Read Runyoro - rutooro Lev 13 Bible Online

Lev 13 - Runyoro - rutooro bible

Lev 13

²“Omuntu obu araabaga n'akantu akanyakuzimbire ha rususu orw'omubiri gwe, rundi naayatika omubiri, rundi anyina ibara likarugwamu endwara ey'ebigenge ha rususu rw'omubiri gwe, nubwo araaleetwaga hali Arooni nyakatagara rundi hali omu ha batabani ba nyakatagara.

³Kandi nyakatagara ayekebiije ekiikaro ekinyakurwaire ha rususu rw'omubiri, kakuba akooya k'omubiri akanyakuli ha kacweka akanyakurwaire kaba kahindukire nikeera, ekihooya kikazooka kyerimire omu rususu rw'omubiri gwe, buli egi ndwara y'ebigenge; kakuba nyakatagara amwetegereza, amurangege nkooku arukuzirwa.

⁴Baitu kakuba akacweka akanyakurwaire ha rususu rw'omubiri gwe kaba nikeera kandi nikazooka kateerimire kiina n'akooya akanyakurumu katahindukire kakeera, nyakatagara alindege omuntu ogu anyakurwaire, amulindege ali wenka okumara ebiro musanju,

⁵Nubwo amwekebiije ha kiro ekya musanju, kakuba arora endwara tehindukire kandi tekanyire ha mubiri, ayongere amulinde wenka ebiro musanju ebindi;

⁶ayongere amurole ha kiro kya musanju, kandi ekicweka ekirwaire kakuba kiba nikiiragura, kandi endwara teyeyongiire ha rususu rw'omubiri, nubwo amurange nkooku atarukuzirwa, ndwara y'okwatika omubiri kwonka, omurwaire ayogye ebyokujwara bye nukwo aleke kuzirwa.

⁷Baitu kakuba obuhooya bugenda nibukanya ha rususu rw'omubiri, omurwaire amazire kweyoleka nyakatagara habw'okusemezibwa kwe, agaruke ayeyoleke nyakatagara;

⁸nyakatagara amwekebiije, ekihooya kakuba kiba kigenzire nikirya orususu, amurange nkooku arukuzirwa, buli eki kigenge.

⁹“Omuntu obu akwatwa bwango ebigenge, bamuleetere nyakatagara,

¹⁰nyakatagara amwekebiije; kakuba hazooka akazimba akarukwera ha rususu rw'omubiri, kahindwire akooya kaayera, kandi akazimba ako karumu amasira,

¹¹buli ebi bigenge ebitarukukira omu rususu rw'omubiri gwe, nyakatagara amurangirre nkooku arukuzirwa, amwikazeege wenka, habwokuba naazirwa.

¹²Kakuba ebigenge bituruka, hanyuma bikamara omubiri gwona ogw'omuntu anyakurwaire okuruga ha mutwe okuhika ha bigere nkooku nyakatagara araabaga arozire,

¹³ayekebiijege, kakuba ebigenge biba biijwire omubiri gw'omuntu ogu, nyakatagara amurangirrege nkooku arukuzirwa, habwokuba orususu rwona ruhindukire rwayera, obu aliba atakyazirwa.

¹⁴Baitu obu azookwaho ekizimba ekinyakurumu amasira, obu afooka arukuzirwa.

¹⁵Nyakatagara ayekebiije ekizimba eki ekinyakurumu amasira, amurangirre nkooku arukuzirwa, ekizimba eki ekirumu amasira kimuleetera kuzirwa, habwokuba nibyo bigenge.

¹⁶Ekizimba eki, kakuba kirugwamu ekihooya eky'erangi erukwera, omurwaire aije hali nyakatagara.

¹⁷Nyakatagara amwekebiije, ebizimba obu biraaba birugirwemu ebihooya ebyerangi erukwera, nubwo nyakatagara arangirre omuntu anyakurwaire nkooku atarukuzirwa, habwokuba tanyina kantu ha mubiri gwe.

¹⁸“Omu rususu rw'omubiri gw'omuntu obu habamu ekizimba ekinyakukizire,

¹⁹omu kiikaro ky'ekiturugunyu hakazimbamu ekintu ekirukwera rundi akahere akarukutukulikana, ako koolekwe nyakatagara

²⁰Nubwo nyakatagara akeekebiije, kakuba arora keerimire kataahire omunda y'orususu, kandi akooya akanyakurumu kahindukire nikeera, aho nyakatagara amurangirre nkooku arukuzirwa, endwara ei ainayo y'ebigenge, endwara egi erugire omu kizimba.

