Read Runyoro - rutooro Is 53 Bible Online

Is 53 - Runyoro - rutooro bible

Is 53

¹N'oha ayahuliire eki twahuliire? Kandi n'oha ayayolekerwe obusobozi bwa MUKAMA?

²Habwokuba akakurra omumaiso ge nk'ekimera ekito, kandi nk'omuhama ogumezire omwitaka eryomere. Taina nsisana rundi bunyamibwa, ngu turaamuhanga amaiso, kandi tasemiire, ngu turaamuligira.

³Akagaywa kandi akangwa abantu; akaba muntu w'obujune kandi akasaalizibwa muno; akagaywa, kandi naitwe tutamutemu kitiinisa akasisana nk'omuntu abantu ou barora bakeeswekerra ha maiso.

⁴Mazimakwo, akeeha obusaalizi bwaitu kandi akeetaho obujune bwaitu; baitu nabwo noobu yakozire ebi itwe tukamuteekerezaaho nk'omuntu ayafubiirwe, ayatiirwe Ruhanga yamubonabonesa.

⁵Baitu nuwe yahutaaziibwe habw'ebibi byaitu, nuwe yatiirwe habw'obubi bwaitu; ekifubiro yahairwe nikyo kituleetera obusinge, ebintu bye nibyo bitutambira.

⁶Buli muntu atomere omuhanda gwe, nitusisana nk'entaama ezinyakuhabire; baitu MUKAMA amutaireho ekifubiro, ekifubiro ekisemeriire itwe itwena.

⁷ Akacanzibwa kandi akabonabonesibwa, baitu atagambe kantu; akasisana nk'akataama akarukutwarwa omu ibaagiro, akasisana nk'entaama enyakwikara eculiire omumaiso g'abarukugisara ebyoya habweki, atagambe kantu.

⁸Akakwatwa yacwerwa omusango baamutwara kumwita, hatabeho n'omu ayafiireho ebyamubaireho

⁹noobwakubaire ataracwire musango rundi atarabiihire bisuba, baitu akaitwa hamu n'abaguuda, yaziikwa n'ababi.

¹⁰MUKAMA naagamba ati: Nkakigonza abonabone; okufa kwe, nikyo kyabaire kyonzira eky'okuganyiza ebibi. Habweki, alirora baijukuru be; kandi alihangaara, entegeka yange, omuli uwe nuho erihikiririzibwa.

¹¹Obu alimara kubonabona, aligaruka ayesiime, obu nubwo alimanya nkooku atarabonaboniire busa. Omwiru wange omugonzibwa ounsiima nuwe alifubirwa habw'abaingi, kandi abaingi abo, ndibaganyira habwe.

¹²Nikyo ndimuheera omugabo hamu n'ab'ekitiinisa, kandi alibagana omunyago hamu n'ab'amaani; habwokuba akaikiriza kufa, kandi yabalirwa omu basiisi; akeeta omukiikaro ky'abasiisi baingi, kandi yabasabirra ekiganyiro.