Read Runyoro - rutooro Is 34 Bible Online

Is 34 - Runyoro - rutooro bible

Is 34

¹Inywe amahanga, mwirre haihi, na inywe abantu mutege amatu! Ensi na byona ebinyakugirumu, bitege amatu.

²Habwokuba MUKAMA akwatiirwe amahanga goona ekiniga, abiihiriirwe muno amahe gaago goona, amazire ira kugacwera omusango, abahoiremu baitwe

³Emitumbi yabo niija kuhungurwa aheeru, ejundireyo enuunke cuu; esagama yabo niija kugera neeruga ha nsozi.

⁴Ebintu byona eby'omwiguru birijunda bihweho, iguru lyekube nk'omuzingo gw'ekitabu. Ebintu byalyo byona ebinyakuliikaramu birigwa, nk'ebikoora by'omuzabbibbu oku bigwa, nk'ebikoora eby'omutini okubigwa.

⁵Habwokuba ekitara kyange kinywire esagama omwiguru kyahaaguka; hati nikigenda kutema Edomu abantu abo abanacweriire ira omusango.

⁶MUKAMA aina ekitara; kikanywa esagama kyahaaguka, kiswekerwe ebisajwa, kiroho esagama ey'ebyana by'entaama n'ey'embuzi, kiswekerwe ebisajwa eby'ensigo n'eby'empaya z'entaama. Habwokuba MUKAMA atambire ekyonzira omu Bbozira kandi aisire abantu baingi omunsi Edomu.

⁷Embogo zirafeera hamu nabo, kandi biraitirwa hamu n'enimi enkuru. Ensi yabo niija kunywa esagama, itaka lyabo, ebisajwa biraalyongera orwezo.

⁸Habwokuba aina ekiro ekyalihorraho enzigu, ekyalisasulizaaho ebyakozirwe Siyoni.

⁹Amaizi ag'obwambu bw'Edomu galifooka rweju, itaka lyayo lihinduke buganga bw'ekibiriiti; ensi yayo erifooka rweju kaaka murro.

¹⁰Nyamusana n'ekiro, omurro ogu tiguliraara; omwika guraikaraga nigucuuka ebiro byona. Eriikara eri kitongo okuruga ha mulembe gumu okuhika ha mulembe ogundi; tihaligaruka kubaho omuntu aligirabamu ebiro byona.

¹¹Maleere n'enyamunungu nibyo birigyetungira, ensindizi n'ebingoora nibyo birigiikaramu. MUKAMA aligaruka agifoole byenga ebitasobora kwerwaho kantu, nkooku ekaba eri ebintu bitakahangirwe.

¹²Oku tihalibayo mukama n'omu, kandi ababiito bayo balifa busa.

¹³Amahwa galimera omu bigo byayo, omumya n'amatojo omumbuga zaayo; eraikaraga neegurukirwamu eboha, eraikarwamuga maaya.

¹⁴Enyamaiswa ez'omu irungu hamu n'empisi numwo biraatangatanganaga, ekyegasagasa nuho kiraayeteraga kigenzi kyakyo; ego, oku nuho haliruga waizikya kagendakiro, ayeserurre ekiikaro eky'okuhuumuramu.

¹⁵Oku, ensindizi nuho eryombeka ekiju kyayo, nuho eryaalika amahuli, nuho eryatirra, kandi nuho eribumbatirirra obwana bwayo; oku nuho empungu ziraayesorooleezaaga, buli emu na ntaahi yayo.

¹⁶Muserre kandi musome omu kitabu kya MUKAMA, murole eki kirukugamba kiti: “Ha bintu ebi, tihalibaho na kimu ekiribura; kandi tihalibaho na kimu ekitaligira kitaahi kyakyo.” Habwokuba MUKAMA nuwe aragiire n'akanwa ke, kandi Mwoyo we nuwe yabisoroize.

¹⁷Nuwe yatiire akaruuru kooleke omugabo ogwa buli omu, yabiteraho ensaro n'emitaano ebiro n'ebiro, kandi birigiikaramu ebiro byona.