Read Runyoro - rutooro Lev 20 Bible Online

Lev 20 - Runyoro - rutooro bible

Lev 20

¹MUKAMA akagambira Musa ati:

²“Gambira abantu ba Isirairi oti: Omuntu omwisirairi rundi omunyaihanga anyakwikara n'Abaisirairi, alihongera embandwa Moleki omu ha baana be, ogu aitwe, abantu abasi b'ensi bamuteeze amabaale.

³Na nyowe nyenka, ndijunaana omuntu ogu, ndimwiha omu bantu b'owaabu habwokuba omu ha baana be amuhaire embandwa Moleki, yasiisa ekiikaro kyange ekirukwera kandi yajuma ibara lyange erirukwera.

⁴Omuntu obu alihongera embandwa Moleki omu ha baana be, abantu ab'omunsi, batakifiireho, bakalema kumwita,

⁵ndijunaana omuntu ogu n'eka ye, ndibaiha omu bantu ab'ihanga lyabo uwe na boona abanyakumukurata nibakora eby'orwanju okusemereza Moleki.

⁶“Omuntu obu aliteerana n'abantu abanyakubandwa emizimu n'abarogo, ogu ndimujunaana, ndimwiha omu bantu ab'ihanga lye.

⁷“Habweki, mweyeze mube barukwera; habwokuba ninyowe MUKAMA Ruhanga wanyu.

⁸Mukwate ebiragiro byange kandi mukole ebi birukuragira; ninyowe MUKAMA anyakubeeza.

⁹Weena anyakukondereza ise rundi nyina, aitwege, habwokuba anyakukondereza ise rundi nyina, omusango guba gumusingire.

¹⁰“Omusaija kakuba asiihana na muk'omutaahi, bombi, omusaija n'omukazi baitwe.”

¹¹Omusaija anyakusiihana na muka ise ogu aba ahemwire ise, uwe na muka ise baitwe, omusango guba gubasingire.

¹²Omusaija kakuba asiihana na mukamwana we bombi baitwe, habwokuba bakozire ekirukuzirwa, baba beesingisize omusango.

¹³Kakuba omusaija asiihana n'omusaija mutaahi we nkooku asiihana n'omukazi, bombi baba bakozire ekintu ekitakorwa; basemeriire baitwe, baba beesingisize omusango.

¹⁴Omusaija kakuba aswera omwisiki na nyina omwisiki, eki kintu kibi mali; ekitakorwa, abo boona, omusaija na bakazi be, babookye omu murro, nukwo muleke kugaruka kukora ekintu eki.

¹⁵Kakuba omusaija asiihana n'ekisoro, ogu aitwe, ekisoro eki nakyo, mukiite.

¹⁶Omukazi kakuba ateerana n'ekisoro, omukazi mumwite hamu n'ekisoro; omukazi aitwe n'ekisoro kiitwe, ebihangwa ebi, biba byesingisize omusango.

¹⁷“Omusaija kakuba aswera munyanya arukuzaarwa ise rundi nyina, eki kintu ky'ensoni, baitirwe omumaiso g'abantu ab'ihanga lyabo. Omusaija habw'okusiihana na munyanya, asemeriire kwikiriza ekifubiro eky'omusango gwe.

¹⁸Kakuba omusaija asiihana n'omukazi anyakuli omu kwezi, omusaija ogu, ayongera kwikaza omukazi omu kwezi, omukazi wenka, na uwe ayeyiikaza omu kwezi; bombi basemeriire kubingwa omu bantu ab'ihanga lyabo.

¹⁹Otalisiihana na nyokwento rundi swenkati, oku nukwo kusiihana n'omuntu ow'obuzaale obwa haihi; abantu abo, basemeriire kujunaanwa.

²⁰Omusaija anyakusiihana na muka isento, ahemura isento, abantu abo: Omusaija n'omukazi basemeriire kujunaanwa kandi baitwe.

²¹Kakuba omusaija aswera muka mugenzi we, eki kintu kibi, aba ahemwire mugenzi we, omusaija n'omukazi basemeriire basendwe.

²²“Habweki, mukwate ebiragiro byange byona na byona ebi nataireho, kandi mukole ebi birukuragira;

²³Mutaliba n'engeso nk'ez'abantu aba ndukubinga omunsi babahigize; habwokuba ebintu ebi byona, nibyo baakozire, na nyowe nukwo kubatamwa.

²⁴Baitu inywe, nimbagambira ngu: ‘Mulitunga ensi yabo, ndigibaha ebe nsi yanyu bweremera, ensi egi, enyakwijwire amata n'obwoki.’ Ninyowe MUKAMA Ruhanga wanyu ayabaahukaniize ha mahanga agandi.

²⁵“Habweki, mwahuranege ebisoro ebitarukuzirwa n'ebirukuzirwa, ebinyonyi, ebitarukuzirwa n'ebirukuzirwa; mutalyesiisa mukalya ebisoro, ebinyonyi rundi ekintu ekindi kyona ekinyakuli omunsi ebi nabagambiire nti, ebintu binu by'omuziro.

²⁶Mwikalege muli bantu bange abarukwera baitu nyowe MUKAMA ndi arukweera, nkabaahurana ha mahanga, nukwo mube bange.

²⁷“Omusaija rundi omukazi omuraguzi rundi omurogo, aitwege ateerwege amabaale, musango gwabo.”