Read Runyoro - rutooro Is 36 Bible Online

Is 36 - Runyoro - rutooro bible

Is 36

¹Omu mwaka ogwa ikumi n'ena ogw'obulemi bw'omukama Hezekiya, Senakeribbu omukama w'Asiriya akaseesira embuga zoona ezikaba zizitiriirwe, yazihamba.

²Omukama w'Asiriya akeema Lakisi, yatuma Rrabbusaake aina ihe likooto hali omukama Hezekiya ow'akaba ali Yerusaalemu. Rrabbusaake akeemerra hamukura ogw'ekiijongo eky'eruguru ha ruguudo orukaba nirutwara ha musiri ogw'omwogi w'engoye.

³Nubwo Eriyakimu mutabani wa Hirukiya, ayaroleerraga ekikaali Sebbuna omuhandiiki omukuru na Yowa mutabani w'Asafu omukwasi w'amakuru baamuhikireho.

⁴Rrabbusaake yabagambira ati: “Mugambire Hezekiya ngu, omukama w'Asiriya naakukaguza ati: Ekirukukwesiguza kiki?

⁵Nooteekereza ngu: ebigambo bugambo nugo magezi, kandi nubwo busobozi obw'obulemu? N'oha oworukwesiga ayakuleeteriize kunyemera?

⁶Nooyesiga Misiri, orubingo orucwekere orurukwija kucumita omukono gw'omuntu weena ow'alirwigamira. Eki Faraaho omukama wa Misiri, nikyo alikora weena arukumwesiga.”

⁷Baitu kakuba ongambira oti: “Nitwesiga MUKAMA Ruhanga waitu,” habweki, ogu tali nuwe mukama w'ebiikaro n'amatambiro Hezekiya agayaihireho, naakaguza abantu ba Yuda n'aba Yerusaalemu ati: “Ha itambiro linu nuho muliramiza?”

⁸Hati nu oije oteereho mukama wange omukama w'Asiriya omusimbo ndaakuha embaraasi enkumi ibiri, obu oraasobora kuzoora abatembi ab'okuzitemba.

⁹Obu oraaba nooyesiga Misiri kukuha ebigaali n'abatembi b'embaraasi, osobora ota kubinga engabwa emu, omuli abo abarukukira obuto, ha baheereza ba MUKAMA wange?

¹⁰Kandi ekindi, noogira nkaija kuseesera ensi yawe enu, nookugihwerekereza ntaikiriziibwe MUKAMA?

¹¹Eri Yakimu, Sebbuna na Yowa nubwo baagambiire Rrabbusaake bati: “Tukwesengeriize, itwe abairu bawe, otubalize engambo ey'Abaaramu, habwokuba nitugikenga; leka kutubaliza engambo ey'Abayudaaya erukuhulirwa abantu abanyakuli haihi n'ekisiika.”

¹²Nooteekereza, iwe n'omukama, niinywe inywenka mukama wange abayantumireho mbagambire ebigambo binu? Nangwa, kandi nimbigambira n'abantu abo abanyakwikaliire haihi n'ekisiika abarukwija kulya iswa lyabo bakanywa n'enkali yabo, nka inywe.

¹³Nubwo Rrabbusaake yaimukire yabaza orulimi rw'Abayudaaya n'iraka erirukuhulirwa ati: “Muhurre ebigambo by'omukama ow'ekitiinisa nuwe omukama ow'Asiriya!

¹⁴Binu nibyo bigambo by'omukama.” Mutaikiriza Hezekiya kubabiiha, habwokuba tarukwija kusobora kubajuna;

¹⁵mutaikiriza Hezekiya kubeesigisa MUKAMA mukagamba muti: “MUKAMA naija kutujunakwo; omukama w'Asiriya tarukwija kuhamba orubuga runu.”

¹⁶Muleke kuhuliiriza Hezekiya ebyarukugamba; habwokuba omukama w'Asiriya naagamba ati: Mugarukanganemu na nyowe munyehongere; buli omu omuliinywe, nubwo araalya ha muzabbibbu gwe nyabwe, ha mutini gwe nyabwe, kandi buli omu anywe amaizi ag'iziba

¹⁷lye nyabwe; okuhika obu ndikaija nkabatwaara omunsi erukusisana eyanyu, ensi enyakurumu ebyokulya n'ebyokunywa ensi enyakurumu ebyokulya n'emisiri ey'emizabbibbu.

¹⁸Mwerinde Hezekiya ataikara kubahabisa naagamba ati: “MUKAMA naija kutujuna.” Harabaireho Ruhanga ow'abamahanga arajunire ensi ye, akagiihaho omukama ow'Asiriya?

¹⁹Baaruhanga aba Hamasi n'Abarapadi bali nkaha? Aba Sefaravaimu bali nkaha? Bakajuna Samaliya bakaginyaka?

²⁰Omu mbandwa zoona ez'ensi zinu, niziha ezajunire ensi zaazo zikazinyihaho nukwo muti: na MUKAMA araajuna Yerusaalemu akagiinyihaho?

²¹Abantu boona bakaculeera, omukama Hezekiya nkooku akaba abagambiire; batagambe kigambo na kimu.

²²Hanyuma, Eryakimu mutabani wa Hirukiya ow'akaba naarolerra ekikaali, Sebbuna omuhandiiki omukuru na Yowa mutabani w'Asafu, omukwasi w'amakuru baahikireho Hezekiya batemwire engoye zaabo, baamugambira Rrabbusaake ebi yagambire.