²¹Baitu nyakatagara kakuba agyekebiija akasanga akooya akanyakumeziremu katarukwera, ekihooya kiteerimire omu rususu rw'omubiri, kandi nikyeerrukana, nyakatagara amulindege ali wenka kumara ebiro musanju.

²²Kakuba ekihooya kigenda nikirya orususu rw'omubiri, aho amurangirre nkooku arukuzirwa, oburwaire nibukyatandika.

²³Baitu ekihooya kakuba kiikara nkooku kiri, kitaliire rususu egi neeba eri nkojo y'ekizimba, nyakatagara amurangirre nkooku atarukuzirwa.

²⁴“Rundi orususu rw'omubiri obu ruraaba ruhiire, enyama empyaka enyakumezire omu kicweka ekihyereriire akazimba akakutukuramu rundi akeera,

²⁵nyakatagara agyekebiije, kakuba akooya akanyakumezire omu kihooya kaba kahindukire nikeera kandi kyerimire enyanga, obu ebi bigenge birugire ha kuhyererra, nyakatagara amurangirre nkooku arukuzirwa, egi ndwara y'ebigenge.

²⁶Baitu nyakatagara kakuba arora ekihooya, akooya akanyakuli omukihooya katarukwera kandi ekihooya kiteerimire nyanga omu rususu, baitu nikinanata, amulindege ali wenka kumara ebiro musanju,

²⁷amwekebiije ha kiro ekya musanju kakuba ekihooya kiba nikyeyongera kugaliha ha rususu, nabwo nyakatagara amurangirre nkooku arukuzirwa, egi ndwara y'ebigenge.

²⁸Baitu ekihooya kakuba kiba kiikaire nkooku kyali, kitarukweyongera kugaliha ha rususu rw'omubiri kandi nikinanata, okuzimba kukaruga omu kuhyererra, nyakatagara amurangege nkooku atarukuzirwa, habwokuba oru ruhyora orwalesirwe okuhyererra.

²⁹“Omusaija rundi omukazi obu araarwaraga ekihooya omu mutwe, rundi ha itama,

³⁰nyakatagara akirolege; kakuba kizooka kitaahire orususu kandi akooya akanyakurumu ka kyenju kandi katanyina maani aho amurangirre nkooku arukuzirwa, eki kigenge ky'omu mutwe rundi kya ha itama,

³¹kakuba nyakatagara ayekebiija endwara ey'ekisaababa kikazooka kitataahire omu rususu rw'omubiri kandi kitanyinamu kooya akarukwiragura, aho alindege omuntu ogu anyakurwaire ekisaababa okumara ebiro musanju,

³²ha kiro ekya musanju, nyakatagara ayekebiije endwara, ekisaababa eki kiraaba kiteeyongiire, kugaliha kandi kitarumu kooya aka kyenju, kandi kitadubwire rususu rw'omubiri,

³³omurwaire ayemwe, baitu ekisaababa aleke kukimwa, kandi nyakatagara alindege omuntu ogu anyakunyina ekisaababa, amulinde ali wenka okumara ebiro musanju ebindi.

³⁴Ha kiro ekya musanju, ayekebiije ekisaababa, kakuba kiba kiteeyongiire kugaliha ha rususu rw'omubiri kandi kitarudubwire, obu nubwo nyakatagara amurangege nkooku atarukuzirwa, omurwaire ayogyege ebijwaro bye, buli takyazirwa.

³⁵Baitu ekisaababa kakuba kigaliha ha rususu rw'omubiri amazire kusemezibwa,

³⁶obu nyakatagara amwekebiije, kakuba ekisaababa kiba kyeyongiire kugaliha ha rususu rw'omubiri, nyakatagara aleke kugenderra muno kuserramu akooya aka kyenju, omuntu ogu afookere ira arukuzirwa.

³⁷Baitu kakuba arora ekisaababa kiri nkooku kikaba kiri, kandi hameziremu akooya akarukwiragura, endwara egi neeba ekizire, omurwaire naaba atakyazirwa, nyakatagara amurangirre nkooku atarukuzirwa.

³⁸“Omusaija rundi omukazi, omubiri gwe obu guraaterwaga ebintu ebirukwera,

³⁹nyakatagara amwekebiije, ebintu ebi obu biraaba nibyera kandi nibigenda nibihwerra, eri ndwara y'obuhere kwonka eturukire omu rususu, tarukuzirwa.

