambo alibisoborra oha? Abo abacuukwirwe? Abo abanyakwihirwe hamabeere?

¹⁰Habwokuba naalengaho kutwegesa ekiragiro akyongereho ekindi orukarra arwongereho orundi nambere hali akatoito, ayongereho akatoito akandi.”

¹¹Obu mutampurre, Ruhanga alyekoonyeza abanyamahanga abarukubaza engambo etamanyirwe, nubo bagambire abantu be

¹²aba yagambiire ati: “Kinu nikyo ekihuumuro; muhuumuzeege enjwahi; kandi bunu nubwo obusinge”; baitu bakanga kuhurra

¹³nikyo MUKAMA arukwija kubeegeseza enyuguta emu emu, orukarra rumu rumu, ekigambo kimu kimu.

¹⁴Habweki inywe abantu ab'emigayo, abanyakulema abantu banu aba Yerusaalemu, muhurre Ruhanga eky'arukugamba.

¹⁵Habwokuba mukagamba muti: “Tukakora endagaano na Rufu twaikirraniza na nyabuyonga; obu haliija omuhito oguhinguraine, itwe tigulituhikaho; habwokuba turaayebingaga abanyabisuba turairukiraga omu bacwangya; nibyo biritutungisa obusinge.”

¹⁶Nikyo MUKAMA Ruhanga arukugambira ati: “Nimbyara ibaale ery'omusingi omu Siyoni, ibaale ery'omuhendo ery'obugumizo, ery'omusingi ogutarukutengeeta; erinyakuhandiikirweho ebigambo binu; ‘Okwikiriza okugumire kuba n'okugumiisiriza.’

¹⁷Obwinganiza nubwo buliba rukoba orw'okulengesa omusingi, kandi obwesigwa nubwo buliba rulengo rw'ebisiika.”

¹⁸Omu kasumi ako, endagaano yanyu mwaragaine na Warufu aho nuho erigarukira, enyikirraniza yanyu nanyabuyonga aho nuho erihwera. Omuhito oguhinguraine obu guliija, na inywe gulibahikaho.

¹⁹Obu guliba nigukyarabaho guti, na inywe gulibahikaho, habwokuba guraijaga buli kiro, nyamusana n'ekiro; kandi kiraabaga kintu ky'okutiinisa kukenga ebigambo ebi gulireeta.

²⁰Habwokuba ekitabu kigufu muno, omuntu tasobora kukihikaho, kandi ekyokwesweka kitoito muno, omuntu tarukukyesweka kikamuhika.

²¹Habwokuba MUKAMA aliimuka nkooku yaimukire ha rusozi Perazimu, alibiihirwa nkooku yabiihiirwe omu kihanga ekya Gibbyoni; akole omulimo gwe, omulimo gwe oguhuniriza! Akole omulimo gwe ogwahukaine ha mirimo endi!

²²Habweki nu, muleke kugaya eki ndukubahabura! Obu muraakigaya, timulitabuka. Mpuliire MUKAMA Omusobozi wa byona nkooku acwiremu kuhwerekereza ensi yoona.

²³Mutege amatu muhurre eki ndukugamba, muteho omutima, muhurre eki ndukubaza.

²⁴Omuntu anyakulima nukwo asige, aikaliza kulima? Aikara naasorra kandi naateneka?

²⁵Obu amara kwinganainganiza kurungi itaka, tabyara entendiigwa, tasiga omugusa, tatemera engano omu nkarra, na sairi omukiikaro kyayo kyonyini, n'ebicooli nibyo akazitirrayo nk'orugo?

²⁶Amanyire kukora kurungi omulimo gwe habwokuba Ruhanga nuwe yamwegeseze.

²⁷Oburo tibabuhuuza ekyoma eky'obwogi, kandi omugusa tibagurubasa engata y'ekigaali, entendiigwa iterwa n'omwigo, kandi omugusa guteerwa n'akaigo.

²⁸Haroho omuntu abberengura engano enyakucumbwamu omugaati? Nangwa, engano tagisiisa naagiteera obutamara, obu aba naagirabyaho ekigaali kye ekirukucundwa embaraasi, tagibberengura.

²⁹Eki nikyo, kiruga hali MUKAMA ow'amahe, anyakwina kuhabura kw'okuhuniriza, anyakukora ebintu ebikuru mali.