Read Runyoro - rutooro Is 51 Bible Online

Is 51 - Runyoro - rutooro bible

Is 51

¹MUKAMA naagamba ati: Mumpuliirize inywe abarukwenda kujunwa, inywe abanyebinga nukwo mbakoonyere; murole omwandara ogu mwabaizirweho, murole ekiihiro eki mwaihirwemu.

²Murole Abburahamu Isiinywe, na Saara nyinainywe; habwokuba, nambere nayetiire Abburahamu ogu akaba ali omu ati, baitu nkamuha omugisa kandi namwihamu abantu baingi.

³Habwokuba MUKAMA alihuumuza Siyoni; alihuumuza abantu boona abanyakuli omu bikamburo byarwo, irungu lyarwo alirifoora nk'orugonjo rw'Edeni, ibuga lyarwo alirifoora nk'omusiri gwa MUKAMA ruraikaraga nirukyanganuka kandi nirusemererwa, nirusiima kandi niruzina.

⁴Mumpulirize inywe abantu bange, ontegere okutu iwe ihanga lyange; habwokuba, ninyowe ntaho ebiragiro kandi obwinganiza bwange, niyo eriba taara ey'ekyererezi eky'okumulikira amahanga.

⁵Ndiija bwango ngajune; akasumi ak'okusingura kwange kali haihi. Nyowe nyenka ninyowe ndirema amahanga; Ensi eza hara zintegeriize; zintegeriize n'ekihika nzijune.

⁶Mwimukye amaiso muraramire haiguru, kandi ensi enyakuli hansi; habwokuba Iguru lirihwerra nk'omwika, ensi ericencebuka nk'ekyokujwara, kandi abo abanyakugiikaramu, nukwo baliba bati balifa nk'ebihuka, baitu okujuna kwange kuliikaraho ebiro byona, kandi obwinganiza bwange tibuligira mutaano.

⁷Mumpulirize inywe abanyakumanyire amakuru g'obuhikiriire, inywe abanyakukwata ebiragiro byange; muleke kutiina ebijumo by'abantu, kandi muleke kugaruukirra habwokubakondereza.

⁸Habwokuba abantu abo enyenje ziribalya nk'ezirukulya ekyokujwara, ebihuka biribatematema nk'ebirukutema ebyoya by'entaama; baitu okujunwa kwange kuliikaraho ebiro byona, n'obwinganiza bwange buliba bwa buli na buli.

⁹Imuka, imuka ai MUKAMA, fungiza, imuka nka ira, omu biro ebya kara muno, tali iwe ayatematemere Rahabbu, tali niiwe wacumisire ekijoka?

¹⁰Tali niiwe ayayomeze enyanja, ayayomeze amaizi ag'enyanja enkooto; enziha z'enyanja waifoora muhanda ogw'okurabwamu abacungwirwe?

¹¹Abacungurwa ba MUKAMA baligaruka, balihika Siyoni nibazina; baina omuhimbo, baraikaraga n'omuhimbo n'okusemererwa; bataina bujune n'okusaalirwa.

¹²MUKAMA naagamba ati: ninyowe omuhuumuza wanyu kiki ekirukubatiinisa omuntu anyakufa, habwaki mutiina omwana w'omuntu anyakumara akasumi kake nk'obunyansi.

¹³Oyeberwe MUKAMA Ruhanga wawe, ayabambire iguru kandi ayalimire omusingi gw'ensi? Kiki ekirukutiinisa ekiniga ky'abo abanyakubonabonesa? Abo abanyakwetekaniize kukuhwerekereza? Ekiniga kyabo tikikyaina eki kisobora kukukoraho.

¹⁴Ogu ayakwasirwe munkomo alirekerwa bwango, baitu alyomeera, kandi talihwerwa byokulya.

¹⁵Habwokuba ninyowe MUKAMA Ruhanga wawe anyakucukumya enyanja, ebigonzi byayo bikahirra. Ibara lyange, ninyowe MUKAMA ow'amahe.

¹⁶Obu nabambire iguru, nalima omusingi gw'ensi kandi nagamba abantu ba Siyoni nti: Muli bantu bange, nkakuta ebigambo byange omukanwa, nakusereka omu kiituuru ky'omukono gwange.

¹⁷Imuka imuka oyemerre, iwe Yerusaalemu iwe ayanyweriire omu mukono gwa MUKAMA ekikopo eky'ekiniga kye, iwe ayanyweriire kimu ebbakuli, watandika kutaratara.

¹⁸Omubaana aboojo Yerusaalemu abayazaire busaho n'omu asobora kugyebembera, kandi omubaana boona abayayoroire, busaho n'omu asobora kugikwata ha mukono.

¹⁹Okagwerwa akabi ak'emiringo ebiri: ensi yawe ekahwerekerezibwa obulemu, abantu baawe baitwa enjara. Tiharoho muntu n'omu asobora kukugirra embabazi,

²⁰Abantu bawe bagwire ensazi, bali ha nsonda zoona ez'oruguudo; nibasisana nk'ensuku enyakukwasirwe omuguha gw'omuhiigi.

²¹Habweki, iwe arukubonabonesibwa, iwe anyakutamiire baitu totamiire maarwa,

²²binu MUKAMA wawe nibyo arukugamba: MUKAMA Ruhanga wawe anyakurwanirra abantu be. Hati nakwihaho ekikopo eki nakuhaire mbiihiirwe. Toligaruka kunywa amaarwa ago agaakutamiize.

²³Ninyija kugaha abo abaakubonaboneseze, abaakugambire bati: Juumara tukutembereho; omugongo gwawe wafoire itaka, kandi wagufoora ruguudo orw'okurabaho.