⁴⁰“Kakuba isoke ly'omuntu likunguuka ha mutwe gwe, aba acwekere oruhara, tarukuzirwa.

⁴¹Kandi isoke ry'omuntu kakuba licweka ha buso bwe na ha ruhorohozi, aba acwekere oruhara orw'omumaiso, tarukuzirwa

⁴²Baitu omuntu kakuba arwara ekisaababa ekirukwera omu ruhara orw'enyuma rundi orw'omumaiso, buli ebi bigenge ebirukuturuka omu mutwe ogunyakukunguukirwemu isoke rundi omu ruhara rwe.

⁴³Nyakatagara amwekebiije, akantu akanyakuzimbire obu karaaba nikananata, nikazooka ha mutwe gwe nk'ekigenge ekinyakuba ha rususu rw'omubiri.

⁴⁴Omuntu ogu buli mugenge, naaba naazirwa, nyakatagara amurangirre nkooku arukuzirwa, endwara ye eri ha mutwe.

⁴⁵“Omugenge anyakunyina endwara egi, ajwale engoye ezinyakutemukire, aleke kuteera isoke, aswekerre omunwa gwe ogw'eruguru kandi atoke ati: ‘Ninzirwa, ninzirwa.’

⁴⁶Araazirwaga obusumi obu alimara akyarwaire; naazirwa, aikalege wenka aheeru y'orukande.

⁴⁷“Endwara y'ebigenge obu eraaba eri omu kyokujwara, rundi ky'ebyoya rundi kya kitaani,

⁴⁸ekyokujwara eki obu kiraaba kiri kya kitaani enyakurukirwe, rundi ky'ebyoya, rundi endwara egi eri omu rususu,

⁴⁹endwara kakuba eyoleka erangi kibabibabi, ya kyenju rundi kigaajugaaju, ha kijwaro ky'omuntu buli ekintu eki kinyina endwara y'ebigenge, ekyokujwara kisemeriire kukyoleka nyakatagara.

⁵⁰Nyakatagara ayekebiije endwara, ekintu eki ekinyakunyina endwara, akyahule okumara ebiro musanju,

⁵¹hanyuma ha kiro ekya musanju, ayekebiije endwara. Endwara obu eraaba eyeyongiire omu kyokujwara eki, omu kintu ekinyakurukirwe rundi omu rususu, orususu oru noobu ruraaba nirukozibwa mulimo ki, endwara y'ebigenge ebi neetuurra, ekijwaro eki nikizirwa.

⁵²Nyakatagara akyokye, noobu kiraaba kirukirwe, kisogoberwe ky'ebyoya rundi kya kitaani rundi kintu kyona ekinyakukozirwe omu rususu.

⁵³“Kakuba nyakatagara akebera akarora oburwaire buteeyongiire omu kyokujwara eki, omu huuzo zakyo ez'obwemi rundi ez'obukiika, rundi omu ekijwaro kyona ekinyakukozirwe omu rususu,

⁵⁴aho aragire abantu boogye ekintu eki, ekinyakurumu endwara, akite ha rubaju kimaleyo ebiro musanju ebindi;

⁵⁵agaruke akebere ekyokujwara ekinyakurumu endwara kimazire kwogebwa. Aho nambere hali endwara noobu haliba hatahindukire, endwara noobu eriba eteeyongiire, ekijwaro eki buli kiriba nikizirwa; mukyokye ebisorrokoko by'ebigenge noobu biraaba biri enyuma rundi omumaiso.

⁵⁶“Baitu nyakatagara kakuba akebera ekyokujwara eki kimazire kwogebwa, akarora ekicweka endwara ha yahikire hairagwire, ekicweka eki akisale omu kyokujwara, rundi omu rususu oru.

⁵⁷Kandi endwara kakuba ezooka neeyeyongera, omu kyokujwara eki rundi omu kintu kyona eky'orususu, ekintu eki ekinyakurumu endwara akyokye n'omurro.

⁵⁸Baitu ekyokujwara rundi ekintu kyona eky'orususu, ekyamazire kwogya, endwara ekakihwamu, kyogebwe obwa kabiri, nukwo kireke kuzirwa.”

⁵⁹Kinu nikyo kiragiro ekirukukwata ha ndwara y'ebigenge ebinyakuli omu kyokujwara eky'ebyoya by'entaama rundi ekya kitaani, rundi omu kintu kyona eky'orususu, ekinyakusigikiirweho kucwamu ngu hati ekijwaro kinu tikirukuzirwa rundi nikizirwa.