Read Runyoro - rutooro Lev 22 Bible Online

Lev 22 - Runyoro - rutooro bible

Lev 22

¹MUKAMA akagambira Musa ati:

²“Gambira Arooni n'abatabani, batemuga ekitiinisa ebintu ebirukwera abantu ba Isirairi ebi bampongera, nukwo baleke kugayisa ibara lyange erirukwera. Ninyowe MUKAMA.

³Obagambire oti: ‘Omu biro byanyu byona, kakuba omu ha baijukuru bawe aba naakyazirwa, akairra haihi ebintu ebirukwera Abaisirairi ebi baba bampaire, omuntu ogu asendwe aruge omumaiso gange: Ninyowe MUKAMA.

⁴Omu bantu ab'oruganda rwa Arooni, hatalibaho omugenge n'omu rundi omukazi anyakurwaire akeejwiso aliikirizibwa kulya ha bihongwa ebirukwera obu araabaga naakyazirwa. Wena anyakuraara arooteriire, rundi anyakukwataho ekintu kyona ekirukuzirwa, nk'omutumbi.

⁵Wena anyakukwata ha kihangwa ekyekururra ha nda, kikamufoora arukuzirwa, rundi omuntu mutaahi we kumufoora arukuzirwa, rundi omuntu ow'omulingo gwona arukuzirwa,

⁶omuntu ogu anyakukwata ekintu eky'omulingo ogu, azirwege okuhika akairirizi, kandi taalyege ha bintu ebirukwera rundi buli amazire kwoga.

⁷Izooba obu liraamaraga kugwa, araabaga atakyazirwa; obu alyeege ha bintu ebirukwera, habwokuba ebi nibyo byokulya bye.

⁸Ekisoro ekinyakwefeeriire rundi ekinyakukwasirwe enyamaiswa, atalikirya, nukwo aleke kwesiisa, ninyowe MUKAMA.’

⁹Nahabweki, basemeriire bakwate eki mbateereriire, tikiikara kubarugiramu ekibi, bakafeeraaho omu kasumi akabasisiraho: Ninyowe MUKAMA anyakubeeza.

¹⁰“Omuntu atali w'oruganda rwa Arooni, atalirya ha bintu ebirukwera. Omunyaihanga wa nyakatagara rundi omuntu arukukorra omusaara atalirya ha bintu ebirukwera.

¹¹Baitu nyakatagara kakuba agura omwiru, akamuguza, akamufoora nk'ekintu kye ogu naikirizibwa kulya ha bintu ebi, nabo abaazaalirwe omunju ye nibasobora kulya ha byokulya bye.

¹²Kakuba muhara wa nyakatagara aswerwa omu ruganda orundi, alekere aho kulya ebihongwa ebirukwera.

¹³Baitu muhara wa nyakatagara obu araaba ali nfaakati, rundi akaahukana na iba, kandi tanyina baana, akagaruka omba ise, kandi kunu akyali muto, naikirizibwa kulya ha byokulya bya ise, kyonka ow'oruganda orundi atalibiryaho.

¹⁴Kakuba omuntu alya ha kintu ekirukwera atamanyire, akyongereho kimu kya kataano eky'omuhendo gwakyo, ebintu ebirukwera abikwase nyakatagara.

¹⁵Abanyakatagara batalisiisa ebintu ebirukwera, abantu ba Isirairi ebi bahongera MUKAMA,

¹⁶bakeereetaho akabi n'omusango habw'okulya ebintu byabo ebirukwera, habwokuba nyowe MUKAMA, ninyowe mbeeza.”

¹⁷MUKAMA yagambira Musa ati:

¹⁸“Gambira Arooni, abatabani n'abantu boona aba Isirairi ngu: Omuntu wena ow'enju ya Isirairi rundi omunyaihanga obu araabaga naahayo ekihongwa kye rundi naahikiriza eki yaraganiize, rundi naahayo hali MUKAMA ekihongwa eki ayegondiize kibe kihongwa eky'okwokya,

¹⁹kusimwa, muheyoga ekihaya ekitanyina kamogo, eky'enimi rundi entaama rundi emburabuzi.

²⁰Mutalihonga ekintu kyona ekinyina akamogo, habwokuba timurukwija kusiimwa.

²¹Kandi omuntu wena obu araabaga naahongera MUKAMA ekyonzira ekiheebwayo habw'okusaba obusinge, kuhikiriza eki yaraganiize rundi kihongwa eki ayegondiize, naakiiha omu igana ly'ente, ly'entaama, rundi ly'emburabuzi, omuntu ogu kusiimwa, ekihongwa kisemeriire kuba ekihikiriire, kitaina kamogo.

²²Ebisoro ebifiire amaiso, ebirema, ebigookere, ebirukuleeta amasira, ebinyakurwaire kahoora rundi omubombo, rundi ebiguuna, mutalibihongera MUKAMA rundi kubifoora bihongwa eby'okwokeza MUKAMA ha itambiro.

²³Enimi rundi entaama enyakunyina ekicweka ekinyakuraihire muno rundi ekinyakugufahaire muno okukira ekindi, musobora kukireeta habw'ekihongwa eki oyegondiize, baitu habw'okuhikiriza eki waraganiize, tikisobora kusiimwa.

²⁴Ekisoro kyona ekinyina amagosi agahutaire rundi agatiirwe, agataagukire rundi agasazirwe, mutalikihongera MUKAMA rundi kukihayo nk'ekyonzira eki nikitangwa omunsi yanyu.

²⁵Ekisoro eky'omulingo nk'ogu, mutalikiihaho omunyaihanga, mukakihongera MUKAMA Ruhanga wanyu kuba ekihongwa eky'ebyokulya habwokuba kinyina akamogo, habwokuba biina eki baabikozireho, habweki tibisobora kukuleetera kusiimwa.”

²⁶Kandi MUKAMA yagambira Musa ati:

²⁷“Enimi rundi entaama rundi emburabuzi, obu eraazarwaga, emalege na nyinayo ebiro musanju; okuruga ha kiro ekya munaana, n'okwirrayo, niikirizibwa kuba kihongwa eky'okwokeza Ruhanga.

²⁸Kandi nyinayo obu eraaba eri zigija rundi buguma, byombi otalibiitira ha kiro kimu, nyinayo n'omwana gwayo.

²⁹Kandi obu oraabaga noohongera MUKAMA ekihongwa eky'okusiima, okihongege noomanya nkooku oraasiimwa.

³⁰Kiriirweho ha kiro eki kyonka, baitu otalirekaho kanyama kaayo na kati. Ninyowe MUKAMA.

³¹“Nahabweki, mukwate ebiragiro byange kandi mubihondere: Ninyowe MUKAMA.

³²Mutalifurungura ibara lyange erirukwera, baitu nyikalege ninyumizibwa omu Isirairi; ninyowe MUKAMA anyakubeeza,

³³ayabaihire Omunsi Misiri, mbe Ruhanga wanyu; ninyowe MUKAMA.”