Read Runyoro - rutooro Lev 21 Bible Online

Lev 21 - Runyoro - rutooro bible

Lev 21

¹MUKAMA akagambira Musa ati: “Abanyakatagara abaana ba Arooni obagambire oti: Hatalibaho n'omu omuli bo ayesiisa wenka, okuhika ha muntu anyakufiire omu bantu ab'oruganda rwe,

²rundi buli, w'obuzaale bwe obwa haihi muno, nka nyina, ise, omutabani, omuhara mugenzi we,

³rundi munyanya ataraswiire anyakuli ha zigati.

⁴Nk'omuntu anyakuswire, tasemeriire kwesiisa omu bantu be akeegayisa.

⁵Abanyakatagara tibasemeriire kumwa isoke erya ha kasoke eruguru, rundi kwemwa ebitarra, rundi kwesara engondo ha mibiri yabo.

⁶Babe barukwera hali Ruhanga wabo baleke kugayisa Ruhanga wabo; habwokuba bahongera MUKAMA ebihongwa ebyokiibwe, nibyo byokulya bya Ruhanga wabo, nahabweki, basemeriire kuba abarukwera.

⁷Bataliswera omukazi malaaya rundi omukazi wena anyakwesisiire, noobwakuba kuswera omukazi anyakwangaine yaruga hali iba; habwokuba nyakatagara ogu naayera hali Ruhanga we.

⁸Mumulinde aikale naayera, habwokuba nuwe ahongera Ruhanga wanyu ebyokulya, araabaga arukwera hali inywe; habwokuba nyowe MUKAMA anyakubeeza, ninyera.

⁹Kandi muhara wa nyakatagara wena, kakuba ayehemura wenka habw'okukora obwamalaaya, aba ahemwire ise, omwisiki ogu ayokebwe n'omurro.

¹⁰“Mukuru w'Abanyakatagara, omu hali bataahi be, ayaseesiirwe amagita ag'okweza ha mutwe kandi yasoororwa kujwaraga ebyokujwara, taalekege isoke rye kwikara nirihehema rundi kutemura ebyokujwara bye,

¹¹atalihika ha mutumbi gw'omuntu, oku kwesiisa noobu haliba hafiire ise rundi nyina.

¹²Ataliruga kugenda akaruga Omukiikaro Ekirukwera, kandi atalisiisa Ekiikaro Ekirukwera ekya Ruhanga we; habwokuba akaseeswaho amagita ga Ruhanga we yasoororwa omu bantu: Ninyowe MUKAMA.

¹³Asemeriire aswere omwisiki atakaswerwahoga.

¹⁴Enfaakati, omukazi anyakwahukaine na iba, anyakwehemwire rundi malaaya, abo atalibaswera, baitu aswere omwisiki atakaswerwahoga ow'oruganda rwe, orw'obunyakatagara,

¹⁵nukwo aleke kuhemura abaana be omu ruganda rwa ise; Ninyowe MUKAMA anyakumweza.”

¹⁶MUKAMA yayongera yagambira Musa ati:

¹⁷“Gambira Arooni oti: Hatalibaho n'omu omu baijukuru bawe ab'ebiro byona anyakwina akamogo aliirra haihi kuhongera Ruhanga we ebyokulya.

¹⁸Habwokuba, busaho n'omu anyakwina akamogo aliirra haihi, obu aliba ali mufu w'amaiso, mulema rundi anyakugookere ekicweka kyona ekya ha maiso, rundi ekicweka eky'omubiri ekinyakuraihire okukira ekindi,

¹⁹rundi anyina ekigere rundi omukono oguramaire,

²⁰rundi ow'ibbango, rundi ekihuruka rundi atarukuhweza kurungi, rundi anyina endwara ey'okweyagura, rundi orukaca, rundi atanyina ngusuuru,

²¹hatalibaho muntu n'omu omu baijukuru ba Arooni anyakunyina akamogo aliirra haihi kuhongera MUKAMA ebihongwa eby'okwokya, habwokuba n'akamogo, ataliirra haihi kuhongera Ruhanga ebyokulya.

²²Naikirizibwa kulya ebyokulya bya Ruhanga eby'omu kiikaro ekirukwera,

²³baitu ataliirra haihi enyigamo rundi kuhika ha itambiro, habwokuba aina akamogo, ataliikara kusiisa ebintu byange ebirukwera; ninyowe MUKAMA anyakubeeza.”

²⁴Musa nubwo ebi yabigambira Arooni n'abatabani, n'abantu boona aba Isirairi.