Read Runyoro - rutooro Lev 19 Bible Online

Lev 19 - Runyoro - rutooro bible

Lev 19

¹MUKAMA akagambira Musa ati:

²“Gambira ekitebe ekya Isirairi ngu: Mube bantu abarukwera, habwokuba, nyowe MUKAMA Ruhanga wanyu ninyera.

³Buli omu omuli inywe, atemuga ekitiinisa ise na nyina, kandi mutemuga ekitiinisa ekiro kyange ekya Sabbato; Ninyowe MUKAMA Ruhanga wanyu.

⁴Mutaliramya ebintu ebitaina mugaso noobwakwakuba kwagya ebyoma mukekorramu baaruhanga. Ninyowe MUKAMA Ruhanga wanyu.

⁵“Obu muraabaga nimuha MUKAMA ekyonzira habw'okusaba Obusinge mukihege nukwo musiimwe.

⁶Kiriibwege ha kiro kyonyini eki muraabaga mukiheeriireyo rundi nyenkya bukiire; ekintu kyona ekiraabaga kisigaireho okuhika ha kiro ekya kasatu, bakyokyeege kisiiriire.

⁷Kakuba kiriibwa ha kiro ekya kasatu, kiba ky'omuziro kandi tikirisiimwa,

⁸Omuntu wena anyakukiryaho, ayeretera omusango, habwokuba asiisire ekintu ekirukwera ekya MUKAMA; omuntu ogu araihwaga omu bantu b'owaabu.

⁹“Obu oraabaga noogesa oleke kuhikira kimu ha nsaaro y'omusiri rundi kugesa okamarraamu kimu.

¹⁰Emiti yawe ey'orugonjo orw'emizabbibbu, otaliginogaho ebijuma okabimaraho, noobu kwakuba kusorooza ebigwire hansi, ebi byona obirekere abanaku n'abanyamahanga; ninyowe MUKAMA Ruhanga wanyu.

¹¹“Mutaliiba, mutaligobezangana nookwakuba kubiihangana ebisuba.

¹²Mutalirahirra busa ibara lyange, mukajumisa ibara lya Ruhanga wanyu: Ninyowe MUKAMA.

¹³“Otalibonesa omutaahi rundi kumunyaga. Otalikeerereza omusaara gw'omuntu ou oragaine na uwe kukukorra omulimo okakiisa obwire.

¹⁴Otalikondereza omufu w'amatu rundi kuta ekintu omu muhanda omufu w'amaiso eki arukwija kuhuumira, kyonka otiinege Ruhanga wawe; Ninyowe MUKAMA.

¹⁵“Otalicwa omusango ogw'okuhendeerra; otaligogeereza omunaku rundi kutiina omuntu ow'ekitiinisa, baitu omutaahi omucwere nookuraatira obulyo.

¹⁶Tosemeriire kugendagenda noogeya abantu rundi kunaga omuntu mutaahi wawe omu kabi: Ninyowe MUKAMA.

¹⁷“Mugenzi wawe otalimwitira ha mutima, ohanuulege n'omutaahi, taikara kukunaga omu kibi.

¹⁸Otalyehorra enzigu rundi kugirra itima abaana b'abantu b'owanyu, baitu ogonzeege mutaahi wawe nkooku oyegonza wenka Ninyowe MUKAMA.

¹⁹“Okwatege ebiragiro byange. Ente zawe zitalyemebwa ez'oruganda orundi; omusiri gwawe otaligubyaramu embibo z'enganda ibiri kandi otalikisura okajwara ekikozirwe omu huuzo ezinyakurangirwe omu bintu eby'emiringo ebiri.

²⁰“Kakuba omusaija abyama n'omukazi omuzaana anyakujumbiirwe omusaija ondi, kyonka omuzaana ogu atakacungwirwe rundi atakalekiirwe, ebigambo byabo biraayetegerezibwaga. Tibaitwege, habwokuba omuzaana abaire atakalekiirwe;

²¹kyonka omusaija aleeterege MUKAMA ekihongwa eky'okumuganyiza omusango, akireete ha mulyango ogw'Eheema ey'okutangatanganiramu, ekihongwa eki, ebege mpaya y'entaama.

²²Nyakatagara amutonganirrege hali MUKAMA naahonga ekihongwa eki, habw'ekibi eki yakozire; Nukwo MUKAMA amuganyire eki yakozire.

²³“Obu mulihika omunsi, mubyaire emiti ey'emiringo yoona ey'erukuliibwa ebijuma, ebijuma byayo mutalibirya okumara emyaka esatu, omu kasumi ako muliba nimubitangwa.

²⁴Omu mwaka ogwa kana, biraabaga biri ebirukwera, kihongwa eky'okusiima MUKAMA.

²⁵Baitu omu mwaka ogwa kataano, mulye ebijuma byayo, nukwo emiti eyongere kubaanira ebingi: Ninyowe MUKAMA Ruhanga wanyu.

²⁶“Mutalirya enyama yoona ekyarumu esagama. Mutaliraguza kandi mutalibandwa.

²⁷Mutalyemwa mukasiga ekisunsu kandi mutalimwa ebitarra eby'emireju yanyu.

²⁸Mutalyesara ensaro ha mibiri yanyu habw'abantu abaafiire kandi mutalyesara engondo habw'emigenzo. Ninyowe MUKAMA.

²⁹“Otaliikiriza muhara wawe kufooka malaaya, ensi etaliikara kwijura obwamalaaya, ekasiisikara.

³⁰Otemuga ekitiinisa ekiro kyange ekya Sabbato n'ekiikaro kyange ekirukwera: Ninyowe MUKAMA.

³¹“Otaliteerana n'abafumu n'abarogo; otalibeeha bakakusiisa: Ninyowe MUKAMA Ruhanga wanyu.

³²“Oimukirege abakuru omu myaka, otemuga ekitiinisa abagurusi n'abakaikuru kandi otiinege Ruhanga wawe: Ninyowe MUKAMA.

³³“Omunyaihanga kakuba akwebinga omunsi y'owanyu, otalimukora kubi.

³⁴Omunyaihanga wena arukwikara na inywe mumusisanizeege nk'enzaarwa aboikara nabo, omugonzeege nkooku oyegonza wenka; habwokuba na inywe omunsi Misiri, mukaba muli banyamahanga: Ninyowe MUKAMA Ruhanga wanyu.

³⁵“Mube beesigwa omu bintu binu: Omu kulenga obura bw'ebintu, omu kulemeera kwabyo rundi obwingi bwabyo.

³⁶Mube na minzaani ezinyakuhikire, amabaale aganyakuhikire, endengo enyakuhikire: Ninyowe MUKAMA Ruhanga wanyu ayabaihire omunsi Misiri.

³⁷Mukwate ebiragiro byange byona, n'ebigambo byange kandi mukole eki birukuragira: Ninyowe MUKAMA.”