Read Runyoro - rutooro Lev 1 Bible Online

Lev 1 - Runyoro - rutooro bible

Lev 1

¹MUKAMA akeeta Musa yabaza na uwe ali omu Heema ey'okutangatanganiramu, yamugambira ati:

²Gambira abantu ba Isirairi oti: Omuli inywe, obu haraabahoga omuntu arukuleetera MUKAMA ekihongwa, akiihege omu igana ery'ente, ery'entaama rundi ery'emburabuzi.

³Omuntu ogu obu araabaga aleesire ente kuba kihongwa eky'okwokya, aleetege enimi etanyina kamogo; agiheereyo ha mulyango ogw'Eheema ey'okutangatanganiramu, nukwo MUKAMA amusiime;

⁴ate omukono gwe ha kihongwa eki eky'okwokya, nukwo kiikirizibwe okumuleherra ebibi.

⁵Nubwo, enimi egi, agiitire MUKAMA; banyakatagara batabani ba Arooni baleete esagama yayo bagimiisire itambiro erinyakuli ha mulyango gw'Eheema ey'okutangatanganiramu balyehinguliriize.

⁶Omuntu ogu abaage ekihongwa kye eky'okwokya, akiihe emyanya;

⁷batabani ba Arooni nyakatagara, bahembe omurro ha itambiro, bahingikeho enku;

⁸emyanya y'ente, omutwe n'ebisajwa, ebintu ebi babite ha murro ogunyakuli ha itambiro;

⁹baitu ebyenda n'ebirenge byayo abyokye. Ebi byona, nyakatagara abyokeze ha itambiro, eki nikyo kihongwa ekyokeze ekirukuboyera kurungi MUKAMA.

¹⁰Ekihongwa kye obu kiraaba kiri ky'entaama rundi ky'emburabuzi ahonge ekihaya ekitanyina kamogo;

¹¹agiitire MUKAMA, ha bukiizi bw'emoso obw'itambiro, banyakatagara batabani ba Arooni esagama yakyo bagimiisire itambiro balyehingulirize.

¹²Kihonga, mpaya egi agiihe emyanya, enyama egi, hamu n'omutwe n'ebisajwa, nyakatagara abihingike ha nku ez'omurro ogunyakuli ha itambiro;

¹³baitu ebyenda n'ebirenge byayo abyogye. Ebi byona nyakatagara abihonge kandi abyokeze ha itambiro, eki nikyo kihongwa ekyokeze ekirukuboyera kurungi MUKAMA.

¹⁴Ekihongwa eky'okwokya, kuba kiba kiri kinyonyi, ahonge enduka rundi amaiba amato.

¹⁵Nyakatagara, ekihongwa eki, akireete ha itambiro, akihotole ebikya, akicweho omutwe, agwokeze ha itambiro;

¹⁶ekyadundu kyayo n'ebyoya, abinage ha rubaju orwa Burugaizooba obw'itambiro nambere baseesa iju;

¹⁷agyatirre agisigeho amapapa gaayo, kyonka atagyahukanizaamu habiri. Ekihongwa eki, nyakatagara akyokeze ha itambiro, ha nku ezinyakuli ha murro; eki nikyo kihongwa ekyokeze ekirukuboyera kurungi MUKAMA.