Read Runyoro - rutooro Lev 23 Bible Online

Lev 23 - Runyoro - rutooro bible

Lev 23

¹MUKAMA akagambira Musa ati:

²“Gambira abantu ba Isirairi ngu: Ganu nugo magenyi gange amakuru agatairweho, aga muraayesoroolezaahoga kuramya.

³Mukolege emirimo omu biro mukaaga; baitu ekiro ekya musanju kiro ky'okuhuumura, musorrokanege muramye, mutalikisura mukakora omulimo ha kiro eki; egi eba Sabbato ya MUKAMA, hoona ha muraakabaga.

⁴“Ganu nugo magenyi ga MUKAMA agatairweho, nugo muraayesoroolezaahoga kuramya, aga mulirangirra omu kasumi aka gaateerirweho.

⁵Omu kairirizi, ha kiro ekya ikumi na bina eky'okwezi okw'okubanza, nikyo kiro eky'okwijuka okuhinguraho kwa MUKAMA.

⁶Ha kiro eki kyonyini eky'okwezi oku kwonka, nikyo kiro kikuru kya MUKAMA eky'emigaati etatumbisiibwe.

⁷Ha kiro ekibanza mwesoroozeege muramye; mutalikora omulimo ogurukujwahya.

⁸Kyonka mumale ebiro musanju nimuhongera MUKAMA ekihongwa ekyokeze; ha kiro ekya musanju, mwesorooze muramye; mutalikora omulimo ogurukujwahya.”

⁹MUKAMA yayongera yagamba Musa ngu: “Gambira abantu ba Isirairi oti:

¹⁰Obu mulitaaha omunsi ei ndukwija kubaha, mukagesa ensi egi ebyebeeriize, ekiba eky'okubanza eky'ebi mugesire, mukitwarre nyakatagara;

¹¹akiimukyaimukye omumaiso ga MUKAMA, nukwo musiimwe; ha kiro ekirukukurataho, Sabbato emazire kuhwa, nubwo akiimukyaimukye.

¹²Ha kiro eki, eki muliimukyaimukizaaho ekiba kyanyu eki, muhonge omwana gw'entaama ogunyakuhikize omwaka gumu, ogutanyina kamogo, gube kihongwa kya MUKAMA ekyokwokya.

¹³Kandi omwana gw'entaama ogu, muguhonge hamu n'ekihongwa eky'ebyokulya kiloguraamu ibiri ez'ensaano enyakuniinuukire kurungi, etabwirwemu amagita ag'omuti gwa oliva, eki kihongerwe MUKAMA nikyokebwa omu murro; nukwo harugemu ekisorrokoko ekirukuboya kurungi; kandi ekihongwa eky'okunywa ekirihongwa hamu n'eki, ebe viini erukuhikya lita emu.

¹⁴Ha kiro eki, mutalirya omugaati rundi engano enyakukarangirwe rundi embisi okuhika obu mulireeta ekihongwa kya MUKAMA wanyu: Hoona ha muraabaga, mukwatege ekiragiro kinu ebiro byanyu byoona.

¹⁵“Kandi mutandike kubara okuruga ha kiro ekirukukurata Sabbato, okuruga ha kiro eki mwaleetiireho ekiba ky'ekihongwa eky'okwimukyaimukya; zihike wiiki musanju,

¹⁶mubale ebiro makumi ataano okuhika ha kiro ekirukukurata Sabbato; eya musanju, muleetere MUKAMA ekihongwa eky'ebyokulya.

¹⁷Buli ka ereete emigaati ebiri ey'okwimukyaimukya, enyakucumbirwe omu nsaano enyakuniinuukire, erukuhikya kiloguraamu ibiri; emigaati egi, etumbisibwe; ebe muganuro gwa MUKAMA.

¹⁸Emigaati egi, ogihonge n'ebyaana by'entaama musanju eby'omwaka gumu kandi ebitanyina kamogo, enimi ento emu, n'empaya ibiri ez'entaama; ebi byona bibe kihongwa kya MUKAMA, bihongerwe hamu n'ekihongwa eky'ebyokulya, n'ebihongwa byabo eby'ekyokunywa, obyokye harugemu ekisorrokoko ekirungi ekirukusemeza MUKAMA.

¹⁹Ohonge empaya ey'emburabuzi, kibe kihongwa eky'okuganyiza ebibi, ebihaya bibiri eby'entaama eby'omwaka gumu bibe kyonzira habw'okusaba obusinge.

²⁰Ebi byona, nyakatagara abiimukyaimukize hamu n'emigaati ey'omuganuro, bibe kihongwa eky'okwimukiza MUKAMA; bintu birukwera bya MUKAMA kandi mugabo gwa nyakatagara.

