Read Runyoro - rutooro Lev 24 Bible Online

Lev 24 - Runyoro - rutooro bible

Lev 24

¹MUKAMA akagambira Musa ati:

²“Ragira abantu ba Isirairi bakuleetere amagita amarungi agahonzirwe omu muti oliva, ag'okuta omu taara, nukwo etaara egi ikale neeyaka hatali kuraara.

³Omu Heema egi ey'okutangatanganiramu, aheeru y'enyigamo ey'Esanduuko ey'Endagaano, Arooni nuho araagirolererraga kurungi omumaiso ga MUKAMA, okuruga omu kairirizi okuhika omu rukyakya; eki kiragiro kyanyu n'abaijukuru baanyu ebiro byona.

⁴Etaara ezi obutoosa baraazirolerraaga kurungi ziri ba kikondo ekya zaabbu enungi ekinyakuli omumaiso ga MUKAMA.

⁵“Okwate kiloguraamu ikumi na ibiri ez'ensaano enyakuniinuukire kurungi, ogicumbemu keeki ikumi na ibiri.

⁶Ozite omu nkarra ibiri, buli rukarra habemu mukaaga, ozite ha meeza eya zaabbu enungi.

⁷Buli rukarra orumamirreho eseeta enungi, egende hamu n'omugaati, gube mugabo ogw'okwijukya abantu ebyokulya ebyokiibwe byahongerwa MUKAMA.

⁸Buli kiro kya Sabbato, Arooni aguteekanizeege kurungi omumaiso ga MUKAMA habw'Abaisirairi, gwijukyeege endagaano ey'ebiro byona.

⁹Omugaati ogu, gubege gwa Arooni n'abatabani, nubo baraagulyaaga, baguliirege Omukiikaro Ekirukwera, habwokuba omugaati ogu hali Arooni nugwo mugabo ogurukukirra kimu kwera, ogunyakwihwa ha bihongwa eby'okwokya, guraabaga mugabo gwe ogumusemeriire ogw'ebiro byona.”

¹⁰Hakabaho mutabani w'omukazi Omwisirairi, ou yazairweho omusaija Omunyamisiri, akaruga omunju ye, omu rukande, yakungana n'Omunyamisiri nyakabara;

¹¹mutabani w'omukazi Omwisirairi yagamba kubi kandi yakondereza ibara lya MUKAMA. Baamuleetera Musa. Ibara lya nyina mwojo ogu, nuwe Seeromisi muhara wa Dibiri ow'oruganda rwa Daani.

¹²Baamuta omu nkomo aikalemu okuhika MUKAMA obu alikabamanyisa eki arukwenda bamukole.

¹³MUKAMA yagambira Musa ati:

¹⁴“Iha omu rukande ayagambire kubi ibara lya MUKAMA; boona abaamuhuliire naaligamba kubi bamute emikono ha mutwe, ekitebe kyona eky'abantu bamuteere amabaale.

¹⁵Kandi gambira abantu ba Isirairi oti: Weena aligamba kubi ibara lya Ruhanga we, ajunaanwe habw'ekibi kye eki.

¹⁶Ogu aligamba kubi ibara lya MUKAMA, kimuhikiriire kwitwa. Ekitebe kyona eky'abantu kimuteere amabaale; noobu araaba ali munyaihanga rundi nzaarwa, obu alikagamba kubi ibara lya MUKAMA, aitwe.

¹⁷Omuntu wena anyakwita omuntu ondi, asemeriire afe.

¹⁸Wena anyakutema rundi anyakuteera ekisoro ky'omuntu ondi akakiita, amuleheremu ekindi, obwomeezi bulehwe obundi.

¹⁹Wena anyakugoora mutaahi we, na uwe agoorwe.

²⁰Obu araaba amucwire igufa, n'erye licwibwe, anyakwisire ondi eriiso n'erye liitwe, anyakwihire ondi eriino, n'erye liihwe nkooku agoire ondi na uwe nukwo agoorwe.

²¹Wena anyakutema rundi anyakuteera ekisoro akakiita, agarremu kindi; ogu anyakwita omuntu, na uwe aitwe.

²²Mube n'ekiragiro kimu ekirukulema omunyaihanga n'enzaarwa; habwokuba ninyowe MUKAMA Ruhanga wanyu.”

²³Nubwo Musa yagambira abantu ba Isirairi; baaturukya omu rukande omuntu ayakonderiize ibara lya MUKAMA, baamuteera amabaale. Abantu ba Isirairi nukwo baakozire bati MUKAMA eki yaragiire Musa.