Read Runyoro - rutooro Lev 18 Bible Online

Lev 18 - Runyoro - rutooro bible

Lev 18

¹MUKAMA akagambira Musa ati:

²“Gambira abantu ba Isirairi ngu: Ninyowe MUKAMA Ruhanga wanyu.

³Mutalikora ebintu nk'Abanyamisiri nambere mwaikaraga ebi bakora, kandi ebi bakora mutalikora nk'eby'Abanyakanaani handukubatwara. Mutalikuraatira ebiragiro byabo.

⁴Mukolege ebi ndukubaragira, mukwate ebiragiro byange kandi nibyo muhondere. Ninyowe MUKAMA Ruhanga wanyu.

⁵Nikyo muraakwatiraga ebiragiro byange n'ebigambo byange, omuntu arukukora ati, alyomeera. Ninyowe MUKAMA.

⁶“Hatalibaho n'omu omuli inywe arukugendera omukazi ow'obuzaale bwe obwa haihi. Ninyowe MUKAMA.

⁷Otaligendera sso, rundi nyoko, kukora eki nooba oheemwire.

⁸Otaligendera muka sso, kukora eki nooba oheemwire sso

⁹Otalijurra munyanyoko, owa sso rundi owa nyoko, obu araaba ali w'omu ka rundi w'aheeru.

¹⁰Otaligendera omwijukuru, kukora eki nooba oyehemwire.

¹¹Otaligendera muhara wa muka sso anyakuzairwe sso, habwokuba munyanyoko.

¹²Otaligendera swenkati, habwokuba w'obuzaale bwa sso obwa haihi.

¹³Otaligendera nyokwento, habwokuba nuwe mukazi ow'obuzaale bwa nyoko obwa haihi.

¹⁴Otaligendera muka swento habwokuba naaba ali nka nyoko.

¹⁵Otaligendera muka mwana wawe,

¹⁶n'obwakubaire muramu wawe.

¹⁷Otaligendera n'omukazi okataho muhara we, noobwakuba kubyama na muhara w'omutabani rundi muhara wa muhara we, habwokuba bakazi b'obuzaale bwa haihi; kukora oti, kibi mali.

¹⁸Otaligendera omwisiki muramu wawe, rundi kumuswera okamwongera hali mugenzi we, kunu mugenzi we akyayomiire.

¹⁹Otaligendera n'omukazi anyakuli omu kwezi.

²⁰Otaliteerana n'omukazi w'omusaija ondi, akakusiisa.

²¹Otaliikiriza omwana wena ou ozaire kumuhongera embandwa, Moleki, habwokuba eki nikifurungura nyowe MUKAMA Ruhanga wawe, Ninyowe MUKAMA.

²²Otaligendera omusaija nk'arukugendera omukazi, habwokuba eki kinugwa.

²³Otaligendera ekisoro kikakusiisa, noobwakuba omukazi kugendera ekisoro: eki tikiri kintu ky'obuhangwa.

²⁴“Muleke kwesiisa omu kintu kyona hali ebi, habwokuba, amahanga goona aga ndukubinga, inywe mutakahikireyo, ebi nibyo byabasiisire;

²⁵ensi yasisikara, nanyowe nukwo kugifubira habw'obubi bwayo, enzaarwa zaamwo zaarugamu.

²⁶Baitu inywe mukwatege ebiragiro byange n'ebigambo byange mutalikora na kimu ha binugwa ebi, obu araaba ali muntu nzaarwa rundi munyaihanga ou murukwikara na uwe,

²⁷(habwokuba ebinugwa ebi byona, abantu b'ensi enu, abakaba bagirumu inywe mutakaizire, nibyo baakozire, ensi nukwo kusiisikara).

²⁸Na inywe ensi kakuba mugisiisa, nimwija kugirugamu nka bali abaagisiisire oku baagirugiremu.

²⁹Habwokuba wena alikora ekimu ha binugwa ebi, aliihwa omu bantu b'owaabu.

³⁰Nahabweki, mukwate ebi ndukubateererra, mutaliikara kuhondera engeso zinu embi eza abantu abakaba bali omunsi enu, inywe mutakagiiziremu, kandi muleke kwesiisa omu ngeso ezi. Ninyowe MUKAMA Ruhanga wanyu.”