Read Runyoro - rutooro Is 31 Bible Online

Is 31 - Runyoro - rutooro bible

Is 31

¹Balikibona abo abanyakugenda Misiri kuserrayo ow'okubakoonyera, abanyakwesiga ebigaali, ngu habwokuba bingi, kandi abanyakwesiga abatembi b'embaraasi ngu habwokuba b'amaani muno, baitu bakalema kwesiga Ogu Arukwera owa Isirairi rundi kumwekaguzaaho.

²Kandi kunu nuwe w'amagezi kandi aleeta akabi tahindura ebigambo bye baitu aimuka aseesira amaju g'enkozi z'ebibi, aseesira n'abo abeekoba n'abakora obubi.

³Abanyamisiri tibali Ruhanga, bantu kwonka; embaraasi zaabo ziina emibiri, tizina myoyo. MUKAMA obw'ayanjurra omukomo gwe, omukoonyezi atabaijuka, kandi ogu arukukoonyerwa, abo boona bahwerekererra hamu.

⁴Habwokuba MUKAMA akangambira ati: “Abaliisa noobu baamuza kandi noobu batoka bata, tibasobora kukanga entale ekaruga ha kisoro ek'isire. Na nyowe MUKAMA ow'obusobozi bwona busaho kintu na kimu ekisobora kuntanga kujuna orusozi Siyoni.

⁵Nk'enyonyi oku ikara neeseereera eruguru y'ekiju kyayo kulinda ebyana byayo, na nyowe MUKAMA ow'obusobozi bwona, nukwo ndirinda nti Yerusaalemu, kandi nukwo ndigirwanirra.”

⁶Inywe abantu ba Isirairi, mugaruke hali ogu ou mwayemiire.

⁷Ha kiro eki, buli muntu alihungura ebisisani bye eby'efeeza n'eby'ezaabbu ebi mwayekoliire n'emikono yanyu mwayereetera ekibi.

⁸“Kandi Abasiriya baliitwa ekitara, baitu ekitali ky'omuntu; ekitara eki ekitali ky'omuntu, nikyo kiribahwerekereza; bbo baliiruka bairuke ekitara eki, baitu abasaija babu abato, baliteebwa ha mirimo ey'amaani.

⁹MUKAMA wabo alitiina airuke, bakuru baabo balitiina muno bairuke basige ebendera zaabo ez'obulemu.” MUKAMA anyakuramizibwa Yerusaalemu, kandi anyakwina omurro ogunyakwokezaayo ebyonzira.