Read Runyoro - rutooro Is 37 Bible Online

Is 37 - Runyoro - rutooro bible

Is 37

¹Omukama Hezekiya obu yahuliire ebigambo ebi, yatemura ebyokujwara bye, yajwara eguniya yagenda omunju ya MUKAMA,

²Yatuma Eryakimu ayarolerraga ekikaali, Sebbuna omuhandiiki omukuru, na baanyakatagara abakuru, abajwaire eguniya hali omurangi Isaaya, mutabani w'Amozi.

³Baamugambira bati: “Binu nibyo Hezekiya arukugamba: ‘Ekiro kinu, kiro ky'obujune, ky'okuhanwa kandi ky'okuhemurwa; abaana bahikire kuzaarwa baitu okuha ebisa kulemere.

⁴Rundi MUKAMA Ruhanga wawe ahuliire Rrabbusaake ebi yagambire ayatumirwe mukama we omukama w'Asiriya kusekeereza Ruhanga omwomeezi, kandi naija kugaya MUKAMA Ruhanga wawe ebi yahuliire; habweki osabire abantu abanyakusigaireho.’ ”

⁵Abaheereza b'omukama Hezekiya obu baahikireho Isaaya,

⁶Isaaya yabagambira ati: “Mugende mugambire mukama wanyu muti: MUKAMA naagamba ati: ‘Ebigambo eby'ohuliire abaheereza b'omukama w'Asiriya ebi banjumire, bitakutiinisa.

⁷Ninyija kumutamu omwoyo, obu arahurra orugambo, agaruke omunsi ye yonyini; kandi omunsiye egi, nuho ndiragira bamwise ekitara.’ ”

⁸Rrabbusaake akagaruka, yasanga omukama w'Asiriya naarwanisa Libuna; habwokuba akaba ahuliire ngu omukama Akaba arugire Lakisi.

⁹Abaasiriya bakahurra ngu: “Ihe ery'Abamisiri, erikaba lyebembiirwe omukama Tiruhaaka owa Esopiya, likaba niriija kubaseesira,” omukama obu yahuliire ekigambo eki yatweka ebbaruha hali omukama Hezekiya

¹⁰owa Yuda amugambire ati: “Binu nibyo ogambire Hezekiya omukama wa Yuda oti: ‘Otaikiriza Ruhanga wawe ou oyesiga kukubiiha naagamba ati: Yerusaalemu terinyagwa omukama w'Asiriya,

¹¹akahurra abakama b'Asiriya ebi baakozire amahanga goona nkooku baagahwerekereriize kimu. Iwe, niiwe oraatabuka?

¹²Amahanga baisenkurunyowe aga baahwerekeriize: Gozani, Harani, Rrezefu, n'abantu ab'Edeni abakaba bali Terasaara, embandwa zaabo zikatangwaki kubajuna?

¹³Omukama owa Hamasi, ow'Arapadi, ow'orubuga rwa Sefaravaimu, owa Hena n'owa Iva, bali nkaha?’ ”

¹⁴Abakwenda baaha Hezekiya ebbaruha yagisoma; yagitwara omunju ya MUKAMA, yagyanjurra omumaiso ga MUKAMA.

¹⁵Yayesengereza MUKAMA naagamba ati:

¹⁶“Ai MUKAMA ow'amahe Ruhanga owa Isirairi iwe anyakusingire eruguru ya Kerubbi, iwe wenka niiwe Ruhanga ow'abakama boona ab'ensi; niiwe ayahangire iguru n'ensi.

¹⁷Ai MUKAMA, otege okutu ohurre; MUKAMA nkwesengeriize, ogunule amaiso orole; ohurre ebigambo Senakeribbu ebyagambire naajuma Ruhanga omwomeezi.

¹⁸Mazimakwo, ai MUKAMA, abakama ab'Asiriya bakahwerekereza amahanga goona n'ensi ez'omu mahanga ago,

¹⁹bakookya embandwa zaabo ezikaba zitali Ruhanga, baitu ebi bikaba biri bisisani kwonka eby'emiti n'amabaale, ebyakozirwe abantu.

