Read Runyoro - rutooro Is 35 Bible Online

Is 35 - Runyoro - rutooro bible

Is 35

¹Irungu n'ensi enyakwomere birisemererwa, ibuga lirikyanganuka lyakye ebyakyo;

²liryakya ebyakyo bingi muno, kandi lirikyanganuka lizine. Liriheebwa ekitiinisa ekya Lebbanooni n'oburungi bwa Karameeri na Sarooni. Abantu balirora ekitiinisa kya MUKAMA, balirora oburungi bwa Ruhanga waitu.

³Mugumye emikono erukuteba mugumye amaju agarukutukumibwa obuceke.

⁴Mugambire abatiini abo muti: “Mugume muleke kutiina, Ruhanga naija kubajuna naija kubafubirra abanyanzigwa banyu.”

⁵Hanyuma abahimbaara baliiguka amaiso baakiigara balihurra.

⁶Abalema baliguruka nk'ensa, baakibbubbu balizina habw'omuhimbo. Habwokuba amaizi galihagura gataahe omwirungu, kandi ebyambu bitaahe omu ibuga;

⁷Omusenyi ogurukwaka nk'omurro gulifooka kiijongo kandi ensi enyakwomere eriijura ensoro z'amaizi. Nambere haasiibaga eboha, halifooka ngezi; obunyansi bulifooka mabiingo n'engoro.

⁸Halibayo oruguudo, oruguudo oru ibara lyarwo, ruraayetwaga Omuhanda Ogurukwera; Omusiisi taliikirizibwa kuraba omu ruguudo oru;

⁹omu ruguudo oru, tihaligendayo ntale. Kandi tihalibaho kisoro ekyatuubire ekirirubatamu; baitu abaacungwirwe nubo balirurubatamu.

¹⁰Kandi abacungurwa ba MUKAMA abayacungwire baligaruka, baije Siyoni nibazina; baliikara n'omuhimbo ebiro byona; obujune n'okusinda biribarugaho.