Read Runyoro - rutooro Is 9 Bible Online

Is 9 - Runyoro - rutooro bible

Is 9

¹Baitu tihalibaho omwirima hali omwisiki ogu akaba ali omu bujune. Omubiro byaira akagayisa ensi ya Zebuluuni n'ensi ya Nafutaali, baitu omu biro bya hanyuma aligifoora y'ekitiinisa baitu n'enyanja nseeri ya Yorudaani omu Galiraaya y'abaamahanga.

²Abantu abaagenderaga omu mwirima, bajweriirwe muno omwezi. Abo abaikaraga omunsi ey'omwirima kasira, bajweriirwe omusana.

³Okanyisize ihanga, olyongiire omuhimbo; abantu nibakyanganuka omumaiso gawe nkooku bakyanganuka obu baba nibagesa nkooku basemererwa obu baba nibabagana omunyago.

⁴Habwokuba okacwa ekikoligo ekikaba nikibamigiriza, n'omwigo ogwabateeraga amabega. Okasingura ihanga eryabonabonesaaga, kandi erikaba lyetungiire abantu, nkooku wasingwire ira ihe ery'Abamidiani.

⁵Habwokuba buli nkaito yoona ey'omuserikale arukurubata, ei akaba ajwaire omu bulemu, na buli kijwaro kyona ekyaibikirwe omu sagama biryokebwa omurro.

⁶Habwokuba omwana atuzaalirwe, omwana atuhairwe; kandi omwana ogu, nuwe aliba mulemi waitu; alirukwa ibara “Omuhi w'amagezi anyakukunaaza, Ruhanga ow'obusobozi, Isiitwe ow'ebiro byona Isiitwe Atahwaho, Omulemi ow'obusinge.”

⁷Obusobozi ow'obukama bwe, buraikaraga nibweyongera alirema ali mugwetwa w'omukama Daudi, naagumisa obusobozi bwe ha kukora ebihikire na ha bwinganiza, okuruga hati okuhika ensi okuhwaho. MUKAMA ow'obusobozi bwona, amaliriire kukora ebi byona.

⁸MUKAMA atumireho Yakobbo, baitu obukwenda nibwija kuhikaho Isirairi.

⁹Abantu ba Isirairi boona, omuntu weena anyakwikara omu rubuga Samaliya, alimanya MUKAMA nkooku akozire kinu. Hati, nibeekuliiriza kandi nibeehemba nibagamba ngu:

¹⁰“Amaju ag'amatafaali gaseesekere baitu turaayombekamu ag'amabaale. Emiraba ey'emisikamooli ekatemwa yagwa, baitu omu kiikaro kyayo nitwija kugarramu emikogoto emirungi mali.”

¹¹Habweki, MUKAMA aimukize abazigu ab'okubarwanisa aleesire abanyanzigwa baabo.

¹²Abasiriya aba Burugaizooba n'Abafirisiti aba Bugwaizooba beeteekaniize kuhwerekereza Isirairi. Habwokuba MUKAMA takahoirweho kiniga akyagoroire omukono afubire.

¹³Abantu ba Isirairi bakanga kweteera; MUKAMA ow'obusobozi bwona noobu yabafubiire, nabwo batamugarukeho.

¹⁴Nikyo MUKAMA alicwera ha Isirairi omutwe n'omukira, itaagi ry'omukindo n'orubingo omu kiro kimu.

¹⁵Omuntu omukuru kandi ow'ekitiinisa nugwo omutwe, kandi omurangi arukwegesa ebisuba nugwo omukira.

¹⁶Habwokuba abo abanyakwebembera abantu banu babahabisa, kandi abo abeebemberwa bahwerekerra.

¹⁷Nikyo MUKAMA atarukusiimira basigazi baabo, nikyo atarukuganyirra enfuuzi n'abafaakati baabo; habwokuba buli muntu tarukutiina Ruhanga kandi nkozi y'ebibi, kandi buli muntu naabiiha ebisuba. Ebi byona nibyo birukukwasa MUKAMA ekiniga, akaikara agoroire omukono afubire.

¹⁸Habwokuba obubi bw'abantu nibwaka nk'omurro, nibucwekereza amakerre n'amahwa, nibwokya amajumba ag'ekibira, nigarugwamu ekiika.

¹⁹Ensi ehiire habw'ekiniga kya Ruhanga ow'amahe, abantu nubo bali nk'enku ezinyakunagwa omu murro; busaho muntu n'omu arukuganyira mutaahi we.

²⁰Omunsi yoona abantu nibakookooba kandi nibalya buli kyokulya eki bakasangire, baitu tibarukwiguta. Nibanyaga ebyokulya ebya ha mukono ogw'obumoso, baitu tibakuleka kurumwa enjara; nibakatura ebya ha mukono ogw'obulyo, baitu tibarukwiguta; buli omu naajunjubura enyama ya mutaahi we,

²¹Manaase nalya ey'Efuraimu, Efuraimu nalya eya Manaase, kandi abo bombi nibarwanisa Yuda, habwebi byona, MUKAMA takahoirweho kiniga, akyagoroire omukono afubire.