Read Runyoro - rutooro Lev 2 Bible Online

Lev 2 - Runyoro - rutooro bible

Lev 2

¹Kakuba omuntu aleeta ekihongwa eky'ebyokulya kukihongera MUKAMA, ekihongwa kye kibe nsaano enyakuniinuukire, agiseeserre amagita, agimamirreho eseeta,

²ekihongwa eky'ensaano eki akireetere banyakatagara batabani ba Arooni, omu hali bo, aiheho orucumite rw'ensaano kandi akwate amagita hamu n'eseeta, abyokeze ha itambiro, kibe kiijukyo kyakyo ekinyakuhairweyo, ekirukuboyera kurungi MUKAMA.

³Ensaano enyakusigaireho, ebege ya Arooni n'abatabani, eki nikyo kihongwa, ekinyakwokeze ekirukwerra kimu ekinyakwokeze ekinyakuhongiirwe MUKAMA.

⁴Ekihongwa kyawe, kakuba eba migaati, obukeeki bube bw'ensaano enyakuniinuukire, obunyakutugirwe n'amagita, obutatairwemu kitumbisa rundi capati ezinyakutugisibwe amagita, zitatairwemu kitumbisa.

⁵Ekihongwa kyawe kakuba kiba ky'ebyokulya ebinyakukarangirwe ha rusaniya, kibege ky'ensaano enyakuniinuukire, etugirwe n'amagita tiyatebwamu kitumbisa;

⁶okicwacwanege obucweka, okiseeserre amagita, eki nikyo kihongwa eky'ebyokulya.

⁷Ekihongwa kyawe kakuba kiba kicumbirwe omu safuliya, kibege ky'ensaano enyakuniinuukire yataburwamu amagita.

⁸Oleeterege MUKAMA ekihongwa eky'ebyokulya ekinyakukozirwe omu bintu ebi; obu oraakihikyaga nyakatagara, araakitwaraga ha itambiro.

⁹Ha kihongwa eky'ebyokulya, nyakatagara aihehoga ekicweka eky'okukiijukirahoga, akyokye ha murro kiboyere kurungi MUKAMA.

¹⁰Ekirukusigaraho ha kihongwa eki, kya Arooni n'abatabani, eki nikyo kihongwa ekirukukirra kimu kwera, ekinyakwokeze kyahongerwa MUKAMA.

¹¹Mutalihongera MUKAMA ekihongwa eky'ebyokulya ebinyakutumbisibwe; kandi mutalyokya ekitumbisa rundi kutagasa obwoki obw'okuhongera MUKAMA.

¹²Ebijuma eby'omuganuro, nimwikirizibwa kubihongera MUKAMA, baitu mutalikisura, mukabihongera ha itambiro ngu biboye kurungi.

¹³Ekihongwa kyona eky'ebyokulya eki muraahongaga, mukirungemuga ekisura; mutalyebwa kurunga ekihongwa kyanyu ekisura, mukacwa endagaano ei mwaragaine na Ruhanga; ebihongwa byanyu byona mubirungemuga ekisura.

¹⁴Obu muraahongeraga MUKAMA enjuma ez'omuganuro ezaakaruga kuhuurwa kandi ezinyakukarangirwe,

¹⁵muzitehoga amagita, muzimamirreho eseeta; eki nikyo kihongwa eky'ebyokulya.

¹⁶Nyakatagara ayokye ekicweka eky'ensaano, eky'amagita n'eky'eseeta, bibe kiijukyo kyakyo; eki nikyo kihongwa ekinyakwokeze ekinyakuhongiirwe MUKAMA.