Read Runyoro - rutooro Is 44 Bible Online

Is 44 - Runyoro - rutooro bible

Is 44

¹MUKAMA naagamba ati: “Hati, iwe Yakobbo omwiru wange, Isirairi ou nayekomiire, tega okutu.

²MUKAMA ayakuhangire, ayakubumbire omunda ya nyoko kandi owalikukoonyera naagamba ati: Mwiru wange Yakobbo, ou nayekomiire, otatiina.

³Habwokuba, ensi ey'iroho, ndigiruhuura ensi enyakwomere, ndigitamu obwambu; baijukuru bawe ndibaha Mwoyo wange, kandi oruzaaro rwawe nduhe omugisa.

⁴Balyaruka nk'obunyansi omu maizi, nk'emikinga ha byambu by'amaizi.

⁵Omuntu omu aligamba ati: ‘Nyowe ndi muntu wa MUKAMA,’ ondi alyeruka ibara Yakobbo, kandi alyehandiika ha buso ati: ‘Nyowe owa MUKAMA;’ ayeruke ibara Isirairi.”

⁶MUKAMA omukama wa Isirairi kandi omucunguzi waawe, MUKAMA ow'amahe naagamba ati: Ninyowe ow'okubanza kandi ninyowe ow'okumalirra; tiharoho Ruhanga ondi, okwihaho nyowe nyenka

⁷n'oha arukunsisana? Akigambe bbwa akigambe kandi akyoleke omumaiso gange hanu. N'oha ayarangire okuruga ira ebintu ebikaba nibiija kubaho? Hati batugambire ebitakabaireho.

⁸Mutatiina kandi muteekanga! Eki ntakibagambire ira kandi ntakibamanyise? Ninywe baakaiso bange! Nimugira, haroho Ruhanga ondi okwihaho nyowe? “Tiharoho mwandara, tiimanyireyo ondi.”

⁹Abantu abo boona abanyakukora ebisisani bantu bataroho kandi baaruhanga abo aba batamu muno ekitiinisa bati, tibaina mugaso. Abanyakuramya baaruhanga abo, bafu b'amaiso kandi badoma, baliswara.

¹⁰Ogu ayabumbire embandwa rundi ayaheesire ekisisani ekitaina mugaso?

¹¹Weena anyakukiramya aliswazibwa. Abanyakukora ebisisani, bantu buuntu. Boona beesorooze beeyoleke, nibaija kutukumira kandi nibaija kuswara.

¹²Omuheesi akwata ekicweka ky'ekyoma, akita omu murro. Akwata enyondo, ateera ekyoma eki, nukwo harugemu ekisisani. Obu aba naakikora arumwa enjara, akwatwa iroho kandi ajwaha.

¹³Omubaizi aleega omuguha, alenga n'ekalaamu ekisisani nambere kiraagarukira; akiranda n'eranda akinganainganiza n'ekyooma ekinyakulenga; akikoramu ekisisani eky'omuntu, ekisisani ky'omuntu ekirungi eky'okuta omunju ye.

¹⁴Atema emikogoto, akoma omuzo n'omuhomozi, aguleka gunyeetera omu miti ey'ekibira; abyara omukogoto enjura egwitirra.

¹⁵Omuti ogu, omuntu agusenyaho enku nyingi;

¹⁶enku ezi nizo ahembesa omurro ogw'okwota, kandi nizo acumbisa ebyokulya bye. Baitu onu, agukoramu ruhanga ow'okuramya; akoramu ekisisani akiinamira, ekicweka kyagwo akihembamu omurro ha manda gaagwo agarukwaka, nuho ayokya enyama, agirya aiguta. Ayota n'okwota, nubwo agamba ati: Hati natagata, mpembere omurro weewe!

¹⁷Ekicweka ekisigaireho, akikoramu ruhanga, nikyo ekisisani; akiinamira, akiramya; akyesengereza naagamba ati: Njuna, habwokuba niiwe ruhanga wange!

¹⁸Abantu abo, tibaina ekibarukumanya, tibaina eki barukwetegereza. Tibarukuhweza kandi tibarukuteekereza habwokuba MUKAMA akabaita amaiso nikyo kirukubatanga kuhweza akabaima amagezi, nukwo kuteetegereza.

¹⁹Busaho arukuteekereza busaho arukumanya rundi arukwetegereza akagamba ati: Ekicweka ky'omuti gunu, nikyo nahemberemu omurro, ha manda gaagwo, nuho nacumbire ebyokulya, nuho nayokeze enyama nagirya; kandi hati, empinju enyakusigaireho ngiihemu ekintu eky'omuziro?

²⁰Omuntu anyakwoya iju agira omutima ogw'ebisuba kandi ahaba. Tasobora kwikiriza ekisisani eki akwasire omungaroze, nkooku atali ruhanga.

²¹Iwe Yakobbo kandi Isirairi, oijukege ebigambo binu, habwokuba oli muheereza wange; Iwe Isirairi, ninyowe nakubumbire, oli muheereza wange ou ntalyebwa.

²²Obubi bwawe nkabusingorra nk'arukusingorra ekicu, kandi nkabumaraho nk'arukumaraho ekiho; garuka nambere ndi habwokuba nkakucungura.

²³Zina iwe iguru habwokuba MUKAMA nuwe akozire kinu; mutoke inywe ebicweka ebya nyabuyonga, muzine inywe ensozi. Iwe kibira n'emiti yoona enyakurumu.

²⁴MUKAMA Omucunguzi ayakubumbire omunda ya nyoko; ninyowe MUKAMA ayahangire ebintu byona, ninyowe ayabambire iguru, ninyowe ayayanjurwire ensi n'oha ow'akaba ali na nyowe?

²⁵N'oha aburanganiza ababiihi b'ebisuba ebi baranga anyakuteera obudoma embandwa; nooha anyakugarra enyuma abanyamagezi, amagezi gaabo okagafoora budoma;

²⁶nyowe anyakugumya ekigambo ky'omuheereza wange nyowe anyakucwera amagezi abakwenda bange; nyowe anyakugambaho Yerusaalemu nti: eriikarwamu abantu: kandi hambuga za Yuda nti: ziryombekwa, ndiimukya ebikambuuro byazo;

²⁷nyowe anyakuragira enyanja nti: Yoma ebisaaru byawe ninyija kubyomya.

²⁸Noha arukugambaho Siraasi: Ogu nuwe omuliisa wange, kandi naija kuhikiriza byona ebi nategekere; arukugamba Yerusaalemu nti: rulyombekwa na hanju ya Ruhanga nti: omusingi gwawe gulirimwa.