²¹Ha kiro eki kyonka, ogambire abantu basorrokane baramye; mutalikora mulimo gw'amaani; eki kiragiro kyanyu na baijukuru baanyu eky'ebiro byona, ha murakabaga hoona.

²²“Obu muraabaga nimugesa ebyokulya byanyu, muleke kuhikira kimu ha nsaro, rundi kugesera kimu mukamaramu; ebinyakusigaire omu misiri, mubirekere abanaku n'abanyamahanga; ninyowe MUKAMA.”

²³MUKAMA yagambira Musa ati:

²⁴“Gambira abantu ba Isirairi oti: Ekiro kibanza eky'okwezi kwa musanju, mukitemuga ekitiinisa, kibe kiro ky'okuhuumura, muraakiijukibwaga iraka ly'engwara, ey'erukubeeta kuramya.

²⁵Mutalikora mulimo gw'amaani; muleetere MUKAMA ekihongwa eky'okwokya.”

²⁶MUKAMA yagambira Musa ati:

²⁷“Ekiro ekya ikumi eky'okwezi kunu okwa musanju, nikyo kiro eky'okwereherra, ni mwebonabonesa, muleetere MUKAMA ekihongwa eky'okwokya,

²⁸Mutalikisura mukakora omulimo na gumu ha kiro eki, habwokuba kiro ky'okwereherra, hali MUKAMA Ruhanga wanyu.

²⁹“Omuntu weena owatalyebonabonesa ha kiro eki kyonyini ndimusenda mwihe omu bantu b'owaabu.

³⁰Omuntu wena alikora omulimo ha kiro eki kyonyini, ogu ndimuhwerekereza mwihe omu bantu b'owaabu.

³¹Mutalikora omulimo na gumu, eki kiragiro kyanyu eky'ebiro byona, hoona ha murakabaga.

³²Eraabaga Sabbato y'okuhuumura kandi mwebonaboneseege; ha kiro kya mwenda eky'okwezi, okurugirra omu kairirizi, Sabbato yanyu etandikege omu kairirizi ak'ekiro kimu egarukire ha kairirizi ak'ekiro ekindi.”

³³MUKAMA yagambira Musa ati:

³⁴“Gambira abantu ba Isirairi ngu: ha kiro kya ikumi na bitaano eky'okwezi kunu, okwa musanju, kiraabaga kiro ky'obugenyi bwa MUKAMA obw'ensiisira, obugenyi obu, buraamaraga ebiro musanju.

³⁵Ha kiro eky'okubanza, mwesoroozeege kuramya; mutalikora mulimo gwona ogw'amaani.

³⁶Ebiro musanju, mubimalege nimuhongera MUKAMA, ebihongwa eby'okwokya; ha kiro ekya munaana, mwesoroozeege muramye, muhongere MUKAMA ekihongwa eky'okwokya, mwesorooze muramye; mutalikora mulimo gw'amaani.

³⁷“Obu nubwo bugenyi bwa MUKAMA obwaragiirwe, obu muraarangira abantu nkooku buli nubwo busumi obw'okwesorooza kuramya, nuko kasumi ak'okuheeraho MUKAMA ebihongwa eby'okwokya, n'ebihongwa eby'ebyokulya ebyonzira n'ebihongwa eby'okunywa, buli kimu nikiheebwayo ha kiro kyakyo ekinyakuhikire.

³⁸Hali ebi, oyongereho Sabbato za MUKAMA, ebisembo byawe, ebihongwa eby'okuhikiriza ebi waraganiize n'ebisembo eby'okwegondeza ebi oha MUKAMA.

³⁹“Ha kiro ekya ikumi na bitaano eky'okwezi kwa musanju, obu muraabaga mumazire kuhunika ebi mwereze, muteekege obugenyi bwa MUKAMA okumara ebiro musanju; ekiro eky'okubanza n'ekiro kya munaana; biraabaga by'okuhuumura.

⁴⁰Ha kiro eky'okubanza, mukwate ebijuma eby'emiti emirungi, amataagi g'enkindo, ag'emiti enyakujumbire n'emikinga eya ha myegeego ey'ebisaaru; musemererwe, muguruke omumaiso ga MUKAMA Ruhanga wanyu okumara ebiro musanju.

⁴¹Obugenyi bwa MUKAMA obu, mubuteekege buli mwaka okumara ebiro musanju, eki kiragiro kyanyu eky'ebiro byona; mubuteekege omu kwezi kwa musanju.

⁴²Muraalege omu nsiisira okumara ebiro musanju; abantu boona enzaarwa za Isirairi;

⁴³abaijukuru baanyu nukwo bamanye nkooku naraize abantu ba Isirairi omu nsiisira, obu nkaba nimbaiha Omunsi Misiri. Ninyowe MUKAMA Ruhanga wanyu.”

⁴⁴Musa nukwo yaragiire ati abantu ba Isirairi, obugenyi bwa MUKAMA obwatairweho.