Read Runyoro - rutooro Is 49 Bible Online

Is 49 - Runyoro - rutooro bible

Is 49

¹Mumpulirize inywe ebizinga mutege amatu inywe abantu aba hara. MUKAMA akannyeta nkiri omunda okanduka ibara ntakazairwe.

²Akampa kubaza ebigambo ebitoire nk'ekitara, akansereka omu kiituuru eky'omukono gwe; akankora nk'omusogi ogunyakutoire, kandi oguteekaniziibwe kurasa, yansereka hara omu mufuko gwe.

³Akangambira ati: Iwe Isirairi oli mwiru muheereza wange, abantu niiwe balirabamu kunkugiza.

⁴Baitu nkamugarukamu nti: “Nkahendekera busa, nkeejwahiza busa; mazimakwo, ebinsemeriire bimanyirwe MUKAMA, kandi Ruhanga wange ogu, nuwe alinsasura.”

⁵Hati MUKAMA ogu, ayanfoire muhereza we ninkyaruga omunda ya mau nti nukwo mugarurre Yakobbo kandi musoroleze Isirairi, anyumiize, kandi Ruhanga wange nuwe maani gange

⁶naagamba ati: Iwe oliba muhereza wange, nukwo oimukye enganda za Yakobbo, kandi osorooze Abaisirairi abaasigaireho, eki tikirukumara; ninyija kukufoora kyererezi eky'okumulikira amahanga, nukwo ensi yoona ejunwe.

⁷MUKAMA Omucunguzi wa Isirairi kandi Arukwera we, naagamba ati: Abakama balirora kandi baliimuka, abalemi balijuumarra ogu arukugayibwa muno, ogu arukunugwa amahanga; habwa MUKAMA ogu omwesigwa Ogu Arukwera owa Isirairi ayakukomere.

⁸MUKAMA naagamba ati: Akasumi ak'okukujuna obu kalihika, ndikugirra embabazi kandi ndikwirukirra obu olinterra omuranga nooyenda nkukoonyere; ndikwebembera kandi ndikulinda, omuli iwe nuho ndikorra endagaano n'amahanga goona ndikwikiriza ogaruke oikarre omunsi yawe, hati enyakuli ihamba.

⁹Ndiragira abanyankomo nti: mwegendere: kandi abali omu mwirima ndibagambira nti: nainywe mwije nambere hali ekyererezi. Baliriira hamihanda, ensozi zoona ezitaroho kantu, nizo ziriba maliisizo gaabo.

¹⁰Tibalirumwa njara kandi tibalikwatwa iroho, ekiyaga n'omusana tibiribahikaho, habwokuba ogu anyakubagirra embabazi nuwe alibeebembera, abahikye hansoro z'amaizi.

¹¹Ensozi zoona ndizifoora mihanda, n'obuhanda bwange bulimanywa.

¹²Abantu bange baliruga hara muno baliruga Burugaizooba na Bugwaizooba, n'Aswani ha bukiizi obw'obulyo.

¹³Iwe iguru, zina habw'omuhimbo, iwe nsi, weebuge; inywe ensozi, mwimukye ebizina! Habwokuba MUKAMA airukiriire abantu be; aligirra embabazi abe ababoine omuhito.

¹⁴Baitu Siyoni neegamba eti: MUKAMA akaanagaija MUKAMA wange akannyebwa.

¹⁵MUKAMA naagarukamu ati: “Omukazi asobora kwebwa omwana we enkerembe arukwonka, asobora kutagirra mbabazi omwana we ou yazaire? Abakazi noobu baraaba nibasobora kwebwa abaana baabo, baitu nyowe tindisobora kwebwa iwe.

¹⁶Orole, nkakusarura ha biganja eby'emikono yange; ebisiika byawe mbiikazaaho eriiso.

¹⁷Abantu abalikwombeka buhyaka, bali haihi kwija, kandi abo abaakuhwerekeriize, nibaija kugenda.

¹⁸Imukya amaiso, magamaga kunu na kuli orole; abantu bawe nibeesorooza nibaija nambere oli. Mazimakwo nyowe nkooku ndi Ruhanga omwomeezi, noija kugonza muno abantu bawe, noija kubagonza nk'omugole okwagonza amabaale ge ag'omuhendo.

¹⁹Ensi yawe ekahwerekerezibwa tekyarumu bantu baitu hati, niija kufunda teemale bantu abarukwija kugiikaramu. Kandi abo abaakulekere omu bikamburo, nibaija kukurugaho bagende hara.

²⁰Abaana abaazairwe omazire kunyagwa balikugambira bati: ‘Ekiikaro kinu kifunzire tikirukumara, nserurra ekigalihire okukira kinu nikyo ndaikaramu.’

²¹Obu nubwo oliteekereza omumutima gwawe, oyekaguze oti: n'oha ayanzaaliire abaana banu boona? Nkanyagwa kandi nkaba ndi nguumba nkazaahisibwa kandi nkaahukana na iba nyowe, kandi abaana banu bakazaarwa oha? Dora nkaba ndi nyenka; baitu abaana banu bakaruga ha?”

²²MUKAMA naagamba ati: ndiragira amahanga; batabani bawe balibaleetera omu bifuba, kandi bahara bawe balibaleetera ha mabega.

²³Abakama nubo baligaruka omu kiikaro kya baisiinywe kandi abago baabo baligaruka omukiikaro kya baanyinainywe. Balikwinamira baroleriire hansi, kandi balikomba ecuucu ey'ebigere byawe obu nubwo olimanya, nyowe nkooku ndi MUKAMA abo abanyakunyesiga, tibaliswazibwa.

²⁴Omunyago gusobora kwihwaho omuntu ow'amaani, rundi abanyagwa basobora kwihwa ha mulemi ow'obukaya?

²⁵Mazima MUKAMA naagamba ati: noobwakubaire abanyagwa ab'abantu ab'amaani, balitwarwa, n'omunyago ogw'omulemi ow'obukaya gulimwihwaho, habwokuba ninyowe ndirwanisa abo abanyakubarwanisa, kandi ninyowe ndijuna abaana banyu.

²⁶Abo abanyakubabonabonesa, ndibaha kwitangana; balitamiira esagama yabo nkooku batamiira amaarwa: na boona abanyina omubiri balimanya ngu nyowe MUKAMA ninyowe mujuni waawe, kandi omucunguzi waawe, owamaani owa Yakobbo.