Read Runyoro - rutooro Is 64 Bible Online

Is 64 - Runyoro - rutooro bible

Is 64

¹Ha, kakuba otemwire iguru okasirimuka omunsi ensozi obu zaakukuboine, zaakutengesire-nk'omurro okugwokya ebikunya by'emiti,

²nkooku omurro gucumba amaizi gakeetabura nubwo abanyanzigwa bawe bakumanye, nubwo amahanga obu galikubona gakankane!

³Hakabaho akasumi obuwaizire wakora ebintu ebinyakutiinisa ebi tukaba tutarukunihira; ensozi ikakurora zaatengeta.

⁴Okuruga ira lyona, busaho n'omu araboineho rundi ayahuliire ogu arukukusisana, anyakukorra abantu abanyakumwesiga, ebintu ebirukusisana nk'ebi.

⁵Osiima abo abanyakugonza kukora ebirungi, abo abanyakugonza kwijuka ebi oyenda bakole. Okatubiihirirwa, baitu itwe tukeeyongera kusiisa; noobu wabiihirwe muno, tukeeyongera kukora ebibi, okuruga obwaira bwona.

⁶Itwena tukasiisa; noobwakubaire ebi twakozire nitugira birungi, bibi cuu. Hahw'ebibi byaitu nitusisana nk'ebikoora ebinyakuhotoka bikahuuhurwa omuyaga.

⁷Busaho n'omu akwesengereza; kandi busaho akwebinga omukoonyere. Okatwesereka, watuhwamu habw'ebibi byaitu.

⁸Baitu nabwo Ai MUKAMA, niiwe Isiitwe, itwe tuli ibumba kandi iwe niiwe atubumbire niiwe watuhangire.

⁹Ai MUKAMA, otabiihirwa kutamu ensaagi, kandi oleke kwikara noijuka ebibi byaitu ebiro n'ebiro, Orole, oteekereze, itwena tuli bantu baawe.

¹⁰Embuga zawe ezirukwera zikafooka irungu, Siyoni ekafooka irungu, Yerusaalemu kitongo

¹¹Enju yaitu erukwera kandi enungi, baisenkuruitwe nambere ei baakuhaisanirizaamuga ekahya, kandi ebiikaro byaitu ebitusemereza, bikafooka bikamburo.

¹²Ai MUKAMA, ebintu ebi byona tibirukukutuntuza? Toina eky'oraakora, otubonese ebintu binu ebituhinguraine, ebi tutasobora kugumiisiriza?