Read Runyoro - rutooro Is 47 Bible Online

Is 47 - Runyoro - rutooro bible

Is 47

¹Iwe omwisiki empikirre owa Bbabbulooni, sirimuka oikarre omu cuucu; iwe muhara w'Abakalidaaya, ikarra hansi nambere hatali kitebe ky'obukama! Abantu tibaligaruka kukweta mwecumi kandi owekitiinisa hati oli muzaana.

²Kwata orubengo ose ensaano, iha ekitambaara ha mutwe, juura ekiteteyi kyawe, weesemburre amaguru, oyambuke ebisaaru.

³Abantu balikurora enjuuro, balirora nkooku okwasirwe ensoni, ndihoora enzigu, busaho muntu n'omu ou ndiganyira.

⁴Omucunguzi waitu ibara lye, nuwe MUKAMA ow'amahe, nuwe anyakwetwa Ogu Arukwera owa Isirairi.

⁵MUKAMA naagambira Bbabbulooni ati: Iwe muhara w'Abakalidaaya, genda omu mwirima oikale nambere hatali kateezo nambere haikara akahuno, habwokuba tolyongera kwetwa Mukama w'abakama.

⁶Abantu bange nkababiihirirwa, nkabakora nk'abataligaruka kuba bange nkabakulekera otabagirre embabazi; abakuru, okababonesa muno.

⁷Wateekerezaaga oti: oliikara oli mugo ebiro byona? Nukwo kwebwa kuteekereza ebintu binu rundi kwijuka nkooku biriba hanyuma.

⁸Iwe engonzi ey'okwesemereza, iwe anyakuteekereza nkooku oina obusinge kandi anyakugwagwaine, iwe arukweyeta mukuru nka Ruhanga, arukugira ngu: busaho n'omu arukukusisana Iwe ayagiraga ati: Tindimanya bufaakati, kandi tindifiisa mwana.

⁹Ebintu ebi byombi birikuhikaho omukiro kimu, kandi omukacu kake kati, noobu oraaba oina abafumu baingi bata, noobu olibandwa ota, olifiisa abaana kandi oliferwa baro.

¹⁰Okaikara omu bubi bwawe wayegonza noogamba oti: Busaho n'omu arukundora; amagezi gawe n'ebiteekerezo byawe bikakuhabisa, wateekerezaaga omu mutima gwawe oti: Ninyowe ndoho, kwihaho nyowe, tiharoho ondi;

¹¹Olihikwaho obubi obu otasobora kweihaho wenka; oliizirwa akabi akotalisobora kwejuna; kandi olihikwaho bwango okuhwerekerra oku otamanyire.

¹²Ikara noobandwa kandi nooroga, nkooku wakakozire okuruga obuto bwawe; manyeki, rundi wakutungamu omugisa rundi abantu basobora kukutiina.

¹³Omazire esaaha n'esaha, oli hamu n'abahi bawe ab'amagezi, abo abanyakumanyire eby'omwiguru, abanyakwetegereza enyunyuuzi kandi abanyakuraanga buli kwezi ebiraabaho, hati baije bakujune.

¹⁴Burole, nibasisana nk'embuba, omurro gulibacwekereza; tibasobora kwejuna endimi zaagwo. Ganu tigali maanda ag'okwetagasa kandi tiguli murro ogw'okwirra haihi!

¹⁵N'abo abawakoliire muno oti, abo abaasuuburranaga na iwe okuruga ha buto bwawe; baligenda kunu na kuli buli muntu alyeetomera ogwe; tihalibaho n'omu alikujuna.