Read Runyoro - rutooro Is 57 Bible Online

Is 57 - Runyoro - rutooro bible

Is 57

¹Omuntu afa, baitu eki, busaho n'omu akiteekereza; abantu abanyakwemarra ha diini, batwarwa, baitu eki busaho n'omu akyetegereza. Habwokuba omuntu omurungi atwarwa aruga omu muhito,

²ataaha omu businge, abo abanyakukora ebirungi, omukufa basangamu obusinge n'ekihuumuro.

³Baitu inywe batabani b'omukazi omufumu, oruzaaro rw'omusaija omusiihani n'orw'omukazi malaaya mwirre haihi hanu.

⁴Nimusekeereza oha? Inywe embiihi z'ebisuba, nimugaaniiza oha? Timuli baana b'obubi, timuli ruzaaro rw'obucwangya?

⁵Inywe abarukwenda kusiihanira omumiti y'emivule, hansi y'omuti gwona ogujumbire; inywe abarukwitira abaana banyu omubihanga; omu myatika z'emyandara?

⁶Omu mabaale agarukuterra ag'omu kihanga, nugwo omugabo gwanyu amabaale ago, amabaale ago nugwo omugabo gwanyu; nugwo mwahongiire ekihongwa eky'ekyokunywa, nugwo mwahongiire ekihongwa eky'ebyokulya. Baitu nyowe ebi nibimpuumuza?

⁷Ha rusozi orw'ekitiinisa kandi oruraihire, nuho wataire ekitabu kyawe, kandi oku, nuho wagendaga kuhonga ekyonzira.

⁸Enyuma y'orwigi n'omukumirro, nuho wataire emmanyiikirizo yawe; habwokuba, obu walekere nyowe, okasurra ekitabu kyawe, wakitemba, okakigalihya; okakora endagaano n'abo bakama b'ekitabu eki ogonza orozere ha njuro yaabo.

⁹Oyemiisira ebirukuboya, oyesiiga amagita, nukwo ogenda kuramya embandwa Moleeki. Okazoora abacwezi ab'okuramya, otuma abakwenda omu bicweka ebya hara, noobwakubaire nyabuyonga.

¹⁰Noobu oliba wagenzire orugendo orukooto orwakujwahize, baitu otagambe oti: Ninjwahira busa; okatunga ekintu ekihyaka eky'okukugarramu amaani, nukwo kutagwa ensazi.

¹¹Biraha ebi ebirukukutiinisa nukwo okambiiha ebisuba, okaleka kunyijuka, okaleka kunteekerezaho? Ntaculeere omwanya mukooto muno, eki nikyo kirukukutanga kuntiina?

¹²Nooteekereza ngu ebyokora bihikire, baitu ninyija kuranga engeso zawe, kandi embandwa zaawe zoona tizasobole kukukoonyera.

¹³Obu oraateeraga enduuru, embandwa zaawe ezi wasoroize nyamwingi, ezi, zikujunege turole! Omuyaga guliziihaho, orwoya orw'akanwa rulizitwara hara. Baitu omuntu anyakunyebinga, alirya ensi, kandi aligweterwa orusozi rwange orurukwera.

¹⁴MUKAMA aliragira ati: Mulime, mulime kandi musemeze mumarre kimu enkonge zoona omu muhanda gw'abantu bange.

¹⁵Habwokuba, ogu ow'ekitiinisa kandi owa haiguru, ayabaireho buli na buli, anyakwetwa Omuhikiriire, naagamba ati: Nyikara omu kiikaro ekya haiguru kandi ekirukwera, kandi nyikara n'omuntu ow'anyakwina omutima ogurukweteera kandi ogurukwebundaaza, nukwo ngumye ogu arukwebundaaza, ngumye ogu ow'omutima ogurukweteera.

¹⁶Habwokuba, tindiikara ninteera empaka ebiro byona, kandi tindiikara mbiihirwe kakuba nkora eki, abantu balindugaho, kandi kunu ninyowe nabahangire.

¹⁷Nkamubiihirirwa habw'obubi obunyakuleetwa omu kwegombakwe, nukwo kumufubira nayesereka habw'okukwatwa ekiniga; baitu akeyongera kugumira omu bubi bwe, naahondera ebiteekerezo eby'omutima gwe.

¹⁸Mboine engesoze, kandi ninyija kumutambira, ninyija kumwebembera kandi ndimusumbuusa obusinge, mbusumbuuse n'abo abarukurra.

¹⁹Aba hara n'abahaihi, ndibasumbuusa obusinge, kandi ndimukoonyera; MUKAMA nukwo arukugamba ati.

²⁰Baitu ababi nibasisana nk'enyanja erukusikuka, etarukusobora kuteekaana; amaizi gaayo, gaimukya esaabu n'oburofu.

²¹Ruhanga wange naagamba ati: Ababi tibagira businge.