Read Runyoro - rutooro Is 41 Bible Online

Is 41 - Runyoro - rutooro bible

Is 41

¹Muculeere mumpulirize inywe amazinga, leka abantu bagaruke beteekanize: basorrokane hamu okutongana emisango bahebwe omugisa kugamba ebyabo byona.

²Nooha ogu ayaimukiriize owa Burugaizooba, nukwo asingule hoona haagenda? Amuha kusingura amahanga narubatirra abakama? Abahayo nk'ecuucu hali ekitara kye, nkebisunga ebitwarwa omuyaga ha buta bwe.

³Ababinga n'abahikya hara hataroho ekirukumutanga, nayanguha muno nk'atarukurubata hansi!

⁴Nooha yataireho eki kandi yakikora: ayayesire abantu ab'obusumi bwona okuruga kara na kara? Ninyowe ogu, MUKAMA ow'okubanza kandi owa ha mpero.

⁵Amazinga gakarora gaatiina, ensi yoona yatukumira bairra haihi baija.

⁶Buli omu alikoonyera mutaahi we kandi aligambira owanyina ati: “Guma omutima!”

⁷Ow'emirimo y'engaro, aligumya omuheesi w'efeeza, kandi ogu arukuterekereza n'enyondo, aliha amaani ogu arukuteera ha ruhiija, aligamba ati: “kihesirwe kurungi;” balikiboha n'emisumaali, nukwo kireke kutengeeta.

⁸Baitu iwe omwiru wange Isirairi, Yakobbo ounakomere, oruzaaro rwa Abburahamu enganjani yange;

⁹iwe ounaihire ha mitaano y'ensi, ounayesire ha nsonda zaayo ezahara muno, ninkugambira nti: “Oli mwiru wange, nkakukoma ntakunage;”

¹⁰otatiina, nyowe ndi na iwe, otahwa amasiko, ninyowe Ruhanga waawe; ndikugumya kandi nkukoonyere, n'omukono gwange ogwobulyo ogwobusinguzi ndikusagika.

¹¹Dora, abo boona abakwesitaize baliswazibwa baburanganizibwe; abo abarukukutuntuza, baliburaho baruge omunsi.

¹²Oliserra abo abahakana na iwe baitu tolibabona, abo abarukukurwanisa balihwerekerra bahweho.

¹³Habwokuba nyowe MUKAMA Ruhanga waawe, ninyowe nkukwasire ha mukono; ninyowe ndukukugambira nti: “Otatiina, ninyija kukukoonyera.”

¹⁴MUKAMA naagamba ati: Noobu oraba oli muke kandi oli muceke ota, otatiina iwe Isirairi, inywe abasaija ba Yakobbo ninyija kubakoonyera; arukwera wa Isirairi nuwe mucunguzi wanyu.

¹⁵Dora, ndikufoora nyondo ey'okuhuuza, empyaka enya kutoire, kandi enyakwina amaino; olihuura ensozi ozicwacwane, kandi obusozi olibucebaceba obufoole nk'ecuucu,

¹⁶olibihehemura bitwarwe omuyaga, ihunga liribirarangya, nubwo olikyanganuka, habwokuba ninyowe Ruhanga wawe; nubwo olihaisaniza nyowe, Ruhanga ahikiriire owa Isirairi.

¹⁷Abanaku n'abaseege obu baliserra amaizi gakababura, bakooma amaraka iroho likenda kubaita, nyowe MUKAMA ndibagarukamu, nyowe Ruhanga wa Isirairi tindibanagaija.

¹⁸Ndita emigera ha nsozi ezitaroho kantu nyigule ensoro omu bihanga hagati; irungu ndirifoora kiijongo ky'amaizi, kandi ensi enyakwomere ngitemu ebyambu by'amaizi.

¹⁹Omu irungu emiti emikogoto, omusisa, n'omusambya n'omuti ogurugwamu amagita, n'omuzaituni omu ihamba ndibyaramu emisambya, omubura ensuku hamu n'engote;

²⁰Abantu nukwo barole kandi bamanye, nukwo basobole kuteekereza n'okwetegerereza hamu, nkooku MUKAMA nuwe yakozire ebi, Arukwera Ogu owa Isirairi nuwe yabihangire.

²¹Mutongane omusango gwanyu: ogambire MUKAMA muleete obwakaiso, omukama wa Yakobbo n'agamba, mugambe ebirukwoleka amazima ganyu.

²²Mubaikirize babireete kandi batugambire ebirukwija kubaho. Batugambire ebintu ebya ira, batumanyise amakuru gaabyo nukwo tubyecumitirize tumanye ekirirugamu, rundi baturangire eby'omumaiso.

²³Mutugambire ebirukwija kubaho omu biro eby'omumaiso nukwo tumanye nkooku muli Ruhanga; mukole ebirungi rundi mukole ebibi, nukwo tucwekwe enkizi tutiine.

²⁴Kambagambire timuroho muli masa, kandi timwina eki mukora; omuntu anyakukweha aba akozire ihano.

²⁵Nkaimukiriza omuntu namwiha ha bukiizi bw'emoso kandi akaija, nkamwiha Burugaizooba aragambaga ha ibara lyange araarubaatirraga abalemi nk'arukusamba obudongo, nk'omubumbi w'ebinaga oku arubata ibumba.

²⁶N'oha omuli inywe ayarangire ngu: Kinu kiribaho, nukwo tugambe tuti; “okaranga ebyamazima”? Busaho n'omu hali inywe ayagambire ekigambo; tiharoho muntu n'omu ayabahuliire nimugamba ekigambo.

²⁷Ninyowe nabandize kukimanyisa Siyoni kandi ninyowe narangire Yerusaalemu amakuru amarungi.

²⁸Baitu obundukumagamaga, tindukurora owamagezi n'omu omuli banu, owarasobora kugarukamu obundakaguza ekigambo.

²⁹Kambagambire: embandwa tizirukugasa tizinyina ekizisobora kukora bisisani ebitanyina busobozi.