Read Runyoro - rutooro Is 60 Bible Online

Is 60 - Runyoro - rutooro bible

Is 60

¹Yerusaalemu, imuka oyangasane nk'izooba; ekitiinisa kya MUKAMA nikikwakiraho!

²Amahanga agandi nigaija kuswekererwa omwirima, baitu iwe noija kumuliikanirwaho ekitiinisa kya MUKAMA; okumuliikana okw'amaiso ge, nikwija kuba hali iwe.

³Amahanga galigendera omukyererezi kyawe, kandi abakama omu kumuliikana okw'okwimuka kwawe.

⁴Imukya amaiso omagamage orubaju n'orubaju orole ekirukubaho: abantu bawe nibasorrokana kutaaha! Batabani bawe nibaija kuruga hara, bahara bawe nibaija kuhimbwa nk'abaana.

⁵Obu, nubwo olirora omarweho omuhimbo olicwekwa enkizi kandi okyanganuke; habwokuba ebintu byona eby'omu nyanja, olibiheebwa; olitunga obuguuda obw'amahanga goona,

⁶olitunga engamiya ezitabarwa, engamiya ento eza Midiani n'eza Efa; eza Sebba zoona ziriija, zirireeta ezaabbu n'ebirukuboya kurungi abantu bahaisanize.

⁷Amagana aga Kedara goona baligasorooleza iwe, empaya z'entaama eza Nebbayoosi, olizekoonyeza ziriikirizibwa ha itambiro lyange, kandi ndinyumiza enju yange ey'ekitiinisa.

⁸Nibaha abo abarukucuucuuka nk'ekicu, kandi abarukurahuka nk'amaiso agarukugenda ha madirisa gaago?

⁹Amazinga galintegereza, kubanza n'ebyombo bya Tarasiisi, nizitaahya abantu ba Ruhanga, nibaija n'efeeza n'ezaabbu, eby'okutamu MUKAMA ekitiinisa, Ruhanga arukwera owa Isirairi ayaragiire amahanga goona kukugiza abantu be.

¹⁰MUKAMA naagamba ati: Abanyamahanga balyombeka buhyaka ebisiika byawe balikwombeka buhyaka kandi bakama baabo balikuheereza: habwokuba, nkakuteezibwa ekiniga baitu hati nkugiriire embabazi nakuganyira.

¹¹Amalembo gaawe garaikaraga gakingwirwe, tigaakingwege nyamusana n'ekiro; nukwo abantu bakuleeterege obuguuda obw'amahanga, geebembiirwe bakama baago.

¹²Habwokuba ihanga n'obukama obutalikuheereza, bulihwerekerra; amahanga ago galihwerekererra.

¹³Oliheebwa ekitiinisa kya Lebbanoni, emiti emibura, ensuku nengoti eby'okusemeza ekiikaro kyange ekirukwera; ekiikaro eki mpuumulizaaho ebigere, ndikifoora ky'ekitiinisa.

¹⁴Abaana b'abo abaakuboneseze, baliija bakwinamire; kandi boona abo abaakugayaga, balikugwa ha bigere; balikweta rubuga rwa MUKAMA, Siyoni orw'Ogu Arukwera owa Isirairi.

¹⁵Noobu oliba wanagaizirwe kandi wanoberwe, hakaburaho n'omuntu ow'okukurabamu, ndikufoora w'ekitiinisa ebiro n'ebiro kintu ekireeta omuhimbo ebiro byona.

¹⁶Amahanga n'abakama balikutaho omutima, nka nyina omwana oku arolerra omwana we, nubwo olimanya nyowe MUKAMA nkooku nakujunire. Ruhanga ow'obusobozi owa Isirairi nuwe yakucungwire.

¹⁷Omukiikaro ky'omulinga ndireetamu zaabbu, kandi omu kiikaro ky'ekyoma, ndireetamu efeeza; omu kiikaro ky'orubbaho ndireetamu omulinga, omu kiikaro ky'amabaale ndireetamu ebyoma. Abaroleerezi bawe ndibaha obusinge, kandi abanyampara bawe ndibafoora kuhikiira.

¹⁸Obunyagi tibuligaruka kuhulirwa omunsi yawe, okuhwerekereza tikulihulirwa omu mitaano yawe.

¹⁹Izooba tiririgaruka kukumulikira nyamusana, rundi okwezi kukumulikira omu bwire bw'ekiro; baitu MUKAMA nuwe aliba kyererezi kyawe eky'ebiro n'ebiro; kandi Ruhanga wawe nuwe aliba kitiinisa kyawe.

²⁰Ebiro byawe eby'obujune birihwaho, nyowe MUKAMA ninyowe ndiba kyererezi kyawe eky'ebiro n'ebiro, ekiriikaraho okukira izooba n'okwezi.

²¹Abantu bawe boona baliba barungi, balirya ensi ebiro n'ebiro, ensi ei nabyaire, ei nahangire, nukwo mmanyise abantu boona obukuru bwange.

²²Arukukomerrayo omuli inywe, aliba ruganda, kandi arukukira obuto aliba ihanga ery'amaani, ninyowe MUKAMA; eki ninyowe nkigambire akasumi kaakyo obu kalihika, ndikikora bwango.