Read Runyoro - rutooro Is 43 Bible Online

Is 43 - Runyoro - rutooro bible

Is 43

¹Baitu hati, MUKAMA ogu ayakuhangire iwe Yakobbo, ayakubumbire iwe Isirairi, naagamba ati: Otatiina, habwokuba nkakucungura; nkwesere ibara lyawe, oli wange

²obu oraabaga nooyambuka amaizi, ndabaga na iwe; noobu oraabaga nooyambuka ebyambu, tibirikumira; obwoliraba omu murro, tigulikwokya, endimi zaagwo tizirikuhwerekereza.

³Habwokuba, ninyowe MUKAMA Ruhanga wawe, ogu arukwera owa Isirairi, omujuni wawe nkahayo Misiri nukwo nkucungule, Esopiya na Sebba, nkazihayo ha bwawe.

⁴Ndihayo amahanga goona nukwo nkujune habwokuba oli w'omuhendo hali nyowe, kandi habwokuba nkugonza kandi nkuha ekitiihnisa.

⁵Otatiina, hawokuba ndi na iwe, ndiiha oruzaaro rwawe Burugaizooba, ndikusorooza Bugwaizooba;

⁶ndigambira Burugaizooba nti: lekera, n'aba ha bukiizi bw'obulyo nti: Otabalemera. Iha hara batabani bange nambere bali, na bahara bange ebaihe ha bukiizi obw'emoso,

⁷abo boona aba narukire ibara, aba nahangire habw'ekitiinisa kyange, aba nabumbire, aba nakozire.

⁸MUKAMA naagamba ati: Turukya abantu bange abanyakwina amaiso baitu tibarukurora, abanyakwina amatu baitu tibarukuhurra!

⁹Amahanga goona geesorooze, n'abantu basorrokane, baraha abasobora kuranga ebiriija? Nibaha abaarangire ebirukubaho hati? Baraha abo, baleete baakaiso baabo, baije bagumye nkooku bali ab'amazima kandi nkooku barukugamba eby'amazima.

¹⁰MUKAMA naagamba ati: Inywe abantu ba Isirairi, muli bakaiso bange, nkabeekomera mube baheereza bange, nukwo muummanye, munyikirize, kandi mwetegereze nkooku nyowe nyenka ninyowe ndi Ruhanga, okwihaho nyowe, tiharoho ruhanga ondi; takabahoga kandi talibaho.

¹¹Ninyowe MUKAMA, kwihaho nyowe, busaho Mujuni n'omu.

¹²Ninyowe nabalize, ninyowe najunire, ninyowe narangire okuruga buli na buli busaho muntu n'omu ou ntainaho busobozi, kandi busaho n'omu asobora kwihurra eki mmazire kukora.

¹³Ndi Ruhanga, kandi ndaikaraga ndi Ogu; busaho asobora kujuna akaiha omu mukono gwange; obu nkora nooha asobora kuntanga?

¹⁴MUKAMA naagamba ati: “Okukujuna, nditweka ihe lirwanise Bbabbulooni; amalembo g'orubuga ndigaseesa, obwogo obw'abantu baayo bulifooka mpamo.

¹⁵Ninyowe MUKAMA, Ogu Arukwera wawe, owa Isirairi, ayahangire Isirairi omukama wawe.”

¹⁶MUKAMA naagamba ati: N'oha aracwire omuhanda omu nyanja, n'oha aracwire akahanda omu maizi amaingi,

¹⁷n'oha aturukya ebigaali n'embaraasi. Iwe n'abarwani; bakabyama, bakalemwa agaimuka, baraire, bazimire nk'orutambi.

¹⁸MUKAMA naagamba ati: Mulekege kwijuka ebintu ebyaira, kandi mulekege kuteekereza ebyahingwire.

¹⁹Dora, ninkora ekintu ekihyaka, kizookere n'okuzooka, timurukukikenga? Ninyinja kutema omuhanda omwirungu, nte ebyambu omwihamba.

²⁰Enyamaiswa ez'omu kisaka zirinkugiza, eboha hamu na maaya; habwokuba ninta amaizi omu irungu ninta ebyambu omwihamba, nywise abantu bange aba nayekomiire,

²¹abantu abanayebumbiire, bampaisanizeege.

²²Baitu iwe Yakobbo, otanyamirre, iwe Isirairi, okantamwa!

²³Mutandeetere entaama zanyu ez'ebihongwa eby'okwokya, mutankugize nimuntambira ebyonzira, ntabaleetere obulemeezi obw'okubasaba ebihongwa eby'okwokya, kandi ntabajwahye nimbasaba obubbaani.

²⁴Mutandeetere ebikaka na sente, mutansemeze nimumpa ebisajwa eby'ebyonzira byanyu. Baitu mukandeetera obulemeezi nimukora ebibi, mukanjwahya n'obubi bwanyu.

²⁵Baitu noobu haraaba haroho ebi byona, ninyowe ogu, anyakuragaza ebibi byanyu habw'okwegondeza, kandi tindigaruka kwijuka ebibi byanyu.

²⁶Munyijukye, tuteezangane empaka, yoleka entongani yaawe, nukwo turole nkooku orukubaza eby'amazima.

²⁷Baisenkuru itwe ab'okubanza bakasiisa, abeebembezi bawe bakansobyaho.

²⁸Nikyo nadibiize ababiito ab'ekiikaro ekirukwera, nahwerekereza Yakobbo, najuma Isirairi