Read Runyoro - rutooro Is 29 Bible Online

Is 29 - Runyoro - rutooro bible

Is 29

¹Iwe, Iwe Alyeri orubuga Daudi oruyatiiremu orukande! Omwaka gwongereho ogundi; leka amagenyi gaikale nigahika.

²Baitu nabwo ndibonesa orubuga Alyeri, rulibamu okurra n'okuteera empamo, orubuga rwona rulisisana nk'itambiro eriseesirweho esagama.

³Ndikuteeraho orukande nkwehinguliririze, ndikugota n'eminaara, nkutuumeho eby'okwekoonyeza kukurwanisa

⁴nubwo olibaza nooyema okuzimu omwitaka, ebigambo byawe birihulirwa nibiruga hansi omu cuucu; iraka lyawe liriruga omu cuucu.

⁵Yerusaalemu, abanyamahanga boona abanyakukuseesira balihuuhuurwa nk'ecuucu, amahe gaabo aganyakutiinisa galicuucuuka nk'omusunga.

⁶Olibungirwa MUKAMA ow'amahe, aije n'enkuba, omusisa n'etoko nyingi, aije n'akairiringwa, ihunga, n'endimi ez'omurro kacwekereza.

⁷Amahanga goona aganyakurwanisa Alyeri, aganyakururwanisa n'ekigo kyarwo bakarubonabonesa balihwerra nk'ekirooto nk'ekintu ekinyakwesisaniriziibwe omu bwire bw'ekiro,

⁸nk'omuntu arukurumwa enjara oku aroota naalya, akasisiimuka enjara-ye neekyamuruma, rundi nk'omuntu anyakwina iroho okw'aroota nanywa akaimuka ataina maani, n'iroho lye akyainalyo, amahanga goona aganyakurwanisa Siyoni nukwo galiba gati.

⁹Mweteere obudoma, mulibakwo badoma, mweigale amaiso, muliba bahimbaara! Mutamiire, baitu mutatamiira amarwa; mutaratale baitu mutataratazibwa ekyokunywa eky'amaani.

¹⁰Habwokuba MUKAMA akabaha omwoyo ogw'oturo kandi abaisire amaiso, inywe abarangi akabaswekerra emitwe inywe abarozi.

¹¹Byona ebimwolekerwe, nibibasisanira nk'ebigambo eby'ekitabu ekinyakutairweho emanyiikirizo. Abantu obu bakiha omuntu arukusobora kusoma bakamugambira bati: “Soma ekitabu kinu.” Agamba ati: “Tinsobora, habwokuba kiroho emanyiikirizo.”

¹²Kandi obu bakiha omuntu atasobora kusoma bakamugamba bati: “Soma ekitabu kinu,” agamba ati: “Tinsobora kusoma.”

¹³MUKAMA akagamba ati “Abantu banu bairra haihi nibagamba ebigambo kwonka, bantamu ekitiinisa n'akalimi, kunu emitima yabo tendoho, Okuntiina kwabo nikyo ekiragiro ekyatairweho abantu eki baakwasire omu mutwe;

¹⁴habweki, abantu banu, ninyija kubakorra ebintu ebihuniiriza, kandi ebihunaaza; amagezi ag'abantu baabo ab'amagezi galihwaho, okwetegereza kw'abantu baabo abeetegereza, kuliserekwa.”

¹⁵Balikibona abantu abo abeesereka hara amagezi gaabo, ngu MUKAMA aleke kugamanya. Abanyakukora ebikorwa byabo omu mwirima, abanyakugamba bati: “N'oha arukuturora? N'oha arukutumanya?”

¹⁶Ebintu kanimubiculika. Omubumbi alyetwa ibumba; ekintu ekibumbirwemu nukwo kigambe omubumbi wakyo kiti: otambumbe, nandiki kigambe ogu ayakibumbire kiti: “Torukwetegereza?”

¹⁷Tihasigaire akasumi kake Lebbanoni ehinduke musiri ogurukwana ebijuma kandi omusiri ogurukwana ebijuma gufooke kibira?

¹⁸Ha kiro eki, abafu b'amatu nubwo balihurra ebigambo by'ekitabu kandi abafu b'amaiso baliruga omu kizima n'omu mwirima gwabo barole.

¹⁹Abaculeezi, MUKAMA alibaha omuhimbo omuhyaka, abarukukirra kimu obunaku omu bantu boona, balyenyumiriza omw'Arukwera mali owa Isirairi.

²⁰Habwokuba, abataina mbabazi balihwaho, kandi eb'emigayo balicwekerra, boona abaikara beetekaniize kukora ebibi balihwerekerra,

²¹abo abateekereza ngu omuntu ogu mubi habw'ekigambo bugambo, abanyakutega omutego omuntu anyakujunaana ab'omu irembo, kandi anyakugarra ha rubaju omuntu arukukora ekihikire, ataina bulyo obwarukusigikiraho.

²²Habweki, MUKAMA ayacungwire Abburahamu, binu nibyo arukugamba ebirukukwata hanju ya Yakobbo: “Yakobbo taligaruka kuswazibwa kandi taligaruka kuhinduka ha maiso.

²³Habwokuba obw'araaroraga abaana be abanahangire bali omuli bo baraakugizaaga Arukwera muno, Ogu owa Yakobbo. Nukwo batiine Ruhanga owa Isirairi.

²⁴Abantu abadoma nubwo balibanza kwetegereza kandi abo abaikara nibatontoroma nubwo balyegesibwa.”