Read Runyoro - rutooro Lev 17 Bible Online

Lev 17 - Runyoro - rutooro bible

Lev 17

¹MUKAMA yagambira Musa ati:

²Gambira Arooni n'abatabani n'abantu boona aba Isirairi ngu: kinu nikyo MUKAMA araagiire;

³Kakuba omuntu aitira enimi rundi omwana gw'entaama rundi embuzi, omu rukande rundi aheeru yarwo,

⁴akalema kugireeta ha mulyango ogw'Eheema ey'okutangatanganiramu, kugihongera MUKAMA omumaiso g'Enju ye, omuntu ogu alijunaanwa habw'esagama y'ekisoro ei aseesire; alibingwa aruge omu bantu b'owaabu.

⁵Ekirukugendererwa omuli eki, Abaisirairi ebyonzira byabo ebibaraitiraga aheeru y'orukande, babireeterege MUKAMA, babikwase nyakatagara ha mulyango ogw'Eheema ey'okutangatanganiramu, nukwo abitwale bibe byonzira ebinya kuhongiirwe MUKAMA habw'okusaba Obusinge;

⁶amiise esagama ha itambiro lya MUKAMA, ha mulyango ogw'Eheema ey'okutangatanganiramu, ayokye n'ebisajwa birugwemu ekisorokoko ekirungi ekirukuboyera MUKAMA.

⁷Abantu ba Isirairi tibalyongera kutaba beesigwa hali MUKAMA nibaita ebisoro byabo nibabihongera embandwa z'embuzi empaya. Kinu kiraabaga kiragiro kyabo eky'ebiro byoona.

⁸“Kandi ogaruke obagambire oti: ‘Omuntu Omwisirairi rundi omunyaihanga anyakwikara nabo, alihonga ekihongwa eky'okulya rundi alitamba ekyonzira,

⁹akalema kukireeta ha mulyango gw'Eheema ey'okutangatanganiramu kukitambira MUKAMA; omuntu ogu abingwe aruge omu bantu b'owaabu.’

¹⁰“Kakuba omu ha bantu ba Isirairi rundi omunyaihanga arukwikara nabo alya esagama, omuntu kirya esagama ndimujunaana, mmubinge omu bantu b'owaabu.

¹¹Habwokuba obwomeezi bw'ekisoro niyo esagama, kandi nkabaragira mugitege ha itambiro, nukwo muleherre emyoyo yanyu; habwokuba esagama niyo ereherra obwomeezi.

¹²Nikyo natangiire Abaisirairi nti: Hatalibaho n'omu omuli inywe rundi omunyaihanga arukwikara nainywe arukulya esagama.

¹³Ekindi, kakuba omu ha bantu ba Isirairi rundi omunyaihanga arukwikara nabo akwasa ekisoro rundi ekinyonyi ekirukwikirizibwa kuliibwa, akisalege akiihemu esagama, esagama egi agiswekerre n'ecuucu.

¹⁴“Habwokuba obwomeezi obw'ekisoro kyona, niyo esagama yakyo, nikyo natangiire Abaisirairi nti: Mutalirya esagama y'ekisoro kyona, habwokuba obwomeezi bw'ekisoro kyona niyo esagama yakyo; wena anyakugirya abiingwege aihwe omu bantu b'owaabu.

¹⁵Omuntu anyakulya ekyefeera rundi ekisoro ekinyakwisirwe ekisoro ekindi, omuntu ogu obu araabaga ali nzaarwa rundi munyaihanga araayogyaga engoye ze, na uwe ayoge, araabaga naazirwa okuhika akairirizi, hanyuma araabaga atarukuzirwa.

¹⁶Baitu kakuba atazoogya, na uwe wenka akooga, araikaraga n'obubi bwe.