²⁰Habweki hati MUKAMA Ruhanga waitu, otutabule Abasiriya, amahanga goona ag'ensi, nukwo gamanye iwe wenka nkooku oba MUKAMA.”

²¹Hanyuma Isaaya mutabani w'Amozi akatumaho Hezekiya naagamba ati: Ebi onsabire hali Senakeribbu omukama w'Asiriya,

²²kinu nikyo ekigambo MUKAMA eki amubalizeeho: ‘Omwisiki empikirre muhara wa Siyoni naakugaya, naakunuga, muhara wa Yerusaalemu naakuhungiza omutwe otarukumurora.

²³Okagaya oha kandi okajuma oha? Okajuma oha, kandi ogamba oha kubi? Ogu Arukwera owa Isirairi!

²⁴Okatuma abaheereza bawe kunyenyumirizaaho nibagamba bati: ngu okasingura ensi ezikirra kimu okuraiha eza Lebbanoni, okenyumiza ngu okatema emikogoto erukukirra kimu kuraiha, n'emisambya erukukirra kimu oburungi, kandi ngu okahika omubicweka eby'ebibira ebya hara muno.

²⁵Nkalima amaziba nanywa amaizi, ebyambu byona ebya Misiri nkabirubaatirra nabyomya.

²⁶‘Tokahurraga eki nkooku nakitegekere kara? Nkooku nategekere ira ebindukuhikiriza hati nkooku nategekere nti embuga ez'amaani ezigumire nkooku olizifoora ntuumo z'ebikamburo.

²⁷Abantu baamu obu baliba bacwekerwe enkizi kandi basobiirwe, batakyaina maani, bafookere nk'ebimera eby'omusiri, kandi nk'obunyansi obuto nk'obunyansi obunyakumezire hamaju eruguru, obunyakuhotoka butakakuzire.

²⁸‘Kyona ekikuroho ninkimanya, ekyokora, n'ekiikaro ekyogendamu mmanyire nkooku ongirra ekiniga.

²⁹Mpuliire nkooku wambiihiriirwe kandi mpuliire nkooku orukwehemba, lero hati, ninyija kukudubura enyindo n'irobo lyange, nkute ekyoma kyange omu kanwa, nkugarreyo, ninkurabya omu muhanda guli gwonyini ogw'akuleesire.’

³⁰Kinu nikyo oraamanyiraho: mwaka gunu, olye ebinyakwemereze byonka, n'omu gwakabiri olye ebiryemeza nibiruga omuli ebi; hanyuma omu mwaka ogwakasatu, musige kandi mugese, mulime emisiri ey'emiti ey'emizabbibbu, niyo mulyehoga ebijuma.

³¹Abantu ab'enju ya Yuda abaliba basigaireho, balyongera kunaga emihama bazaale bakanye;

³²habwokuba omu Yerusaalemu abantu abaliba basigaireho, ha harusozi Siyoni, halirugayo ekitebe ky'abantu abaliba basigaireho, habwokuba MUKAMA Ow'obusobozi bwona, nuwe yacwiremu kukora eki.

³³Habweki, binu nibyo MUKAMA arukugambaho omukama w'Asiriya ati: “Orubuga runu talirutaaha, talirurasamu omusogi talirwirra haihi, akwasire engabu, talirugota naarwombekaho ekisiika eky'itaka.

³⁴Omuhanda ogwamuleesire, nugwo gulimugarrayo, kandi MUKAMA naagamba ngu: orubuga runu talirutaaha.

³⁵Habwokuba, ndirurwanirra ndujune, habwange na habw'omwiru wange Daudi.”

³⁶Malaika wa MUKAMA, akagenda yaita omu rusiisira rw'Abasiriya abantu emitwaro ikumi na munaana, n'enkumi itaano; abantu obu bairukire nyenkyakara, bakasanga abantu abo boona bafiire.

³⁷Nubwo Senakaribbu omukama w'Asiriya kurugayo yataaha, yaikara Nineeve.

³⁸Kiro kimu, obu akaba naaramya omunju ya Nisirooki embandwa ye, Aduramereki na Saraza batabani be baamwisa ekitara, baayekwatira omuhanda ogutwara omunsi Ararati. Omutabani Esarahadoni, yateera engoma.