Read Runyoro - rutooro Lev 16 Bible Online

Lev 16 - Runyoro - rutooro bible

Lev 16

¹Batabani ba Arooni ababiri abaahongiire MUKAMA n'omurro ogurukuzirwa, obu baamazire kufa, MUKAMA yagambira Musa ati:

²“Gambira mugenzi wawe Arooni, obwire bwona, atalitaaha Omukiikaro Ekirukwera omunda y'enyigamo omumaiso ag'ekitebe eky'okuganyirraaho ekinyakuli ha sanduuko ey'endagaano, ataliija kufa, habwokuba ndizooka ha kitebe eky'okuganyirraho ndi omu kicu.

³Baitu Omukiikaro Ekirukwera, Arooni ataahemuga ati: Aijege n'enimi ento ey'ekihongwa eky'okuganyiza ebibi, n'entaama ey'ekihongwa eky'okwokya.

⁴Ajwale ekanzu erukwera eya kitaani n'empale engufu nayo eya kitaani, ayeteege omweko ogwa kitaani, ate ha mutwe ekitambaara ekya kitaani; ebi nibyo byokujwara ebirukwera.

⁵Abanze ayoge omubiri gwona nukwo ajwale. Abaana ba Isirairi bamuhe empaya z'emburabuzi ibiri ez'ekihongwa eky'okuganyiza ebibi, n'empaya y'entaama emu ey'ekihongwa eky'okwokya.

⁶“Arooni ahonge enimi, kibe kihongwa eky'okumuganyiza ebibi, ayereherre, aleherre n'eka ye.

⁷Hanyuma akwate embuzi ibiri, aziitire omumaiso ga MUKAMA, ha mulyango ogw'Eheema ey'okutangatanganiramu;

⁸embuzi ezi, aziterre itomo, akabaale kamu kahandiikweho habwa MUKAMA, akandi habwa Azaazeeri.

⁹Embuzi erigwibwaho akaruuru habwa MUKAMA, agireete agihonge, ebe kihongwa eky'okuganyiza ebibi;

¹⁰kandi erigwibwaho itomo habwa Azazeeri, agireete omumaiso ga MUKAMA eri nyomeezi, niyo ereherweho, nukwo erekerwe egende mwirungu ery'Azazeeri.

¹¹“Arooni aleete enimi ey'okuganyiza ebibi, ayereherre kandi aleherre n'eka ye; aite enimi ey'ekihongwa eky'okumuganyiza ebibi bye.

¹²Akwate oruswa orw'amakara ag'omurro agarukuruga ha itambiro erinyakuli omumaiso ga MUKAMA, n'ebihi[1] bibiri eby'eseeta enyakuniinuukire kurungi; aruleete omunda y'enyigamo

¹³ate eseeta ha murro ogunyakuli omumaiso ga MUKAMA, nukwo omwika ogw'eseeta guswekerre ekitebe eky'okuganyirraho ekinyakuli ha sanduuko ey'endagaano, nukwo aleke kufa.

¹⁴Ha sagama ey'enimi, aiheho nke, aibikemu orukumo rwe, agimiisire obuso obw'ekitebe eky'okuganyirraaho, kandi agimiise n'orukumo rwe emirundi musanju omumaiso gaakyo.

¹⁵“Hanyuma, aite embuzi ey'ekihongwa eky'okuganyiza abantu ebibi, aleete esagama yayo omunda y'enyigamo, agikole nkooku akozire ey'enimi, agimiisire ekitebe eky'okuganyirraaho n'omumaiso gaakyo;

¹⁶nukwo aleherre ati Ekiikaro Ekirukwera, habw'obubi na habw'ensobi ez'abantu ba Isirairi, na habw'ebibi byabo; kandi nukwo akole ati n'Eheema ey'okutangatanganiramu ei baikara nayo, bali omu bibi byabo.

