Read Runyoro - rutooro Is 40 Bible Online

Is 40 - Runyoro - rutooro bible

Is 40

¹Ruhanga wanyu naagamba ati: Muhuumule muhuumule inywe abantu bange.

²Mugumyagumye abantu ba Yerusaalemu, mubaamiirre ngu obulemu buhoire, kandi nkooku baganyiirwe ebibi byabo. Ngu batungire kuruga omu mukono gwa MUKAMA ekifubiro ekibasemeriire habw'ebibi byabo byona ebi baakozire.

³ Iraka lyogu arukwamirra ati: “Muteekanirize MUKAMA omuhanda, muterekereze omuhanda gwa MUKAMA omwirungu.

⁴Ebihanga byona biijuzibwe, orusozi rwona n'emigongo yoona binganizibwe, ekiramaire kigororwe, n'ekiikaro ky'obusobozi kifooke kyeya.

⁵Obu nubwo ekitiinisa kya MUKAMA kirizooka, byona ebyomeezi bikirorre hamu, habwokuba MUKAMA nuwe agambire eki.”

⁶Iraka nirigamba liti “Yamirra!” Ngamba nti, “Ndayamirra ki?” Omubiri gwona guli nk'obunyansi n'oburungi bwagwo nk'orwakyo rwomu kisaka.

⁷MUKAMA obu aikya orwoya, obunyansi buhotoka, ebimuli bicucuka; mazimakwo abantu bunyansi.

⁸Obunyansi buhotoka, ebyakyo bicucuka baitu ekigambo kya Ruhanga waitu kiriikaraho obusinge bwona.

⁹Temba orusozi oruraihire, Iwe Siyoni, omurangi w'amakuru amarungi; imukya iraka lyawe n'amaani, Iwe Yerusaalemu, omurangi w'amakuru amarungi, limukye, otatiina; gambira embuga za Yuda, oti: “Dora Ruhanga waanyu!”

¹⁰Dora, MUKAMA Ruhanga naija n'amaani, alirema n'omukono gwe; Dora empera ye eri nawe n'okusasura kwe kumwebimbire.

¹¹Naija kuliisa igana lye nk'omuliisa, obwana bw'entaama ze abuhimbe, abutwarre omu kifuba, kandi alitwara mpora ezi ezirukwonkya.

¹²N'oha ayasoboire kulengera amayanja hakiganja kye, ayalengeseze iguru orutambu, ayalengere ecuucu ey'ensi yoona, ayataire ensozi ha minzaani, ayainganaganiize obusozi?

¹³Haroho omuntu asobora kugambira MUKAMA ati: Kora eki? N'oha asobora kumwegesa rundi kumuhabura?

¹⁴Ruhanga ayekaguzaaho oha nukwo amanye kandi ayetegereze nooha asobora kumuhana ha by'obwinganiza rundi kumwegesa ebyobulyo?

¹⁵Dora amahanga gali nk'akatoonya munsoha y'amaizi, gabarwa nkakahoiga mu minzaani, ebizinga omungaroze biri nkecuucu.

¹⁶Lebbanoni teemumarre habwenku, nobwakuba ebisoro byayo tibyamale habw'ebihongwa.

¹⁷Amahanga goona omumaiso ge tikiri kintu, gali nka masa kandi butarumu.

¹⁸Nukwo nooha ou mulinganiza na Ruhanga? Rundi kisisani ki ekimulisisaniza nawe?

¹⁹Ha bisisani! Ekisisani kihesibwa omuntu omuheesi nuwe akisiiga ezaabbu, kandi nuwe akikorra emikuufu y'efeeza.

²⁰Omunaku tarukusobora okuhonga eki, ayekomeramu omuti ogutarukujunda; ayeserurra omukozi w'amagezi okukora ekisisani ekisarwirwe ekitalirubata.

²¹Timukamanyaga? Timukahurraga? Timukeetegerezaga ensi eba kuhangwa ha misingi gwayo?

²²Nuwe aikaliire ha nkulingo yensi, n'abantu baayo bali nkenzige; nuwe ogu anyakwanjuurra iguru nk'orutimbe. Nkayanjurra eheema y'okwikaramu;

²³Nuwe ogu anyakwihaho abalemi, abacwi b'emisango abensi abafoora butarumu.

²⁴Nibasisana nkebibyarwa ebito ebyakabyarwa juba kandi byameenywa. MUKAMA obu abaikiza orwoya bahotoka, omuyaga gwija gubahuhuura nk'ebisunga.

²⁵Ogu arukwera nakaguza ati: Orandengesaniza

²⁶n'oha ou ndasisana? Muraramire haiguru murole: n'oha yahangire ebi byona? Nuwe ogu anyakubyebembera nk'arukwebembera ihe, amanyire omuhendo gwabyo, buli kimu akiruka ibara! Habw'obusobozi bwe, busaho na kimu hali ebi ekirabuzireho!

²⁷Iwe Yakobbo kandi Isirairi, kiki ekirukukugambisa kiti: MUKAMA tarukumanya emihito yaawe, kandi noobu orukukorwa kubi tarukukifaaho?

²⁸Tokamanyaga? Tokahurraga? MUKAMA nuwe Ruhanga atahwaho, nuwe yahangire ensi yoona. Tagwa nsazi kandi tajwaha, amagezige tigetegerezibwa.

²⁹Abagwire ensazi abaimukya, abataina maani maingi agabongera.

³⁰Nobwakubaire abasigazi, balijwaha bagwe ensazi kandi abasaija abamaani balyandaakarra.

³¹Baitu abo abategereza MUKAMA baligarukwamu buhyaka amaani gaabo, balirengera n'amapapa nk'isamba, baliiruka tibalijwaha, baligenda, tibaliruha.