Read Runyoro - rutooro Is 62 Bible Online

Is 62 - Runyoro - rutooro bible

Is 62

¹Tindukwija kuculeera habwa Siyoni, kandi tindukwija kuhuumura habwa Yerusaalemu, okuhika obuhikiriire bwayo obu bulikaturuka nk'emamba, okuhika okujunwa kwe obu kulyaka nk'ekimuli.

²Amahanga galirora obuhikiriire bwawe, n'abakama boona balirora ekitiinisa kyawe; kandi oliba ihunde ery'omukama omu mukono gwa Ruhanga wawe.

³Oliba kondo ey'oburungi omu mukono gwa MUKAMA, kandi oliba ihunde ery'omukama omu mukono gwa Ruhanga wawe.

⁴Toligaruka kwetwa Kinagaijwa kandi n'ensi yawe terigaruka kwetwa kitongo, ibara lyawe erihyaka, oraayetwaga Muligirwa wa Ruhanga ensi yawe eraayetwaga Ruganzi; Kiganzi.

⁵Nk'omusigazi oku aswera omwisiki empikirre, n'ogu ayakwombekere nukwo alikuswera; kandi nk'omugole omusaija ayegondeza hali mukaziwe omugole, na Ruhanga wawe nukwo alyegondeza omuli iwe.

⁶Iwe Yerusaalemu, ha bisiika byawe ntaireho abalinzi; nyamusana n'ekiro tibaaculeerege. Inywe abanyakwijukya MUKAMA, mutalirekerra,

⁷kandi mutamwikiriza kuhuumura okuhikya obu aligumya Yerusaalemu, akagifoora kintu ky'okuhaisanizibwa omunsi yoona.

⁸MUKAMA arahiire, kandi habw'obusobozi bwe, alihikiriza eki arahiriire, agizire ati: Ebyokulya byawe tibirigaruka kuliibwa abanyanzigwa bawe, kandi n'abanyamahanga tibaligaruka kunywa eviini yawe ei watalibaniire.

⁹Baitu abo abanyakwahura ebibagesa, nubo balirya bahaisanize MUKAMA. Abo abanyakusorooza emizabbibbu, nubo balinywera omu kiikaro kyange ekirukwera.

¹⁰Mugende, Murabe omumalembo, musemeze emihanda abantu ei baraarabamu; muhanikire abantu emanyikirizo.

¹¹Kinu nikyo MUKAMA arukurangirra ensi yoona naagamba ati: Mugambire abantu ba Siyoni muti: “Okujunwa kwanyu kumaliize kuhika; naija kuha empeera, naija kusasura.”

¹²Balyetwa bantu abarukwera, Abacungurwa ba MUKAMA; kandi iwe olyetwa Mutongole, orubuga orutaranagaizirwe.