Read Runyoro - rutooro Lev 14 Bible Online

Lev 14 - Runyoro - rutooro bible

Lev 14

²“Kinu nikyo kiragiro ekirukukwata ha mugenge ha kiro eki araarangirwaga atakyazirwa. Omugenge atwarwege hali nyakatagara.

³Nyakatagara ararugaga omu rukande amwekebiije, kakuba arora nkooku akizire,

⁴aragire baleete ebinyonyi bibiri ebyomeezi kandi ebirungi, omuti omukogoto, engoye ezirukugaajuka n'akaganda k'omweza.

⁵Nyakatagara aragire abantu baite ekimu ha binyonyi biri, bakisarre ha minwa y'ekinaga ekinyakurumu amaizi ag'ekisaaru.

⁶Nyakatagara atwale ekinyonyi ekinyakusigaireho ekikyali kyomeezi, omuti omukogoto, engoye ezirukugaajuka n'akaganda k'omweza, abiibike omu sagama y'ekinyonyi ekinyakwiitiirwe ha minwa y'ekinaga ekinyakurumu amaizi g'ekisaaru.

⁷Nyakatagara agimiisire emirundi musanju omuntu arugekwenda kurangirirwa ngu takyazirwa, amurangirre abantu nkooku akiziibwe, ataisule ekinyonyi ekyomeezi kihuurruke kigende omu bwerre.

⁸Ogu arukwija kutambirwa, ayogye ebyokujwara bye, ayemwerre kimu isoke, ayoge ayere nukwo aleke kuzirwa, obu araamara ebi, nukwo agaruke omu rukande ha yarugire, araale aheeru y'Eheema ye okumara ebiro musanju.

⁹Ha kiro ekya musanju, ayemwe isoke lyona, ayemwe omuleju n'ebisigi, ayemwe akooya koona akanyakumuli ha mubiri. Hanyuma, ayogye ebyokujwara bye, na uwe wenka ayoge, omukoro ogu nugwo guraamwolekaga nkooku atakyazirwa.

¹⁰“Ha kiro ekya munaana, atwale ebyana by'entaama ebihaya bibiri ebitanyina kamogo, n'empaya etanyina kamogo enyakuhikize omwaka gumu, ensaano enyakuniinuukire kurungi ey'ekihongwa eky'ebyokulya erukuhikya kiloguraamu isatu, ezinyakutabwirwemu amagita, g'omuti gwa oliva n'amagita kwonka agarukuhikya kimu kyakasatu ekya lita.

¹¹Nyakatagara arukweza omuntu ogu, amute omumaiso ga MUKAMA, omu mulyango ogw'Eheema ey'okutangatanganiramu hamu n'ebintu ebi.

¹²Nyakatagara akwate ekimu ha bihaya by'entaama ebibiri, akitambe, kibe kihongwa eky'okuganyiza ebibi, akitambe hamu na kimu kyakasatu ekya lita ey'amagita abiimukyaimukye, bibe bihongwa ebiimukyaimukiriziibwe MUKAMA.

¹³Entaama egi, agiitire Omukiikaro Ekirukwera, nambere baitira entaama ey'ekihongwa eky'okuganyiza ebibi n'ey'ekihongwa ekinyakwokebwa; habwokuba entaama enyakutambwa habw'okuganyiza ensobi, etwarwa nyakatagara nk'egi enyakuheebwayo habw'okuganyiza ebibi; eba ntaama erukwera mali.

¹⁴“Nyakatagara akwate ha sagama ey'ekihongwa ekinyakuganyiza ebibi, agisiige ha nsonga ey'okutu okw'obulyo okw'omuntu arukwija kwezibwa, ha kyara ekisaija eky'omukono ogw'obulyo, na ha kyara ekisaija eky'ekigere eky'obulyo.

¹⁵Hanyuma, nyakatagara akwate ha amagita gali, agaseese omu kiganja eky'omukono gwe ogw'emoso,

¹⁶aibikemu orukumo rwe orw'omukono ogw'obulyo, agamiise emirundi musanju omumaiso ga MUKAMA.

