Read Runyoro - rutooro Is 38 Bible Online

Is 38 - Runyoro - rutooro bible

Is 38

¹Omu biro ebi, omukama Hezekiya akakwatwa endwara kake konka afe. Isaaya omurangi mutabani w'Amozi akamuhikaho yamugambira ati: “MUKAMA naakugambira ati: Oteekanize ebintu byawe byona; habwokuba, oli haihi kufa toli w'okukira.”

²Nubwo Hezekiya yaroleriire ekisiika yayesengereza MUKAMA naagamba ati:

³“Ai bambi MUKAMA nkwesengeriize, oijuke nkooku nakuheeriize n'obwesigwa n'amananu, kandi nkooku nakoraga ekyogonza.” Obu yamazire kugamba ebi, yarra muno.

⁴Nubwo MUKAMA yaragiire Isaaya ati:

⁵“Garukayo ogambire Hezekiya oti: MUKAMA Ruhanga owa sso Daudi, binu nibyo arukugamba: Mpuliire ekyonsabire, kandi ndozire nkooku orukurra; habweki, habwomeezi bwawe, ninyija ku kwongeraho emyaka ikumi n'etaano.

⁶Ninyija kukujuna njune n'orubuga runu, mbaiheho omukama w'Asiriya; orubuga runu, ninyija kururwanirra.

⁷“Kanu, nuko akarorwaho MUKAMA akaakutwekiire akarukugumya nkooku arukwija kukora ekintu eki, ekyakunihiize:

⁸Ekiituuru eky'izooba erirukulenga ekyahamatembero g'Ahazi, ninyija kukigarra enyuma entambu ikumi.” Izooba nukwo kugaruka enyuma entambu ikumi ha matembero aga lyalengiireho.

⁹Hezekiya obu yamazire kurwara yakira, akahandiika ekizina kinu eky'okukugiza:

¹⁰Obu nkaba nkyali musigazi nkateekereza nti: akasumi kahikire ngende omunsi ey'abafu, nambere ndiikara obwomeezi bwange bwona.

¹¹Nateekerezaaga nti: MUKAMA tindimurorra omunsi ey'aboomeezi, tindigaruka kubona muntu ha bantu ab'omunsi.

¹²Enju yange bagimenyere nk'eheema ey'omuliisa baagiinyaka. Obwomeezi bwange obukubire nk'omuruki w'engoye, nukwo obusale ha ky'okurukiraho. Okuruga nyenkya emamba neesara okuhika ekiro, oikara nompwerekereza;

¹³nkiisa obwire nimborooga, ninserra ow'okunkoonyera; oti rundi entale niyo erukunena amagufa, nkateekereza nti: “MUKAMA namarraho kimu.

¹⁴Iraka lyange likaba liri ly'okuganya ly'obujune, nikyo kyangambisize nk'entaahi, rundi nk'entuuha, natabaana nk'eriiba; amaiso gange gajwahire habw'okwikara garoleriire haiguru. Ai MUKAMA, nimbonesibwa muno ompuumuze!

¹⁵Kandi ndaagamba ki? Kinu MUKAMA nuwe agambire kandi akikozire. Nyina obusaalizi bwingi, nibuntanga n'okugwijagira.

¹⁶Ai MUKAMA, ebintu ebi nibyo byomeeza abantu, kandi omuli ebi byona, nuho hali obwomeezi obw'omwoyo gwange. Nkwesengeriize, onkize onyomeeze!

¹⁷Haa, obusaalizi obwingi bunu obunatungire, bukandugiramu oburungi; baitu okantabura ekiina eky'okuhwerekerra, okeeberwa kimu ebibi byange byona.

¹⁸Habwokuba abantu aba nyabuyonga tibasobora kukusiima orufu tirusobora kukuhaisaniza; abantu abanyakusirimuka omu kiina tibanihira obwesige bwawe.

¹⁹Aboomeezi, aboomeezi bonka nubo bakusiima nkooku ndukukusiima kiro kya hati; ise baana nuwe amanyisa abaana be nkooku oli mwesigwa.

²⁰MUKAMA okantambira, turaateeraga enanga kuhaisanize, turaakuhaisizaaga omunju yawe obwomeezi bwaitu bwona.

²¹Omu biro ebi, Isaaya akaba agambire ati: baleete ekitoli ky'amagita ag'emitini bakimute ha kizimba, nukwo akire.”

²²Hezekiya, na uwe akaba agambire ati: “Karorwaho ki akandaamanyiraho nkooku ndigenda omunju ya MUKAMA?”