Read Runyoro - rutooro Is 5 Bible Online

Is 5 - Runyoro - rutooro bible

Is 5

¹Kanzinire enganzi yange ekizina eky'engonzi ekirukubazaaho orugonjo rwe orw'emizabbibbu, nikyo kinu: Enganzi yange ogu, akaba aina orugonjo rw'emizabbibbu orukaba ruli ha kasozi akakaba kaina orwezo rwingi muno.

²Akalima akasozi yakakomakomamu amabaale, yakabyaramu emizbbibbu erukukirra kimu oburungi; hagati, yayombekamu omunaara ogwaikarwamuga abalinzi yalimamu endeeba; yanihiraga ati, nirwija kwana emizabbibbu erukumara baitu emizabbibbu ei rwayanire, ekaba neesarra.

³Inywe enzarwa za Yerusaalemu n'abantu ba Yuda, nimbasaba mutucweremu, nyowe n'orugonjo rwange.

⁴Kiki ekindi ekikaba nikyetaagwa okukora omu rugonjo rwange oru ekirutarakoliirwe? Nyowe obu nanihiire nti ruranyanira emizabbibbu erukunura, habwaki rwayanire erukusarra?

⁵Lero hati nu, kambagambire ekindukwija kukora orugonjo rwange runu ninyija kurwihaho orugo rwarwo, nukwo rwonerwe kimu; ninyija kuseesa ekisiika kyarwo nukwo rurubatirirwe.

⁶Ninyija kurunaga; tiruligaruka kulimwa n'okusalirwa nukwo ruhuuke, rumerwemu amahwa n'amakerre; kandi ninyija kuragira ebicu, bireke kurunagira enjura.

⁷Habwokuba orugonjo orw'emizaabbibbu orwa MUKAMA ow'amahe, niyo nju ya Isirairi, kandi abantu ba Yuda nibyo bibyarwa bye ebimusemereza; yanihiraga ngu nibaija kukora ebirungi, baitu omukiikaro ky'okukora ebirungi bakaseesa esagama. Yanihiraga ngu baraakora ebihikire, baitu bakasaaliza muno abantu!

⁸Balikibona abo abarurukanira kwongera amaju ha gandi, n'emisiri hamisiri endi; okuhika obu bakamarrahokimu ensi yoona, omuntu akaburwa obwikaro, yoona ekaba yabo bakagyemarra.

⁹MUKAMA ow'amahe akarahira mmuhuliriize yagamba ati: “Mazimakwo, amaju maingi galiba bifuruka amaju amarungi amakooto, galiburwa ow'okugaraaramu.

¹⁰Baitu engonjo ikumi ezemizabbibbu zirirugwamu lita munaana, n'ensahu ibiri ez'embibo zirirugwamu ekigega kimu kyonka.”

¹¹Balikibona abo abazinduka nyenkyakara nukwo baserre amarwa empotole, agabanywa bakaiza obwire, okuhika obu gakabazimbya!

¹²Ha magenyi gaabo, bateera enanga, endongo, engoma n'endere, banywa n'eviini; baitu tibatamu kitiinisa MUKAMA ebi yakozire kandi tibeetegereza ebi akora.

¹³Nikyo abantu bange barukuzaahisizibwa habwokuba tibaina magezi; abantu baabo ababarukutamu ekitiinisa, enjara y'okubaita, kandi abantu baabo abaingi muno, iroho libali kubi.

¹⁴Habweki nyabuyonga etuubire kandi eyesamire muno, neemira abantu ba Yerusaalemu ab'ekitiinisa n'abandi baingi, ekitebe ky'abantu baayo, n'ogu anyakugyenyumirizaamu.

¹⁵Buli muntu alihemurwa aswazibwe kandi abantu boona abeekuliiriza balibundaazibwa.

¹⁶Baitu MUKAMA ow'amahe alyoleka nkooku ali mwinganiza omu kukora ebihikire, Ruhanga Omuhikiriire omu kukora ebirungi.

¹⁷Obu nubwo ebyana by'entaama birirya nk'ebinyakuli omu irisizo, esajwa n'ebyana by'emburabuzi biririira omu bikambuuro.

¹⁸Balikibona abo abanyakuleeta obubi nibabiiha ebisuba, abanyakuserra ekibi nk'abasika emiguha y'ekigaali,

¹⁹abanyakugamba bati: “Leka arahukye, leka amale bwango omulimo gwe nukwo tugurole!”

²⁰Balikibona abo abanyakweta ekibi kirungi kandi abanyakweta ekirungi kibi, abanyakweta omwirima kyererezi kandi abeeta ekyererezi mwirima, abagira ekisaaliire ngu nikyo kirukunulirra kandi ekirukunulirra ngu nikyo kirukusarra!

²¹Balikibona abo abeeyeta b'amagezi abanyakwesisaniza nk'abetegereza!

²²Balikibona abo abanywa amarwa bakatamiira abo abamanyire kugajwanganiza gakakooleera

²³abanyakulekera abanyakwina omusango habwokuba babahaire enguzi, abanyakwanga kukorra obwinganiza abataina musango.

²⁴Nk'orulimi rw'omurro oku rusiiriiza emisenka n'obunyansi obwomere nkooku gubuhwerekereza, ekikoro kyabo nukwo kirijunda kiti, n'orwakyo rwabo rulicuucuuka nk'ecuucu; habwokuba bakanga ebiragiro bya MUKAMA ow'amahe, baagaya ebigambo by'Ogu Arukwera wa Isirairi.

²⁵Habweki, MUKAMA abiihirirwe muno abantu be, amaliriire kubafubira. Ensozi niziija kutengeeta, kandi emitumbi y'abo abaafiire, niija kuba omu nguudo nk'ehunda. Habwokuba ekiniga tikikamuhoireho, kandi akyagoroire omukono.

²⁶MUKAMA naija kusimiza ihanga erya hara aliterre akooya liruge ha mitaano y'ensi; hati murole, liizire bwango muno!

²⁷Busaho muntu n'omu omulibo anyakujwaha, busaho n'omu anyakutabaijuka tiharoho n'omu anyakuhungira rundi kugwijagira, busaho anyakuteegukire orukoba; busaho anyakwina enkaito ecwekere orukoba.

²⁸Emisogi yabo etoire, amata gaabo goona geegemere, enkangaasi z'embaraasi zaabo nizisisana ibaale kandi enyamuziga zaabo nizeezigura nizisisana nka kairiringwa.

²⁹Okuburuguta kwabo nikusisana nk'okwentale, nibaburuguta nk'entale ensigazi; ziruruma nukwo ikwata ekisoro kyazo, zikiihaho ikitwara, busaho n'omu asobora kukinagiisa.

³⁰Kiro eki, zirikirurumiraho, okururuma kwazo, kulisisana okuhirra kwenyanja. Kandi omuntu obu alyetegereza ensi, talirora kindi, alibona omwirima n'omuhito; kandi ekyererezi kiriswekwa omwirima.