¹⁷Kandi amagita agasigaireho nyakatagara agasiige ha nsonga y'okutu okw'obulyo, okw'ogu arukwija kusemezibwa, ha kyara ekisaija eky'omukono gwe ogw'obulyo, ha kyara ekisaija eky'ekigere kye eky'obulyo, nkooku yamusiigire esagama ey'ekihongwa eky'okuganyiza ekibi.

¹⁸Kandi agasigaireho, agaseese ha mutwe gw'ogu arukwija kwezibwa, hanyuma amusabire hali MUKAMA.

¹⁹Nyakatagara ahonge ekihongwa eky'okuganyiza ekibi, asabire omuntu ogu arukwija kurangirrwa nkooku atakyazirwa, hanyuma aite entaama ey'ekihongwa eky'okwokya,

²⁰ahongere ha itambiro ekihongwa eky'okwokya hamu n'ekihongwa eky'ebyokulya. Omuntu ogu, nyakatagara amusabire, nukwo arangiirwe nkooku atakyazirwa.

²¹“Baitu omuntu ogu kakuba abaire ali munaku, atanyina bingi ebi asobora kuhayo, aleete ekyana ky'entaama ekihaya kimu, nikyo kibe kihongwa eky'okwihwaho ekibi, na kiloguraamu emu ey'ensaano enyakuniinuukire etabwirwemu amagita, ebi hamu na kimu kyakasatu ekya lita y'amagita ag'omuti gwa oliva bibe kihongwa ky'ebyokulya.

²²Omuntu ogu ayongere aleete, n'enduka ibiri rundi amaiba amato abiri, kyona eki asobora kutunga; erimu hali amaiba ago, niryo libe kihongwa eky'okuganyiza ebibi, erindi libe kihongwa eky'okwokya.

²³Ha kiro ekya munaana, ebintu ebi abireetere nyakatagara, nukwo arangirirwe nkooku atakyazirwa ha mulyango ogw'Eheema ey'okutangatanganiramu, omumaiso ga MUKAMA;

²⁴Nyakatagara akwate ekyana ky'entaama eky'okuganyiza ekibi, hamu n'ekibindi ky'amagita, abiimukyaimukye, bibe kihongwa eky'okwimukyaimukya omumaiso ga MUKAMA.

²⁵Kandi aite ekyana ky'entaama eky'ekihongwa eky'okuganyiza ekibi, aiheho esagama, agisiige ha nsonga ey'okutu okw'obulyo okw'ogu arukwija kusemezibwa, na ha kyara ekisaija eky'omukono gwe ogw'obulyo, na hakyara ekisaija eky'ekigere eky'obulyo.

²⁶Akwate amagita, agaseese omu kiganja eky'omukono gwe ogw'emoso;

²⁷agamiise n'orukumo rwe orw'omukono ogw'obulyo, emirundi musanju omumaiso ga MUKAMA;

²⁸akwate ha magita agaanyina omu ngaro, agasiige ha nsonga ey'okutu okw'obulyo okw'ogu arukwija kusemezibwa, ha kyara ekisaija eky'omukono gwe ogw'obulyo, na ha kyara ekisaija eky'ekigere kye eky'obulyo, hali honyini nambere haasesirwe esagama ey'ekihongwa eky'okuganyiza ebibi.

²⁹Kandi amagita agandi nyakatagara agaasiigaize omu ngaro, agaseese ha mutwe gw'ogu arukwija kwezibwa, amusabire omumaiso ga MUKAMA.

³⁰Kandi omuntu ogu aheyo kyona ekyasobora kutunga, enduka rundi amaiba;

³¹ekimu hali byo, kibe kihongwa eky'okwihwaho ekibi, ekindi kibe kihongwa eky'okwokya, bigendere hamu n'ekihongwa eky'ebyokulya; nukwo nyakatagara asabire omuntu ogu arukwezibwa hali MUKAMA.

³²Eki nikyo kiragiro ekyateerirweho omugenge, atarukusobora, kuhayo ebihongwa nk'eby'abandi abarukumukira nukwo ayezibwe.”

