Read Runyoro - rutooro Is 52 Bible Online

Is 52 - Runyoro - rutooro bible

Is 52

¹Imuka imuka garukwamu amaani iwe Siyoni, iwe Yerusaalemu orubuga orurukwera; jwara ebyokujwara byawe ebirungi; habwokuba, tihaligaruka kubaho atasazirwe n'omu rundi atasemiire alikuhikamu.

²Iwe Yerusaalemu ayanyagirwe, weejune ecuucu, imuka iwe muhara wa Siyoni ayanyagirwe weesumurre ebikya enjegere ezikubohere.

³Habwokuba MUKAMA naagamba ati: mutagurwe kantu na kati kandi nimwija kucungurwa hataroho sente.

⁴Habwokuba MUKAMA Ruhanga naagamba ati: Ira, abantu bange bakagenda kwikara omunsi Misiri, kandi Abasiriya baababonabonesa muno bataina eki barukubatura.

⁵Hati, MUKAMA nikyo arukugambira ati: Hanu ninkorahoki, kurora abantu bange nibatwarwa hataroho bulyo? Abalemi baabo nibeesaalinga, kandi obutoosa ibara lyange lisiiba nirigaywa.

⁶Ha kiro eki, abantu bange nubwo balimanya ibara lyange, nubwo balimanya nkooku ninyowe mbaza. Dara nyowe ninyowe ndi hanu.

⁷Kabikasemera ebigere by'ogu arukurubata hansozi, arukuleeta amakuru amarungi, arukurangirra obusinge, arukurangirra okujunwa, arukugambira Siyoni ati: “Ruhanga wawe naalema.”

⁸Ohurre abalinzi bawe nkooku barukutoka, nkooku barukuzinira hamu habw'omuhimbo; habwokuba MUKAMA obu aligaruka Siyoni, balirorangana amaiso n'amaiso.

⁹Inywe abanyakuli omubikamburo ebya Yerusaalemu, mwimukize hamu ekizina, habwokuba MUKAMA ahuumwize abantu be, acungwire Yerusaalemu.

¹⁰MUKAMA alyekoonyeza obusobozi bwe obwingi; alijuna abantu be, kandi eki, ensi yoona erikirora.

¹¹Inywe abanyakuhimba ebikwato bya MUKAMA, murugeho murugeho, muruge hanu mugende; muruge hagati y'orubuga Yerusaalemu, mweyeze.

¹²Habwokuba, timurukwija kuturuka nimwanguha, kandi timurukwija kuturuka nimwiruka, habwokuba MUKAMA nuwe arukwija kubeebembera, kandi Ruhanga owa Isirairi nuwe alibakingira.

¹³MUKAMA naagamba ati: Omwiru wange alitunga omugisa alinyumizibwa, alikuzibwa, kandi aliba w'ekitiinisa kingi muno.

¹⁴Abantu baingi nkooku baamuboine, baahunirra ensisana ye ehindukire muno, etarukusisana nk'ey'omuntu.

¹⁵Nukwo alitiinisa ati amahanga maingi; abakama balimwemerra omumaiso bataina eki barukugamba; habwokuba balirora ekintu eki bataragambiirwe, kandi balikenga eki batarahuliire.