Read Runyoro - rutooro Is 66 Bible Online

Is 66 - Runyoro - rutooro bible

Is 66

¹ MUKAMA naagamba ati: Iguru nikyo kitebe kyange eky'obukama, kandi ensi, nuko katebe ak'ebigere byange, nju ki, ei musobora kunyombekera, kandi kiikaroki ekinsobora kuhuumurramu?

²Ebintu ebi byona, ninyowe nabikozire habweki, ebi byona byange. Baitu omuntu ou nditaho eriiso, nuwe ogu arukwebundaaza ow'omwoyo ogurukweteera, kandi anyakuhurra ekigambo kyange.

³Omuntu anyakwita ente, asisana n'oli anyakwita omuntu; anyakutamba ekyana ky'entaama, asisana n'oli anyakumyora embwa ebikya; anyakuhonga ekihongwa eky'ebyokulya, asisana n'oli anyakuhonga esagama y'empunu; ogu anyakuhonga ekihongwa eky'okwijukirwaho eky'obubbani asisana nk'oli anyakuhaisaniza ekisisani. Abantu abo bakeecwera amagezi gaabo bonka kandi emitima yabo neesiima ebibi byabo;

⁴na nyowe ndibakomera omuhito, mbaleetere ebi batiina muno; habwokuba obunayesire, hatabeho n'omu ayagarukiremu, obu nabalize, batahulirize; baitu bakakora ebimbiihiza, kandi baasiima ebi ntagonza.

⁵Inywe abanyakutiina MUKAMA kandi abanyakumuhurra, muhurre ekigamho kye. Bagenzi banyu abanyakubanoba bakabanaga aheeru habwange, bakagamba bati: MUKAMA akugizibwe, nukwo turole omuhimbo gwanyu; baitu bbo, nubo balihemurwa.

⁶Hurra obwogo obunyakuli omurubuga! Hurra oburukuruga omunju ya Ruhanga, iraka lya MUKAMA arukusasura abanyanzigwa be!

⁷Orubuga rwange orurukwera, nirusisana omukazi, anyakuzara bwango omwana atagenzire omwizarro Omukazi obu akaba atakahikire omu izarro, yazaara, atakarumirwe, akaba azaire ira omwana w'obwojo.

⁸N'oha araahuliireho ekintu nk'eki? N'oha araaboineho ebintu nk'ebi? Ensi eraazarwa omu kiro kimu? Ihanga lirizaarwa omukacu kake kati? Habwokuba Siyoni obu yatandikire kurumwa eti, ahonaaho yazaara abaana baayo.

⁹MUKAMA naagamba ati: nsobora kuhikya omuntu ha kuzaara kandi nkalema kuzaaza? Ruhanga naagamba ati: Nyowe anyakuzaaza, kandi ninyowe ndaigara enda?

¹⁰Mukyanganuke kandi musemererwe hamu na Yerusaalemu, inywe inywena abagonza orubuga runu kandi abanyakurulirirra;

¹¹nimwija kwegondeza omu businge bwayo, nk'omwana oku ayegondeza ha ibere lyanyina.

¹²Habwokuba MUKAMA naagamba ati: Ndimuha obusinge bwingi nk'amaizi g'ekyambu, n'obuguuda bw'amahanga oburukusisana akasaaru akarukugera; mulisisana nk'omwana arukulerwa nyina amuhimbire kandi naamwoleka engonzi.

¹³Nk'omuntu arukuhumuzibwa nyina nanyowe nukwo ndibahuumuza; mulihuumulizibwa Yerusaalemu.

¹⁴Obu mulirora eki kyabaho, mulisemererwa; kiribafoora b'amaani kandi boomeezi. Obu nubwo mulimanya nyowe MUKAMA nkooku nkoonyera abo abanyakumpurra kandi abanyanzigwa bange nkooku mbooleka ekiniga.

¹⁵Habwokuba, MUKAMA aliizira omumurro, n'ebigaali biriija nk'akairiringwa, afubire abo aba yabiihiriirwe.

¹⁶Abantu boona ab'omunsi, abalizooraho omusango, alibafubiza omurro n'ekitara, kandi abantu abaaliita baliba baingi.

¹⁷MUKAMA naagamba ati: Abo abarukweyeza kandi bakeesemeza kutaaha omu misiri nibakuraatira ogu anyakuli hagati, abarukulya enyama y'empunu, n'ebintu ebibi n'embeba, balihwerekererra hamu.

¹⁸Habwokuba mmanyire ebikorwa byabo n'ebiteekerezo byabo, kandi ninyija kusorooza amahanga n'abantu aba buli ngambo baliija barole ekitiinisa kyange.

¹⁹Ndibataho akarorwaho ndibaihamu abaasigaireho, mbatume omu mahanga hali Tarasiisi, Puti Rudi, abarasi b'obuta, hali Tubbali na Yovani, n'omu bizinga ebinyakuli hara muno ebitakahurrahoga ha kurangaanwa kwange kandi abatakabonahoga kitiinisa kyange; abo nubo balimanyisa amahanga ekitiinisa kyange.

²⁰Kandi nubo balireeta bagenzi banyu boona babaihe omu mahanga goona, babaleetere hambaraasi, ha bigaali ba batwarre, ha nyumbu, hangamiya, babahikye harusozi rwange orurukwera Yerusaalemu, nk'Abaisirairi oku baleeta ekihongwa kyabo eky'ebyokulya omunju ya Ruhanga, bakitaire omukikwato eky'ecumi; ebi, nibyo MUKAMA arukugamba.

²¹MUKAMA naagamba ati: Kandi abamu omuli bo, nabo ndibafoora banyakatagara kandi Baleevi.

²²Nk'iguru n'ensi empyaka ebi ndaahanga okubirikaraho habw'obusobozi bwange, abaijukuru baawe n'ibara lyawe, nabyo nukwo biriikaraho biti.

²³MUKAMA naagamba ati: Obu haraabonekaga okwezi okuhyaka kandi buli Sabbato, abantu boona baijege bandamye, Yerusaalemu hanu.

²⁴Obu baraabaga nibagarukayo barole emitumbi ey'abantu abanyemiire; habwokuba, enzito zaabo ezirukubalya tizirifa buli na buli, omurro ogurukubookya nagwo tiguliraazibwa buli na buli. Abantu boona abalibarora, balibanuga.