Read Runyoro - rutooro Is 42 Bible Online

Is 42 - Runyoro - rutooro bible

Is 42

¹ Dora, omwiru wange, oundukugumyaho; omukome wange, omutima gwange ou gusemerererwa: ntaire omwoyo gwange haliwe. Atwale obwinganiza omu mahanga.

²Talyamirra rundi kwimukya iraka lye likahulirwa omunguudo;

³orubingo orwegemere taliruhenda, n'etaara erukwaka nejundera taligiraaza; alyoleka eby'obulyo omu mazima.

⁴Taliremwa kandi taligarukirra okuhikya obu alikagumya obwinganiza omunsi; amazinga gakategereza ebiragiro bye.

⁵MUKAMA Ruhanga ayahangire iguru yalyanjurra, ayagalihize ensi na byona ebigirumu; anyakuha orwoya abantu abagiikaramu, kandi anyakuha omwoyo abanyakugigendamu,

⁶“Nyowe MUKAMA, nkwesire omu kuhikiirra, ndikuhayo okuba nk'ekiragaano hali abantu, okuba kyererezi hali amahanga,

⁷kwigura amaiso ga ba kihimbaara, kulekera abanyankomo omunju y'enkomo, abanyakwikara omu mwirima.

⁸Ninyowe MUKAMA, eri niryo ibara lyange; ekitiinisa kyange tindikiha ondi, kandi ebisisani ebyagiibwe tindibiikiriza kuhaisanizibwa.

⁹Dora, ebintu ebyarangirwe ira nkooku bihikiriire kandi hati nindanga ebintu ebihyaka, mubigambirwa bitakabaireho.”

¹⁰Muzinire MUKAMA ekizina ekihyaka, mumuhaisanize inywe abantu ab'omunsi yoona! Enyanja ehiire na byona ebinyakugirumu hamu n'abantu ab'omu bizinga ebya hara.

¹¹Irungu ly'omusenyi n'embuga zaalyo bihaisanize; ebyaro ebya Kedara, abantu ab'omu Sela bazine habw'omuhimbo, batokere ha butwetwe bw'ensozi.

¹²Ab'omubizinga bya hara, bahaisanize kandi bakugize MUKAMA

¹³MUKAMA alituruka nk'omusaija emanzi; abihiirwe nk'omuntu omunyabulemu; abyamira, ego, alitokera haiguru; alikora ebyamaani narwanisa abanyanzigwa be.

¹⁴MUKAMA nagamba ati: “Nkaculeera okumara omwanya mukooto, abantu bange ntabagarukemu; baitu kanu nuko kasumi ak'okukora; ninyija kwamuza nk'omukazi arukurumwa ebisa, naahiija kuhikya naabakira.

¹⁵Ndihwerekereza ensozi n'obusozi, nyomeze kimu obunyasi n'emiti. Ebihanga ebinyakurumu ebisaaru ndibifoora marungu, ebiijongo mbyomeze kimu.

¹⁶Abafu b'amaiso ndibebembera omu mulingo ogu batamanyire, ndibaiha omu mwirima mbate omu kyererezi, ebiikaro ebibi ndibiterekereza. Ebi nibyo ndikora, kandi tindukwija kubireka.

¹⁷Abantu abo boona abanyakwesiga ebisisani, abanyakubyeta baaruhanga baabo, balibundazibwa baswazibwe.”

¹⁸MUKAMA naagamba ati: Inywe abafu bamatu muhurre, nainywe abahimbara murole, nukwo mwetegereze!

¹⁹N'oha omufu w'amaiso nk'omwiru wange, n'oha omufu w'amatu nk'omukwenda wange ounatumire?

²⁰Arora ebintu bingi baitu tabyetegereza; aina amatu baitu tahuurra.

²¹MUKAMA akasemererwa habw'obuhikiriire bwe, okutamu amaani ebiragiro bye n'okubifoora eby'ekitiinisa.

²²Baitu banu nubo abaanyagirwe kandi nubo abasahwirwe, boona bakagwa omu biina baaserekwa omu nkomo; bali aho nibabonesibwa, bafookere b'okunyagwa, tibaina owokugira ati: “Mubagarre!”

²³N'oha omuli inywe owalitega okutu akahurra binu, ow'alitaho omutima akahurra omu biro eby'omumaiso?

²⁴N'oha ayalekere Yakobbo akanyagwa n'oha ayalekiire Isirairi abasuma? Ni MUKAMA, ou basiisiire, abantu ou baayangire kukora ebyagonza, kandi ou baayangire kukwata ebiragiro bye?

²⁵Nikyo yatwolekiire ekiniga kye eky'amaani, nikyo yatuleteriire akabi ak'obulemu, akabi ako kakamwokya weena baitu atakakenge; kakamusaaliza baitu atakaijuke.