Read Runyoro - rutooro Lev 15 Bible Online

Lev 15 - Runyoro - rutooro bible

Lev 15

¹MUKAMA akagambira Musa na Arooni ati:

²“Mugambire abantu ba Isirairi ngu: Omusaija weena anyakurugwa amasira omu busaija, amasira ago gaba kintu ekirukuzirwa.

³Kinu nikyo kiragiro ekirukubaza ha kuzirwa kw'omusaija anyakurugirwe amaizi omu busaija; amasira noobu garaaba nigakyaruga omu mubiri gwe rundi tigakyarugamu, omusaija ogu, aba naazirwa.

⁴Ekitabu kyona omusaija arukurugwamu amasira abyamaho, kisiisikara; buli kintu eki aikarraaho, nakyo kisiisikara.

⁵Wena anyakukwata ha kitabu ky'omuntu ogu, azirwa okuhika rwebagyo, ayogye ebyokujwara bye, na uwe wenka ayoge.

⁶Wena araikarraga ha kintu ekinyakwikaliirweho omuntu ogu arukurugwamu amasira, araabaga murofu okuhika akairirizi, ayogye ebyokujwara bye na uwe wenka ayoge.

⁷Kandi wena anyakukwata ha mubiri gw'ogu arukurugwamu amasira araabaga murofu okuhika akairirizi, asemeriire ayogye ebyokujwara bye, na uwe wenka ayoge.

⁸Omusaija ogu arukurugwamu amasira, kakuba acwera amacwanta omuntu ondi atanyina burofu ogu kicwerwa macwanta araikaraga ali murofu okuhika akairirizi, asemeriire ayogye ebyokujwara bye, na uwe wenka ayoge.

⁹Entebe yoona ey'ekiiruka enyakwikalirweho omusaija ogu arukurugwamu amasira, buli egi esiisikaire.

¹⁰Omuntu wena anyakukwata ha kintu ekinyakuli hansi y'ogu arukurugwamu amasira, araabaga murofu okuhika akairirizi; kandi anyakwetweka ekintu eki, na uwe araabaga murofu okuhika akairirizi, asemeriire ayogye engoye ze, na uwe wenka ayoge.

¹¹Omuntu wena anyakukwataho ogu arukurugwamu amasira atakanaabire engaro, ogu buli asiisikaire, araikaraga ali murofu okuhika akairirizi; asemeriire ayogye ebyokujwara bye, na uwe wenka ayoge.

¹²Ekintu ekibumbirwe ekirikwatwaho ogu arukurugwamu amasira kyatwege, ekintu obu kiraabaga kibaizirwe kyogebwege n'amaizi kandi kijuburwege.

¹³“Omuntu ogu obu alireka okurugwamu amasira, abale ebiro musanju, ayogye ebyokujwara bye; na uwe wenka ayoge omubiri gwona omu maizi agarukugera, nubwo aleke kuzirwa.

¹⁴Ha kiro ekya munaana, atwale enduka ibiri rundi amaiba abiri, aije omumaiso ga MUKAMA, ha mulyango ogw'Eheema ey'okutangatanganiramu, enduka rundi amaiba ago agahe nyakatagara;

¹⁵nyakatagara agahonge, erimu libe kihongwa eky'okuganyiza ebibi, erindi libe kihongwa eky'okwokya; asabire omuntu hali MUKAMA nukwo atambirwe okurugwamu amasira.

¹⁶“Kandi omusaija kakuba arooterra araaikaraga naazirwa okuhika akairirizi, asemeriire ayoge omubiri gwona,

¹⁷kandi buli kyokujwara rundi orususu orunyakutoonywaho amaizi ago, biraikaraga biri birofu okuhika akairirizi, bisemeriire kwogebwa n'amaizi.

¹⁸Kakuba omusaija ateerana n'omukazi, akamutamu amaizi ago aganyakuzaara, bombi baraikaraga nibazirwa okuhika akairirizi, basemeriire kwoga.

¹⁹“Omukazi obu araabaga ali omu kwezi araikaraga ali murofu okumara ebiro musanju, kandi wena araamukwatahoga araikaraga ali murofu okuhika akairirizi.

²⁰Kandi kyona omukazi ogu n'eki araabyamahoga n'eki araikarrahoga omu kasumi ako, kiraabaga kirofu.

²¹Wena araakwataga ha kitabu kye, araikaraga ali murofu okuhika akairirizi, asemeriire kwogya ebyokujwara bye, na uwe wenka ayoge omubiri gwona.

²²Wena araakwataga ha kintu omukazi ogu eki aikarraaho, araikaraga ali murofu okuhika akairirizi, asemeriire ayogye ebyokujwara bye, na uwe wenka ayoge omubiri gwona;

²³kakuba omusaija akwata ha kitabu omukazi ogu eki abyamaho, rundi ha ntebe ei aikarraaho, araabaga murofu okuhika akairirizi.

²⁴Kakuba omusaija abyama n'omukazi ogu, oburofu bwe bukamuhikaho, omusaija ogu araabaga murofu okumara ebiro musanju; kandi buli kitabu eki araabyamahoga, araakirofuhazaaga.

²⁵“Omukazi anyakumara ebiro bingi ali omu kwezi okukira, akasumi ke aka buli kwezi, rundi kakuba aba ati okumara ebiro bingi muno akahinguza ha biro bye ebya butoosa, araabaga naazirwa akasumi koona akaaraamaraga; araabaga naazirwa nkooku aba omu kasumi ke akaabuli kwezi.

²⁶Ekitabu kyona eki abyamaho, akasumi koona aka amara naazira, kirisisana nk'eki abyamaho omu kasumi ke akaabuli kwezi. Entebe eikarrwaaho, nayo eriba neezirwa nk'eyaikarraaho omu kasumi akaabuli kwezi.

²⁷Wena araakwataga ha bintu ebi, araikaraga ali murofu okuhika akairirizi, asemeriire ayogye ebyokujwara bye na uwe wenka ayoge omubiri gwona.

²⁸Omukazi ogu kakuba akira abale ebiro musanju, obu biraahwahoga, araaba atakyazirwa, oburwaire bumuhoireho.

²⁹Ha kiro ekya munaana, akwate enduka ibiri rundi amaiba amato abiri, agatwarre nyakatagara ha mulyango ogw'Eheema ey'okutangatanganiramu.

³⁰Nyakatagara ahonge eriiba erimu, libe kihongwa eky'okuganyiza ebibi, erindi libe kihongwa eky'okwokya; asabire omukazi ogu hali MUKAMA, habw'akasumi akaamazire naazirwa.

³¹“Nukwo olindege oti abaana ba Isirairi, beecweho obubi bwabo, tibaikara kubufeeramu, habw'okuhagaza enju yange enyakubaikara hagati.”

³²Eki nikyo kiragiro ekyateerirweho omusaija anyakurugwamu amasira n'ogu anyakurugwamu amaizi aga nyakuzaara; gakamuleetera kuzirwa,

³³kandi ekiragiro eki, kikwata n'omukazi anyakuli mu kwezi rundi omusaija anyakuteerana na uwe.