³³MUKAMA yagambira Musa na Arooni ati:

³⁴“Obu mulihika omunsi Kanaani ei ndukwija kubaha ebe yanyu mali nkaleeta endwara ey'ebigenge omunju enyakuli omunsi yanyu egi,

³⁵nyineeka ow'enju egi, agendege agambire nyakatagara ati: ‘Enju yange neesisa nk'enyakutaahirwemu endwara.’

³⁶Aho nyakatagara aragire, baihe abantu omunju egi, uwe atakagenzire kwetegereza endwara egi, nukwo byona ebinyakuli omunju omu bireke kwetwa bibi; hanyuma nukwo agende arole enju egi.

³⁷Ayetegereze kurungi endwara egi, obu eraaba eri omu bisiika by'enju, enyina amabara aga kijubwa n'agarukunanata, kandi kakuba ezooka ebitaahire muno omunda,

³⁸nubwo nyakatagara aruge omunju egi agikinge, emale ebiro musanju etakakingwirwe.

³⁹Agaruke ha kiro kya musanju arole, kakuba arora endwara emazire ebisiika by'enju yoona,

⁴⁰obu aragire abantu, amabaale aganyakutaahirwemu endwara bagaihe omu bisiika, baganage aheeru y'orubuga omu kiikaro ekinyakunagwamu ebintu ebirofu kandi aragire

⁴¹enju yoona bagiharagate omunda. Byona ebi baharagasire, babinage aheeru y'orubuga omu kiikaro ekinyakuseeswamu ebintu ebirofu;

⁴²nukwo bakwate amabaale agandi, bagagarre omu kiikaro kya gali; aleete: omusenyi ahuhule enju ekorwe buhyaaka.

⁴³“Endwara egi kakuba egaruka omunju omu, bamazire kugiihamu amabaale, bagiharagasire kandi bagigarwireho omusenyi ogundi,

⁴⁴nabwo nyakatagara agende arole; kakuba asanga endwara emazire enju yoona, buli enju egi etaahirwemu ebigenge eby'akabi; yoona esiisikaire.

⁴⁵Enju egi aragire bagiseese, amabaale gaayo, embaaho, obudongo, omusenyi gwayo gwona, babiihe omu rubuga, babinage omu kiikaro eky'okunagwamu ebintu ebirofu.

⁴⁶Kandi ogu anyakutaaha enju egi enyakukingire, araabaga murofu okuhika omu rwiririzi;

⁴⁷kandi ogu araabyamaga omunju egi ayogyege ebyokujwara bye; n'ogu araaliiramuga ebyokulya, na uwe ayogyege ebyokujwara bye.

⁴⁸“Baitu nyakatagara kakuba aija akakebera akasanga endwara eteeyongiire muno omunju, okuruga enju obu yakozirwe buhyaaka, aho arangirre ngu; ‘enju enu, hati nungi, habwokuba endwara eyekaba erumu ekizire.’

⁴⁹Kandi okusemeza enju egi, akwate ebinyonyi bibiri n'omuti ogw'omukogoto,

⁵⁰aite ekimu ha binyonyi, akiitire omu kibindi ha ruguru y'amaizi, agarukugera,

⁵¹akwate omuti guli ogw'omukogoto engoye ezirukunanata, hamu n'ekinyonyi ekyomeezi, abiibike omu sagama ey'ekinyonyi ekinyakwisirwe, n'omu maizi agarukugera, amiisire enju emirundi musanju.

⁵²Enju nukwo agisemeze ati, naayekonyeza esagama y'ekinyonyi, n'amaizi agarukugera, ekinyonyi ekyomeezi, omuti omukogoto, n'engoye ezirukunanata.

⁵³Ekinyonyi ekyomeezi, akitaisule kiruge omu rubuga, kigende omu kisaka; enju egi nukwo agisabire ati, nukwo esemere.”

⁵⁴Eki nikyo kiragiro ekyatairweho habw'endwara ey'ebigenge: ey'obuhere,

⁵⁵ey'ebigenge, eby'omu kyokujwara rundi eby'omunju,

⁵⁶ey'obuzimba, ey'ebikoko n'ey'ebisaababa;

⁵⁷okugumya ekintu obu kiraaba kisiisikaire rundi tikisiisikaire. Eki nikyo kiragiro ekyatairweho habw'ebigenge.