Read Runyoro - rutooro Is 48 Bible Online

Is 48 - Runyoro - rutooro bible

Is 48

¹Inywe abantu ab'enju ya Yakobbo, inywe abaayesirwe ibara lya Isirairi, kandi abaazairwe Yuda, inywe abanyakurahira ibara lya MUKAMA, kandi abanyakwatura Ruhanga owa Isirairi, baitu mutarukumwatura omumazima n'omu bulyo.

²Habwokuba nibeeyeta ibara ery'orubuga orurukwera kandi nibeegumiza hali Ruhanga owa Isirairi; Ogu anyakwetwa MUKAMA ow'amahe.

³Ninyowe narangire ebintu ebya ira, ninyowe nabigambire kandi ninyowe nabimanyisize abantu; hanyuma byaabaho.

⁴Habwokuba mmanyire nkooku oli ntahurra, nooguma dai nk'ekyoma, kandi oli ntayoroba ntayoroba nk'omulinga,

⁵nkakurangira ebintu ebya ira, kandi nkabikumanyisa bitakabaireho, nukwo oleke kugamba oti: embandwa yange niyo yakikozire. Ekisisani kyange ekibaizirwe n'ekyayagiibwe nibyo byaleeteriize ebintu binu kubaho.

⁶Ebi wahuliire byona, hati birole na hati nookyabyanga? Okuruga omu kasumi kanu, ninkugambira ebintu ebihyaka; ebintu ebyaserekerwe ebi otakamanyaga.

⁷Nubwo byahangwa hati, tiriri ira; okaba otakabihurrahoga okuhika hakiro kya hati, otaikara kugamba oti: Ebi nkabimanya ira.

⁸Tokabihurraga kandi tokabimanyaga, okuruga ira, okaba otakaitaga matu. Habwokuba nkamanya nkooku orukwija kuba muntu ncompya, kandi nkamanya nkooku wayesirwe mwemi okuruga okuzaarwa.

⁹Ka ndeke kubiihirwa, abantu nukwo bahaisanize ibara lyange ndekere kubiihirwa, tindukwija kubahwerekereza.

¹⁰Ego, nkusemiize, baitu tinkusemiize nk'efeeza; nkulengere ninkubonesa emihito nyingi omu kyoto eky'emihito.

¹¹Eki nkikozire habwange, kandi habwange nyenka, ibara lyange lisobora lita kufurungurwa? Ekitiinisa kyange, tindikiha ondi.

¹²Iwe Yakobbo ohurre, iwe Isirairi ou nakomere! Ninyowe ogu, ninyowe ow'okubanza kandi ninyowe ow'okumalirra.

¹³Omukono gwange nugwo gwakozire omusingi gw'ensi kandi omukono gwange ogw'obulyo nugwo nayanjurwize iguru; ebi byombi obu mbyeeta, biizira hamu.

¹⁴Mwesorooze inywena muhurre! Busaho n'emu ha mbandwa eyasoboire kuranga ngu: MUKAMA amugondeze alikora ebyagonza ha Bbabbulooni, n'omukono gwe guliba ha ba Kalidaaya.

¹⁵Nyowe, nyowe nyenka ninyowe nabalize namweta, kandi byona ebi alikora, birimugendera kurungi.

¹⁶Muunyirre haihi muhurre ekindukugamba. Okuruga ira naira, tinkabalizaaga omu nsita akasumi koona ebintu binu ekabyabeeriireho, nyowe nkaba ndoho. Hati MUKAMA Ruhanga antumire hamu na Mwoyo we.

¹⁷MUKAMA, Omucunguzi wawe, Ogu Arukwera owa Isirairi naagamba ati: Ninyowe MUKAMA Ruhanga wawe, anyakukwegesa eby'okukugasira anyakukwebembera omumuhanda osemeriire kurabamu.

¹⁸Kakuba wakwasire ebiragiro byange, wakubaire n'obusinge bwingi muno, nk'ekisaaru ekitooma, kandi obuhikiriire bwawe bwakubaire nk'ebigonzi by'enyanja.

¹⁹Oruzaaro rwawe rwakubaire nk'omusenyi, kandi abaijukuru bawe baakubaire nk'obujuma bwagwo; naakubaire ngumize nti: Batalihwerekerra.

²⁰Muruge Bbabbulooni mugende; mwiruke Abakalidaaya, murangirre amakuru ganu n'okusemererwa; mugamirre, mukimanyise omunsi yoona muti: MUKAMA acungwire omuheereza we Yakobbo!

²¹Abo abayarabize omwirungu bataitwe iroho, akabaihira amaizi omumwandara; akaata omwandara, amaizi gaagera.

²²MUKAMA akagamba ati: Ababi tibagira businge.