Read Runyoro - rutooro Is 30 Bible Online

Is 30 - Runyoro - rutooro bible

Is 30

¹MUKAMA naagamba ati: “Ziribabona abaana abeemi, abahikiriza entegeka yabo, etali yange. Bahondera entegeka ezi ntarakozire, bagumya endagaano ezi ntarukwenda, bagenda nibagereekaniza ekibi ha kindi.

²Abaacwiremu kugenda Misiri batabandize okunyekaguzaaho abeebinga Faraaho, abanyakugonza kwirukira Misiri!

³Baitu omukama Faraaho talisobora kubakoonyera, kandi okwakubaire kujunwa Misiri, halirugamu akabi.

⁴Habwokuba, abaheereza be noobu baraaba bali Zowani, kandi engabwa ze noobu ziraaba zihikire Hanesi,

⁵abantu boona balikwatwa ensoni habw'abantu abatasobora kubagasira, abatasobora kukoonyera rundi kuleeta amagoba baitu abarukuleeta ensoni n'ekihemu.”

⁶Engabwa niiraba omunsi enyakurumu akabi, nambere hali entale, enjoka ez'obusegu, n'enjoka kaharruka, Endogoyi n'engamiya zaabo, nibaitweka ebintu eby'omuhendo babitwarre ihanga eritasobora kubakoonyera.

⁷Habwokuba obukoonyezi bwa Misiri, tibwina mugaso, kandi n'okubaho tiburoho, nikyo ngirukiire “Rrahabbu anyakwikara aikaliire.”

⁸Hati, kinu genda okihandiike ha kyasi k'ibaale, abantu nibarora, kandi okihandiike n'omu kitabu, nukwo kiikaleho kimanywe ab'omubiro eby'omumaiso, bube bwakaiso obw'ebiro byona.

⁹Habwokuba, abantu abo beemi, baana entahurra, baana abatalihurra biragiro bya MUKAMA;

¹⁰abarukugambira abarozi bati: “Mutarora”; kandi abarukugambira abarangi bati: “Mutaturangira ebihikire; mutubalize ebintu ebirukworoba muturangire abisuba.

¹¹Muruge omu muhanda, muruge omu kahanda mugaruke ha rubaju; tuleke kwongera kuhurraho Ogu Arukwera owa Isirairi.”

¹²Arukwera owa Isirairi ogu nikyo arukugambira ati: “Habwokuba nimugaya ekigambo kinu nimuta omutima hakubonabonesa abantu n'okulemera omu bubi;

¹³habweki, obubi obu hali inywe, bulisisana nk'orwatika orunyakuli omu kisiika ekiraihire ekigogomere, ekiraaliire kugwa, ekinyakugwa omu kaanya kake kitalengeriirwe;

¹⁴kucweka kw'ekisiika eki, kusisana nk'ekinaga ky'omubumbi, ekinyakusebenjukira kimu, omu nguhyo zaakyo, hakaburamu oruguhyo orusobora kuguhirwaho omurro, rundi orw'okutahisa amaizi.”

¹⁵Habwokuba MUKAMA Ruhanga, Ogu Arukwera owa Isirairi naagamba ati: “Garuka onyesige n'omutima oguteekaine, obu nubwo oliba w'amaani kandi ogwagwane.” Baitu ebi, okabyanga;

¹⁶wateekaniza ngu oratemba embaraasi ezirukwiruka muno nukwo otabuke abanyanzigwa bawe. Ego, okabaza ekihikire, hatinu iruka! Nooteekereza oti: embaraasi zaawe nizanguha muno, baitu abo abarukukubinga, nibaija kwanguha kukiraho!

¹⁷Omuntu omu, alitiinisa abantu rukumi bairuke, abantu bataano, balibakanga mwiruke, okuhika obu mulikasigara nk'omuti ogusimbirwe omu katwetwe k'orusozi; nk'akarorwaho akatairwe ha kasozi.

¹⁸Habweki MUKAMA, ayeteekaniize kubagirra embabazi; alisemererwa muno kubaganyira. Habwokuba MUKAMA nuwe Ruhanga ow'obwinganiza; B'omugisa abantu boona abanyakumwesiga.

¹⁹Mazimakwo, inywe abantu abanyakuli Siyoni abanyakwikara Yerusaalemu; timuligaruka kurra. MUKAMA aba w'embabazi obu mulimuterra enduuru nimumusaba abakoonyere, alibaha eki murukusaba.

²⁰MUKAMA alikubonabonesa, baitu uwe wonyini alikuba haihi akwegese, tolyongera kwetaaga kumuserra.

²¹Obu olitoma ha mukono gw'obulyo rundi ogw'emoso, olimuhurra ali enyuma naakugamba ati: Omuhanda ngugwo, nugwo otome.

²²Obu, nubwo mulimanya ebisisani byanyu eby'efeeza n'eby'ezaabbu nkooku birukuzirwa, mulibinaga nkooku banaga oburofu, mubicoomere muti: “Tutaligaruka kubabona!”

²³Alinaga enjura ey'okumeza embibo ei musiga omw'itaka, alibaha engano, mulyeza ebyokulya bingi omu biro ebi, ente zanyu ziririira omu maliisizo aganyakugalihire;

²⁴kandi ente enimi n'enkaina ezinyakulima zirirya ebyokulya ebirungirwe ekisura ebisegesirwe ha rugali.

²⁵Eminaara obu erigwa ha kiro eky'okwita muno abantu, ha nsozi zoona eziraihire na ha busozi bwona oburaihire, halibayo obusaaru bw'amaizi agarukugera.

²⁶Ekindi ekyererezi ky'okwezi kirisisana n'eky'izooba, kandi ekyererezi ky'izooba kirisisana emirundi musanju nk'ekyererezi eky'ebiro musanju, ha kiro MUKAMA eki alisemberaho obuhuta obw'abantu be, alibumbirraho engoga ez'emiigo yabatiire.

²⁷Obusobozi bwa MUKAMA n'ekitiinisa kye, birolerwa hara, omurro n'omwika nibyo byoleka ekiniga kye obu abaza, orulimi rwe rwaka nk'omurro ogurukwokya.

²⁸Orwoya rwe nirusisana nk'okusandaara kw'amaizi agarukuhika omu bikya; asengiije amahanga n'akakeekeeyo ak'okuhwerekerra, ate hansaya z'abantu orukoba orw'okubatwara hara.

²⁹Baitu inywe abantu ba Ruhanga, mulisemererwa muno muzine nkookumuzina hakiro eky'ebembera ekiro ekikuru. Mulisemererwa muno nk'abantu abagenda nibahurra abantu abarukuteera endere, bakwasire omuhanda ogurukutwara omunju ya MUKAMA, omwandara gwa Isirairi.

³⁰MUKAMA alihuliza abantu boona iraka lye ery'ekitiinisa, abakengese amaani ag'ekiniga kye. Halizooka endimi ez'omurro, haligwa enjato, orubaale, hafukumuke enjura.

³¹Abasiriya obu balihurra MUKAMA akwasire omwigo naateera, balitiina muno.

³²MUKAMA obu araaba akwasire omwigo naateera, kunu engaija n'enanga niigamba. Ruhanga wenka nuwe alibarwanisa.

³³Habwokuba ekyoto kikategekwa kara; ego, kikategekerwa omukama, baakihingikaho enku nyingi muno, kyacumikwa omurro. Orwoya rwa MUKAMA orurukusisana ekisaaru eky'obuganga, nurwo rurukuhemba omurro.