Read Runyoro - rutooro Is 55 Bible Online

Is 55 - Runyoro - rutooro bible

Is 55

¹MUKAMA naagamba ati: Weena anyakwina iroho aije Dara amaizi nganu! N'ogu ataina sente, aije agule anywe! Ija ogule eviini n'amata, toina ekyoraasabwa kusasura.

²Habwaki muturukya sente okugura ebitali byokulya n'okuhayo amaani ganyu ha bw'ekintu ekitarukubaigusa? Mumpulirize kandi mukole eki ndukugamba, nubwo muraalya ebyokulya ebirukukirra kimu byona oburungi.

³Mutege amatu kandi mwije nambere ndi; muhurre nubwo muraayomeera; ninyija kukora na inywe endagaano ey'ebiro n'ebiro, mbahe omugisa ogu nanihiize Daudi.

⁴Nuwe nafoire kaiso w'abantu, mwebembezi kandi ngabwa y'amahanga

⁵olyeeta amahanga ag'otaramanyire kandi amahanga agatarakumanyire galikwebinga, habwokuba, MUKAMA Ruhanga wawe, kandi habwokuba Arukwera mali Ogu owa Isirairi, akakunyumiza.

⁶Muserre MUKAMA, naakyasobora kuzoorwa, mumwebinge akyali haihi.

⁷Omuntu omubi ayegarukemu; acwe engeso ze; atahikiriire arugeho ebiteekerezo bye; agaruke hali MUKAMA, nukwo amugirre embabazi, agaruke hali Ruhanga waitu, habwokuba naija kumuganyirra kimu.

⁸Habwokuba MUKAMA naagamba ati: Ebiteekerezo byange tibirukusisana n'ebyanyu kandi n'engeso zange tizirukusisana n'ezanyu.

⁹Iguru nkooku liri hara muno ensi, engeso zange nazo, nukwo zaahukaine muno ha zanyu, n'ebiteekerezo byange nukwo byahukaine ha byanyu.

¹⁰Enjura n'ebirika nkooku bigwa bikakya bitaitiriire ensi, bikagireetera kumeza n'okukuza ebintu, nukwo etungise omusigi embibo, ehe omulimi ebyokulya,

¹¹n'ekigambo ekinyakuruga omukanwa kange tikifa busa, kitahikiriize ekindukugonza, kikakora eki nakigambiire kukora.

¹²Habwokuba mulituruka aheeru mwijwire omuhimbo, mwebemberwe mwina obusinge; Ensozi n'obusozi ebiriba bibali omumaiso biriimukya ekizina, emiti yoona ey'omubwerre eriteera omungaro.

¹³Omu kiikaro ky'omweramaino, halimeramu omusambya; omu kiikaro ky'amatojo, halimeramu orukoroigo. Eki, nikyo kiraamanyisaaga nkooku ndiikaraho ebiro byona, nikyo kiraijukyaga, nyowe MUKAMA ebi nakozire.