Read Runyoro - rutooro Is 8 Bible Online

Is 8 - Runyoro - rutooro bible

Is 8

¹Hanyuma MUKAMA akaangambira ati: “Kwata ekyasi ky'ibaale ekikooto, ohandiikeho omu mpandiika eya butoosa, ebigambo binu: ‘Omunyago n'okuseesa kwa bwango.’ ”

²Nyina abakaiso abeesigwa babiri, omu nuwe Huliya nyakatagara na Zekaliya mutabani wa Yeberekiya, nubo baranjurra.

³Nkatemba ekitabu ky'omurangikati, yatwara enda, yazaara omwana w'obwojo, nubwo MUKAMA yangambiire ati: “Omwana ogu, omuruke ibara Omunyago n'okuseesa kwa bwango;

⁴habwokuba omwana ogu atakakuzire akasobora kugamba ati: ‘Taata, rundi mau’ itungo erya Damasiko n'omunyago ogwa Samaliya, biritwarwa omukama w'Asiriya.”

⁵MUKAMA akongera yagamba ati:

⁶“Abantu banu habw'okwanga amaizi aga Siloha aganyakugera mpora, baatiina Rrezini na mutabani wa Rremalia;

⁷habweki, MUKAMA naija kubaleetera amaizi ag'ekyambu, amaingi kandi ag'amaani, nuwe omukama ow'Asiriya n'amahe ge goona aseesire Yuda. Baligenda omumaiso nk'entuunga y'amaizi ey'ekyambu Efuraate, enyakumira emisa yakyo yoona.

⁸Yuda baligisingorra, nk'amaizi amaingi agarukuhingura ibega gakabuutikira buli kintu kyona.” Ruhanga ali na itwe! Amapapa ge aganjurwire, kwijura ensi yaawe.

⁹Inywe amahanga mweteerane nimutiina! Muhurre, inywe ebicweka ebya hara eby'ensi, mweteekanize murwane, baitu mutiine! Ego mweteekanize baitu mutiine!

¹⁰Muhikaane muhanuule, baitu empanura yanyu terigira eki erigasa; mubaze byona ebi murukwenda kubaza! Baitu ebi murakabaza byona bya busa, habwokuba Ruhanga ali na itwe.

¹¹MUKAMA akampabura n'obusobozi bwe obw'ekitiinisa, yantanga okutatoma omuhanda ogu bakaba batomeze. Akagamba ati:

¹²“Otalyetaba n'abantu omu mpanuura zaabo, kandi otalitiina ebintu ebi batiina.

¹³MUKAMA ow'amahe nuwe otemuga ekitiinisa, nuwe otiinege nuwe oyekangege.

¹⁴Habw'obuhikiriire bwange obunyakutiinisa, ninsisana ibaale abantu eri beesiitaraho; ndi nk'omutego ogulikwata abantu ab'amakama ga Yuda, Isirairi n'abantu aba Yerusaalemu.

¹⁵Baingi abalyesiitara ha ibaale eri; baligwa bahendeke; balikwatwa omutego banyagwe.”

¹⁶Inywe abeegesibwa bange, mukwate kandi mugumye ebigambo binu Ruhanga ebi yangambiire.

¹⁷Ninyija kutegereza MUKAMA, ayayeserekere enju ya Yakobbo, kandi ndaikaraga nimwesiga.

¹⁸Nyowe n'abaana MUKAMA aba yampaire, tuli burorwaho kandi tuli byamahano omu Isirairi ebyakozirwe MUKAMA ow'amahe anyakwikara ha rusozi Siyoni.

¹⁹Kandi abantu obu balibagamba bati: Mugende mwekaguze hali abo abanyakubandwa emizimu n'abafumu abanyakubaza nibazinda iraka muti: “Abantu tibasemeriire kwekaguza hali Ruhanga wabo? Kibahikiriire okwekaguzaaho abafu, nibabeekaguzaaho aboomeezi?

²⁰Mubagarukemu muti: Muhurre MUKAMA ebi arukubeegesa! Muleke kuhurra abo abanyakubandwa emizimu ebi barukubagambira, tibiribarugiramu karungi na kamu.”

²¹Abantu baliraba omunsi bataina maani kandi nibarumwa enjara. Habw'okurumwa enjara n'okukwatwa ekiniga, balikondereza MUKAMA waabo na Ruhanga wabo.

²²Balirengaho kuraramira haiguru rundi kurora hansi, tibalirora kintu kindi eky'obujune n'omwirima, omwirima katiinisa ogu baliba nibasindikwamu.