¹⁷Omu Heema ey'okutangatanganiramu, hatalibamu muntu n'omu, Arooni obu araabaga naataaha kuleherra abantu Omukiikaro Ekirukwera okuhika obu arakarugamuga, amazire kwereherra, aleheriire eka ye n'ekitebe eky'abantu ba Isirairi.

¹⁸Hanyuma arugeyo agende ha itambiro erinyakuli omumaiso ga MUKAMA alireherre, akwate ha sagama ey'enimi na ha y'embuzi, agisiige ha mahembe g'itambiro ageehingulirize.

¹⁹Alimiisire esagama n'orukumo rwe emirundi musanju, alisemeze kandi alyeze, aliiheho obubi obw'abantu ba Isirairi.

²⁰“Arooni obu araamaraga kuleherra Ekiikaro Ekirukwera, Eheema ey'okutangatanganiramu n'itambiro, aheyoga embuzi enyomeezi;

²¹agite emikono ha mutwe, agyaturreho obubi bwona, ensobi zoona n'ebibi byona eby'abantu ba Isirairi, ebi byona abitweke embuzi egi, agikwase omuntu anyakweteekaniize, agitwale mwirungu.

²²Ataisule embuzi enyakwetwekere obubi obu bwona, ebutwale ebugoromole mwirungu nambere hatali bantu.

²³“Arooni, nubwo aije omu Heema ey'okutangatanganiramu, ajuulemu ebyokujwara ebya kitaani ebi yajwaire naagenda Omukiikaro Ekirukwera, abisigemu;

²⁴ayoge amaizi aganyakuli Omukiikaro Ekirukwera, ajwale ebyokujwara bye aturuke, aheyo ekihongwa kye eky'okwokya, hamu n'eky'abantu eky'okwokya, nukwo ayereherre wenka aleherre n'abantu.

²⁵Ebisajwa eby'ekihongwa eky'okuganyiza ebibi, abyokeze ha itambiro.

²⁶Omuntu anyakutwaire embuzi mwirungu Azazeeri, ayogye ebyokujwara bye, na uwe wenka ayoge, nukwo hanyuma agaruke omu rukande.

²⁷Enimi n'embuzi ez'ebihongwa eby'okuganyiza ebibi, esagama yazo eyaleesirwe Omukiikaro Ekirukwera kuba ndehwa, emitumbi yabyo etwarwe aheeru y'orukande; empu zaazo, enyama n'efa yazo, babisiiriize n'omurro.

²⁸Omuntu anyakubyokya, ayogye ebyokujwara bye, na uwe wenka ayoge, hanyuma nukwo agaruke omu rukande.

²⁹“Eki kiriba kiragiro kyanyu eky'ebiro byona, ekirukumanyisa ngu ha kiro ekya ikumi eky'okwezi kwa musanju, muraayefubiraga, timwakolege mulimo na gumu noobu araabaga muntu nzaarwa, rundi omunyaihanga arukwikara na inywe;

³⁰habwokuba ha kiro eki, nikyo muraalehererwahoga musemezibwe, mwihweho ebibi byona; mube barungi omumaiso ga MUKAMA.

³¹Ekiro eki, kiro kya Sabbato, hali inywe, kiro ky'okuhuumurra kimu; mwefubirege, eki kiragiro kyanyu eky'ebiro byona.

³²Kandi nyakatagara ayaseesirweho amagita, aganyakweza nukwo kukora omulimo ogw'obunyakatagara omu kiikaro kya ise, nuwe araatonganirraaga abantu, ajwaire engoye ezirukwera eza kitaani;

³³araatonganirraaga Ekiikaro Ekirukwera, Eheema ey'okutangatanganiramu, itambiro, banyakatagara n'abantu boona ab'ekitebe.

³⁴Eki kiraabaga kiragiro kyanyu eky'ebiro byona, ekirukumanyisa ngu abantu ba Isirairi baraatonganirirwaga omurundi gumu buli mwaka, habw'ebibi byabo byona. Musa yakora nkooku MUKAMA yamuragiire.