Read Runyoro - rutooro Is 32 Bible Online

Is 32 - Runyoro - rutooro bible

Is 32

¹Dora, halibaho omukama alirema naahondera obulyo, kandi ababiito abanyoro balirema nibakuraatira obwinganiza.

²Buli omu alisisana nk'ekiikaro eky'okweserekamu, alisisana nk'akabira ak'okweserekamu arugire omu ihunga, alisisana nk'ebyambu by'amaizi omu kiikaro ekyomere, alisisana nk'ekiituuru eky'omwandara omukooto omunsi etaina rwezo.

³Obu, abo abarukurora tibaliigara amaiso kandi abo abarukuhurra balihurra.

⁴Abantu abanyakukwata bugubugu balyega kucwa ekihikire, ebiteta balibaza bwango kandi nibatereekereza.

⁵Omudoma taligaruka kwetwa muntu w'ekitiinisa, kandi encwangya teriheebwa kitiinisa.

⁶Habwokuba omudoma abaza eby'obudoma, kandi aikara naacika kukora ebibi; kukora ebintu ebitarumu kwikiriza Ruhanga, kubaza eby'ebisuba hali MUKAMA, abarukurumwa enjara, abaleke n'enjara yabo, ab'iroho abaime amaizi.

⁷Ebikorwa by'omuntu encwangya, biba bibi; ateekereza kukora ebibi okuhwerekereza abanaku n'abahangirra, omuseege noobu aba naabaza ebihikire.

⁸Baitu omuntu omurungi, abaza ebintu ebirungi, kandi ebintu ebirungi nibyo agumiraho.

⁹Bakazi inywe abeetwara bakeegarra, muhurre eki ndukugamba; baisiki inywe abarukwemanyaho, mutege amatu muhurre ebi ndukubaza.

¹⁰Baitu omu biro ebirukuhondera omwaka gumu, mulituntuzibwa inywe abakazi abeeremi; baitu amagesa galibura ebijuma tibiritaho.

¹¹Mutukumire, inywe abakazi abalekiirwe, mwekange inywe abeeremi; mujuule engoye zanyu zoona, musigale busa, mweteege eguniya.

¹²Mweteere ebifuba habw'obusaalizi, habwokuba emisiri ey'orwezo n'ebijuma eby'emizabbibbu bihwerekeriire,

¹³kandi itaka ly'abantu bange limezirweho amahwa n'akakwatango; mulirirre amaju goona agakaba garumu abantu bali omukusemererwa okutagambwa, mulirirre orubuga orukaba rurumu okwegonza.

¹⁴Habwokuba ekikaali nikiija kufurukwamu, orubuga orunyakwikarwamu abantu abaingi, nirwija kusigara kwonka; akasozi n'omunaara ogunyakulindirwamu, biriba maingira ag'ebiro byona, biriba kiikaro entulege eki ziraayenjerramuga, biriba iriisizo nambere amagana garaaliiraga.

¹⁵Baitu MUKAMA aligaruka atutwekere Mwoyo we. Irungu lirifooka ly'orwezo, emisiri eyerwemu ebyokulya bingi, kandi omusiri ogu ogwezirwemu ebyokulya ebingi, baligweta kibira.

¹⁶Obwinganiza, nubwo buliitaaha bwikale omw'irungu, n'okuhikira omu musiri ogurukwana.

¹⁷Okuhikirra kulirugwamu obusinge, kuteekana n'obwesige ebiro byona.

¹⁸Abantu bange baliikara omunsi ey'obusinge omu biikaro ebirumu okugwagwana, ebitarumu toko kandi ebirukuhuumuza.

¹⁹Ekibira kyona kirigwa kihweho, n'orubuga rulihwerekerra.

²⁰Muli bahiirwa inywe abanyakusiga haihi n'amaizi gonka, abanyakuleka ente n'endogoyi ikalya bugana.