Read Runyoro - rutooro Is 6 Bible Online

Is 6 - Runyoro - rutooro bible

Is 6

¹Omu mwaka omukama Huziya ogu yafeeriiremu, nkarora MUKAMA asingire ha kitebe eky'obukama bwe ekiraihire kandi ekiimukiibwe haiguru; kandi ekyebu eky'ekijwaro kikaba nikimaraho enju ya Ruhanga.

²Eruguru ye, hakaba heemeriireyo Baaseerafi; buli omu akaba aina amapapa mukaaga; abiri nugo yayeswekerezaaga ha maiso, abiri agandi ageeswekereza ebigere, kandi abiri agasigaireho, nugo yahurrukisaaga.

³Baikaraga nibeetangana nibagamba bati: “MUKAMA, muhikiriire, muhikiriire, muhikiriire; ensi yoona ijwire ekitiinisa kye;”

⁴omu obu yatokaga emisingi y'amalembo yatengeeta, enju yazigwa omwika.

⁵Nagamba nti: “Ai bambi! Nyowe ndi w'okufa; habwokuba ndi muntu w'eminwa etasemeziibwe, kandi nyikara n'abantu eb'eminwa etasemeziibwe. Baitu dora, omukama MUKAMA Ow'obusobozi bwona, mweroliire n'amaiso gange ganu gonyini!”

⁶Nubwo omu ha Baaseerafi, yampikireho bwango akwasire eryanda eri aihire ha itambiro, alikwasize oruhana

⁷yalinkwasiza ha minwa naagamba ati: “Eryanda linu nkooku limazire kukuhika ha minwa omusango gwawe gukwihirweho, n'ekibi kyawe kikuganyiirwe.”

⁸Kandi nkahurra MUKAMA naagamba ati: “Ndaatuma oha, n'oha araagenda omu kiikaro kyaitu?” Nubwo nagarukiremu nti “Dara nyowe! Ninyowe tuma.”

⁹MUKAMA yangambira ati: “Genda ogambire abantu abo oti: ‘Noobu muraahurra ebirukwingana ha, timurukwija kukenga; noobu muraarora ebirukwingana ha, timurukwija kwetegereza.’

¹⁰Abantu abo bafoole ntabuganya, baigale amatu, baite amaiso, baleke kurora, baleke kuhurra n'okwetegereza, bataliija kunkubukira bakatambirwa.”

¹¹Hanyuma nkakaguza nti: “MUKAMA, eki kiritwara kasumi ki?” Yagarukamu ati: “Okuhika embuga obu zirikafooka bifuruka ikaburwa ow'okuziikaramu; amaju gakaburwa abantu, ensi ekafookera kimu kitongo.

¹²MUKAMA akaihurra abantu akabatwara hara omunsi hagati hakabamu ebiikaro bingi.

¹³Noobu halisigaraho omuntu omu ha buli ikumi, ogu na uwe alihwerekerezibwa. Alihoogorwa omuhomozi ogwatemerwe ira, haasigaraho ekikoro.” (Ekiro eki, nikyo kimanyisa okutandika buhyaka okw'abantu ba Ruhanga).