Read Runyoro - rutooro Is 33 Bible Online

Is 33 - Runyoro - rutooro bible

Is 33

¹Olikibona iwe omuhwerekereza atakahwerekeriire, iwe engobya atakagobezibwahoga muntu n'omu! Obw'olireka kuhwerekereza, olihwerekerezibwa; kandi obu olicwa obugobya, nubwo oligobezibwa.

²Ai MUKAMA, otukwatirwe embabazi, niiwe twesiga otulindege buli kiro, kandi otujunege akabi.

³Obu enkuba ebbaruka abantu barurumuka, iwe obu oimuka, amahanga gararanga;

⁴hasorozibwa omunyago nka kadoima oku esorooza, abantu bagugwera nk'enzige oku zigwa ha kisaka.

⁵MUKAMA akugizibwe, habwokuba aikara haiguru, Siyoni aligiijuza obwinganiza obuhikiriire;

⁶nuwe aligumya abantu ab'obusumi bwawe. Alirinda abantu be, abahe amagezi n'obwetegereza; okutiina MUKAMA, niryo liriba itungo lyayo.

⁷Abantu nibataabaana nibaserra ow'okubakoonyera, Engabwa abaalengereho kuleeta obusinge, nibateera omukungo.

⁸Enguudo ihuukire, tokyabonamu mugenzi, endagaano nizicwibwa, abakaiso nibanugwa, omuntu takyaheebwa kitiinisa

⁹Ensi neeteera empamo kandi ehoirwemu amaani; Lebbanoni esobiirwe kandi neeyoma; Sarooni neesisana irungu; Bbasani na Karameeri niziragalikya ebikoora byazo.

¹⁰MUKAMA naagamba ati: “Hati ka nkole. Ka nyoleke nkooku ndi w'obusobozi.

¹¹Mulitwara enda ey'omusunga, muzaale embuba, orwoya rwanyu rube murro ogulibahwerekereza.

¹²Abantu balisisana nk'abanyakwokiibwe baafooka inoni, balisisana nk'amahwa aganyakutemerwe agali omu murro.”

¹³Inywe abanyakuli hara muhurre eki nkozire; kandi inywe abanyakuli haihi muhaisanize obusobozi bwange.

¹⁴Abasiisi abanyakuli Siyoni obutiini bw'okubaita, abataikiriza Ruhanga bakwasirwe akatuukumo nibagamba bati: “Noha omuli itwe asobora kwemera omurro ogw'ebiro n'ebiro?”

¹⁵Ogu anyakukora ebirungi kandi anyakubaza eby'amazima, atagonza kwiha amagoba omu kubonabonesa abandi. Anyakutiina kulya enguzi, atagonza kuhurra abarukubaza ha kuseesa esagama nokwita abantu kandi atagonza kurora ebintu ebibi.

¹⁶Ogu nuwe aliikara omwiguru; ekiikaro kye eky'okwerindiramu, kiriba kigo eky'amaani eky'ombekerwe n'amabaale; araaheebwaga ebyokulya, n'amaizi gatabuzireho.

¹⁷Olirora omukama omu kitiinisa kye; olirora ensi enyakugalihire muno.

¹⁸Oliteekereza muno ha bintu ebinyakutiinisa: oligamba oti: “Ayabazire ali nkaha? Ali nkaha ogu ayalengere emisoro? Ali nkaha ogu ayabazire eminaara?”

¹⁹Toligaruka kurora abantu abeekuliiriza, abantu abarukubaza engambo etamanyirwe, engambo ei otasobora kukenga, eki otasobora kwetegereza.

²⁰Orole Siyoni, orubuga orutukorramu amagenyi gaitu agaatairweho! Noija kurora orubuga Yerusaalemu, ekiikaro ekiculiire, eheema etasobora kwihururwa, enyakwina enkondo ezitaliihwa ebiro byona. Kandi enyakwina emiguha, etalicwekaho na gumu.

²¹Oku nuho MUKAMA alitweyolekera omu kitiinisa, ekiikaro eky'ebyambu ebigalihire n'obwambu; nambere hatasobora kugenda eryato eribagoya n'engahi, kandi nambere hatasobora kuraba meeri enkooto.

²²Habwokuba, MUKAMA nuwe atucwera emisango, MUKAMA nuwe mulemi waitu, MUKAMA nuwe omukama waitu; alitujuna.

²³Emiguha yaawe erukuboha esumurrukire; tesobora kugumiza omurongooti omu kiikaro kyagwo, rundi kwikaza ebberu eyanjurwirwe. Nubwo eminyago nyingi eribaganwa; n'abalema balibaganaho.

²⁴Busaho mutaka aligamba ati, “Ndi murwaire;” abaikazi boomu baliganyirwa okutahikirra kwabo.