Read Runyoro - rutooro Is 3 Bible Online

Is 3 - Runyoro - rutooro bible

Is 3

¹Hati, MUKAMA, ow'obusobozi bwona naija kwihaho Yerusaalemu na Yuda buli kintu kyona, na buli muntu weena abantu ou babaire nibeesiga, naija kubaihaho ebyokulya byabo n'amaizi gaabo,

²abantu baabo emanzi n'abaserikale baabo, abacwi baabo b'emisango n'abarangi baabo, abaraguzi baabo, abeebembezi baabo,

³engabwa ey'amakumi ataano, omuntu wabo ow'ekitiinisa, omuhanuzi n'omufumu, na buli muntu anyakwekoonyeza amasano okumanya ebiribaho.

⁴Ndifora aboojo nubo babe bakuru baabo, mbateereho abaana abato nubo babaleme.

⁵Abantu balibonesangana, omuntu alibonesa mugenzi we, omutaahi abonese omutaahi; abantu abato baligaya abakuru, abatali b'ekitiinisa baligaya ab'ekitiinisa.

⁶Omuntu obwalikwata owanyina ow'omunju ya ise akamugamba ati: “Iwe, oina ekyokujwara osemeriire kuba mwebembezi waitu, ebikamburo binu byona, bibe byawe.”

⁷Ha kiro eki, oli kikomwa aligarukamu ati: “Tinyina ekinsobora kukugasira tinyina byokulya kandi tinyina byokujwara; nangwa, otanfoora mwebembezi wanyu!”

⁸Yerusaalemu, hati bikambuuro, Yuda nayo egwire ira; ebigambo n'ebikorwa byabo nibijuma MUKAMA, nibijuma ekitiinisa kye; okusoroora kwabo omu bantu, nukwo kurukubasingisa omusango;

⁹ebibi byabo nibakyoleka burole nka Sodomu, tibarukukisereka. Kiribahikaho! Ziribabona! Habwokuba, akabi bakakeereetera bonka.

¹⁰Mugambire abahikiriire muti: “Mulihiirwa, habwokuba obu, nubwo baliheebwa eki baakoliire.”

¹¹Ababi ziribabona! Eki baakozire abantu abandi, nabo nikyo balikolerwa.

¹²Abantu bange-abaana nubo barukubaliisa beegemere kandi abakazi nubo barukubalema. Ai, abantu bange, abeebembezi banyu nubo baabahabisize, nukwo kulemwa kumanya nambere muraatoma.

¹³MUKAMA ayemeriire kubaza ebigambo bye, amaliriire kucwera abantu be omusango,

¹⁴kucwera omusango abakuru n'abalemi b'abantu be naagamba ati: “Ninywe mwanyagire engonjo z'emizabbibbu, kandi amaju ganyu, gaijwire ebintu ebi mwaihireho abanaku.

¹⁵Timurukwikirizibwa kusaaliza abantu bange n'okugobeza abanaku,” nyowe MUKAMA omulemi omukuru ow'obusobozi bwona, ninyowe ngambire eki.

¹⁶MUKAMA akagamba ati: “Abaisiki ba Siyoni nibeehurra, nibarubata batungwire ebikya, nibaroza amaiso ag'orwanju, nibagenda nibakaga ha maguru bataireho enjogera;

¹⁷Baleke ndibafubira emitwe ngimalemu isoke.”

¹⁸Ha kiro eki, MUKAMA nubwo aliihaho abakazi aba Siyoni, buli kintu kyona eki bagonza muno: ebintu eby'okwekunisa ebi bajwara ha maguru, ha mutwe, omubikya,

¹⁹ha mikono, ebirezi, obutimba, amajugo, emikuufu,

²⁰ebitambaara, ebiremba, amarangani, emyeko, obusanduko bw'ebiboya nengisa;

²¹empeta ezi bajwara ha ngaro na ha nyindo

²²ebyokujwara byabo byona, n'emyenagiro, n'ensahu z'okuhagatira,

²³ebyokujwara byabo ebirukurorrana ebitambaara eby'engaro ebya kitaani, ebiremba n'ebitambaara ebiraihire ebya ha mutwe.

²⁴Abaayeteeraga ebirukuboya, lero balinuunka; abaajwaraga enkoba nyaburungi, balyeteega ebiguhaguha; abaabaga n'isoke erirungi balicweka oruhara; abajwaraga engoye enungi, baraajwaraga obucence; oburungi obwabeehulizaaga, bulibarugiramu ensoni.

²⁵Abasaija ab'omurubuga, noobwakubaire abo abarukukirra kimu amaani, baligwa omubulemu.

²⁶Amalembo g'orubuga galirra gateere empamo, orubuga rwonyini, rulisisana omukazi anyakwikaliire hansi ali busa.