Read Runyoro - rutooro Is 65 Bible Online

Is 65 - Runyoro - rutooro bible

Is 65

¹MUKAMA akagamba ati: Nkeeteekaniza kuserurwa abo abataransabire; nkeeteekaniza kuzoorwa abo abataranserwire. Nagamba ihanga eritaranyesengeriize nti: Dara nyowe, ndi hanu, ndi hanu.

²Nasiibaga ntegiire emikono abantu abeemi, abanyakukora ebintu ebitali birungi, abanyakukuraatira amagezi gaabo gonka;

³Abantu abanyakwikara nibambiihiza, mbataireho eriiso abanyakutambira ebyonzira omu misiri, kandi nibacumiikirirra obubbaani ha matafaali;

⁴abanyakwikara omu bituuro kandi abanyakuraara omu biikaro ebya ha rubaju abanyakulya enyama y'empunu, kandi kunu baina omucwe ogw'ebintu ebirukuzirwa omu bibindi byabo;

⁵abanyakugamba bati: Otatwirra haihi, habwokuba, tuhinguraine kwera, tosobora kutukwataho, abantu nk'abo, rwoya rw'omunyindo zange, murro ogunyakusiiba nigwaka

⁶nkacwamu ira kubafubira, n'ekifubiro kyabo kikahandiikwa.

⁷Tindiganyira ebibaakozire, baitu ndibasasura habw'ebibi byabo, na habw'ebibi bya baisenkurubo, MUKAMA nukwo arukugamba ati; habwokuba bakacumikirirra obubbaani hansozi, kandi mwanjumira ha busozi, habweki, ndibafubira nindorra ha bikorwa byabo ebyaira ebi baakozire.

⁸MUKAMA naagamba ati: nk'eviini okwesangwa omu mugimba, abantu bakagamba bati: otagusiisa, habwokuba harumu omugisa, na nyowe nukwo ndikora nti habw'abaheereza bange, boona tindibahwerekereza.

⁹Yakobbo ndimwihamu abaijukuru, kandi Yuda; ndimwihamu abagwetwa ab'ensozi zange abakomerwemu bange nubo baligigweterwa, kandi abairu bange nubo baligiikaramu.

¹⁰Habw'abantu bange abaanserwire, Sarooni eriba iriisizo ly'amagana, kandi ekihanga ky'Akora, kiriba kiikaro ky'ente kubyamamu kiriba ky'abantu bange abanserwire.

¹¹Baitu inywe abaarugireho MUKAMA, abaayeberwe orusozi rwange orurukwera, abaateekaniriize Gaadi emeeza, inywe abanyakwituruura eviini

¹²inywe nimbata ha kitara, inywena muliitwa habwokuba nkabeeta, timwagarukamu, nkagamba timwahurra. Ekiinyeta kibi, nikyo mwakozire, ekimbiihiza, nikyo mwagondeze kukora.

¹³Nikyo MUKAMA Ruhanga arukugambira ati: Abairu bange balirya baitu inywe mulirumwa enjara, abairu bange balinywa, baitu inywe muliitwa iroho; abairu bange balisemererwa, baitu inywe mulihemurwa;

¹⁴Abairu bange balizina baina omutima ogw'omuhimbo, baitu muliteera omuranga habw'omutima ogw'obusaalizi, kandi muliborooga habw'obujune bw'omwoyo.

¹⁵Ibara lyanyu, mulisigira abakomerwemu bange, libe nk'omukyeno, kandi inywe, Ruhanga alibaita; baitu abairu be alibaruka ibara erindi.

¹⁶Habweki, omuntu anyakwesabira omugisa omunsi, Ruhanga ow'amazima aligumuha, n'ogu anyakurahirra omunsi, Ruhanga ow'amazima alimurahirra; habwokuba emihito eyaira eyebere, endugire hamutima.

¹⁷MUKAMA naagamba ati: Ninyija kuhanga iguru erihyaka n'ensi empyaka; ebintu ebyaira tibirigaruka kwijukwa rundi kuteekerezibwa.

¹⁸Musemererwege ebiro byona omuli eki, ekindukuhanga; habwokuba nimpanga Yerusaalemu eyeraikaraga neesemererwa kandi nimpanga abantu baayo abaraikaraga n'omuhimbo.

¹⁹Ndaayesiimiraga omu Yerusaalemu nyenyumirize omu bantu bange; tihaligaruka kuhulirwayo okurra kandi tihaligaruka kubayo omuhito.

²⁰Tihaligaruka kubayo omwana owalimara ebiro bike akafa, rundi kubayo omusaija omukuru ataligurusa; habwokuba, omwana araafaaga ahikize emyaka kikumi, kandi omusiisi anyakuhikize kikumi araakyenwaga.

²¹Abantu balyombeka amaju bagaraalemu; balibyara omusiri gw'emizaabbibbu balye ebijuma byayo.

²²Tibalyombeka, enju ekaraarwamu omuntu ondi; tibalibyara emisiri, ekaliibwa omuntu ondi; habwokuba, ebiro by'abantu bange, biringana nk'ebiro by'omuti, kandi abakomerwemu bange balyekoonyeza ebintu ebi baayekoliire.

²³Tibalitalibanira busa, kandi tibalizaara abaana ab'okubonabona; habwokuba oru ruliba ruzaaro rw'abantu MUKAMA aba yahaire omugisa hamu n'abaana baabo.

²⁴Obu baraabaga batakeesire, ndaagarukamuga, obu baraabaga nibakyabaza, ndaahurraga.

²⁵Omwaga n'omwana gw'entaama birirya hamu, entale erirya obunyansi obwomere nk'ente; enjoka erirya ecuucu. Ebintu ebi, tibirikora kabi kandi tibirihwerekereza kintu ha rusozi rwange rwona orurukwera.