Read Runyoro - rutooro Is 54 Bible Online

Is 54 - Runyoro - rutooro bible

Is 54

¹MUKAMA naagamba ati: “Zina iwe engumba atarazaire imukya ekizina kandi teera omukwazo, iwe atakarumwaga bisa! Habwokuba, abaana b'ogu ayanagaizirwe, baliba baingi okukira ab'ogu ayaikaire na iba!

²Galihya eheema yawe, oyanjurre engoye ez'ebiikaro byawe; otaifunza, oraihye emiguha yawe kandi oteere ebikondo byawe.

³Habwokuba noija kugalihya emitaano yawe ha mbaju zoona; abantu bawe baligarra ensi hati enyakurumu amahanga agandi. Embuga ezairukirwemu abantu baliigarukamu.

⁴Otatiina, habwokuba toliswazibwa; oleke kufuuberra, tolihemurwa; habwokuba olyebwa ensoni ez'obuto bwawe, kandi toligaruka kwijuka okugaywa okw'obufaakati bwawe.

⁵Habwokuba Omuhangi wawe nuwe baro, ibara lye nuwe MUKAMA ow'amahe; kandi Ogu Arukwera owa Isirairi nuwe Omucunguzi wawe, ayetwa Ruhanga ow'ensi yoona.

⁶Ruhanga wawe naagamba ati: Habwokuba MUKAMA akakweta oli nk'omukazi ayanagaizirwe kandi anyakwina obujune bwingi, noosisana nk'omukazi owobuto abingirwe.

⁷Nkakunaga omwanya muke baitu ndikwegarurra n'ekihika kingi.

⁸MUKAMA Omucunguzi wawe naagamba ati: Nkakwesereka akasumi kake, nyina ekiniga kingi baitu ndikwoleka engonzi zange ebiro byona.

⁹Kinu nikinsisanira nk'omubiro bya Noha: nkooku narahiire nti, amaizi nk'ag'omukasumi ke tigaligaruka kumira ensi, hati nukwo ndahiire nti, tindigaruka kukubiihirirwa; tindikujunaana kandi tindikufubira.

¹⁰Habwokuba MUKAMA anyakukugonza naagamba ati: Ensozi zisobora kurugaho ikagenda, obusozi nabwo busobora kwihururwa, baitu engonzi zange eza buli na buli hali iwe tizirikeeha, n'endagaano yange ey'obusinge tericwibwa.

¹¹ Ai bambi iwe arukubonabonesibwa, arukutwarwatwara omuyaga kandi ataina kihuumuza, amabaale gawe ninyija kugatamu ekyoma kandi emisingi yawe ngitemu amabaale ag'omuhendo aganyakwetwa safiro.

¹²Ndikora esuuku zaawe n'obubaale oburukugaajuka, n'enyigi zaawe n'obutimbe, n'omutaano gwawe n'amabaale ag'omuhendo mwingi.

¹³Abaana baawe balyegesibwa MUKAMA; kandi baliba n'omugisa mwingi.

¹⁴Oligumibwa omu kuhikirra; okwenderezibwa kuliba hara kandi tolitiina; n'okwekanga kulikuba hara kandi tikulikwirra haihi.

¹⁵Weena alikusesera alikikora habwe wenka; abo abalyesorooza kukurwanisa tibalikusobora.

¹⁶Dora, ninyowe nahangire omuheesi arukujuguta omurro gw'amakara, naihamu eky'okurwanisa habw'omulimo gwakyo, kandi ninyowe nahangire omuhwerekereza ahwerekereze.

¹⁷Eky'okurwanisa ekirukukorwa kukurwanisa tikiribona mugisa na kake; n'orulimi rwona oruliimuka kutongana naiwe olirusingisa bulyo. Bunu nubwo bugwetwa bw'abairu ba MUKAMA, kandi ndibasinguza, agambire MUKAMA.”