Read Runyoro - rutooro Lev 25 Bible Online

Lev 25 - Runyoro - rutooro bible

Lev 25

¹MUKAMA akagambira Musa ha rusozi Sinai ati:

²“Gambira abantu ba Isirairi ngu: Obu mulihika omunsi ei ndukwija kubaha, itaka libe na Sabbato ya MUKAMA.

³Mulimara emyaka mukaaga nimulima emisiri, nimubyara engonjo, kandi emyaka egi mukaaga, muligimara nimwombera, nimusarra engonjo ez'emizaabbibbu, nimunoga ebijuma kandi nimuhunika ebi mwereze;

⁴baitu omwaka ogwa musanju, gubege Sabbato ya MUKAMA, itaka lyona lihuumule; omwaka ogu, mutaligubyarramu rundi kusarra engonjo zanyu.

⁵Ebiryemeza byonka mumazire kugesa, mutalibigesa, n'ebijuma by'emizaabbibbu etasaliirwe, mutalibinoga; guraabaga mwaka gw'itaka lyona kuhuumura.

⁶Sabbato ey'itaka niyo eraabahaga ebyokulya, inywe inywenka, abairu baanyu n'abazaana, abakozi baanyu abakorra empeera n'abanyamahanga abarukwikara na inywe;

⁷kandi eraahaga ebyokulya ente zanyu n'ebisoro byona ebinyakuli omunsi yanyu, byona itaka ebi liraamezaaga, mubiryege.

⁸“Mubalege Sabbato ey'emyaka musanju, nukwo kugamba emyaka musanju emirundi musanju, egi niyo myaka ana na mwenda.

⁹Ha kiro ekya ikumi eky'okwezi kwa musanju, ekiro eky'okwereherra, muteere engwara ihulirwe omunsi yanyu yoona.

¹⁰Musemezeege omwaka ogw'amakumi ataano, murangirre abantu boona nkooku guli mwaka gw'obusinge; guraabaaga mwaka gwanyu ogw'okujaguza. Buli omu omuli inywe, nubwo araasoboraga kugaruka omunsi ei yaihirwemu rundi omu ruganda rwe.

¹¹Omwaka ogw'amakumi ataano ogu, guraabaga gw'okujaguza kwanyu, mutaligubyarramu, noobukwakuba kugesa ebinyakwemereze byonka rundi kunoga ebijuma by'emizaabbibbu etasaliirwe.

¹²Habwokuba guraabaga mwaka ogurukwera, mulyege ebi gumereze omu misiri.

¹³“Omu mwaka ogu, buli muntu agarukege owaabu.

¹⁴Kuba oguza rundi oguraho mutaahi wawe ekibanja, muleke kugobezangana.

¹⁵Omusasule noororra ha myaka eyakahinguraho ekijaguzo kimazire kuhwa, na uwe akuguzeege naarorra ha birimwa ebya buli mwaka.

¹⁶Emyaka obu eraaba eri nyingi, oyongere omuhendo gw'ensimbi, obu eraaba eri nke, ogukeehye, habwokuba eki arukukuguza nibyo ebirimwa ebya buli mwaka.

¹⁷Muleke kugobezangana, kyonka mutiine nyowe Ruhanga wanyu; habwokuba ninyowe MUKAMA Ruhanga wanyu.

¹⁸Habweki, mukwatege ebiragiro byange, mukuraatire n'ebigambo kandi mukole ebibirukuragira; nubwo muliikara omunsi n'obusinge.

¹⁹Ensi eribeereza ebyokulya, mulirya mwigute nukwo mugiikalemu n'obusinge.

²⁰Kakuba mwekaguza muti: ‘Obu turaaba tutarukusiga kandi tutarukugesa, tulirya ki omu mwaka ogwa musanju?’

²¹Ndibaha omugisa omu mwaka ogwa mukaaga, gubeereze ebyokulya ebi mulirya okumara emyaka esatu.

²²Obu muliba nimusiga omu mwaka ogwa munaana, muraalyaga ebyokulya eby'emyaka ey'enyuma; okuhika omu mwaka ogwa mwenda, ebyalimirwe omu mwaka ogu, obu birigeswa.

²³Itaka muleke kuliguliza kimu, habwokuba lyange; inywe muli banyamahanga kandi nsuuhuuki abanyebingire.

²⁴Habweki, omunsi egi yoona ei mwatungire, mwikirizeege itaka licungurwe.

²⁵“Kakuba owanyoko aseega akaguza itaka lye mugenzi we arukumukurata, itaka eri alicungule.

²⁶Ogu kitunda, obu araaba ataina muntu ondi arukusobora kucungura itaka eri, uwe wenka ali munaku, hanyuma akatunga eby'okulicungura,

²⁷abale emyaka eyakahinguraho, okuruga obu yaligulize, nukwo asasule kigura emyaka ey'omumaiso; itaka lye alyegarurre.

²⁸Baitu kakuba alemwa kulicungura, atalyegarurra, alireke, liikale liri ly'oli ayaliguzire, okuhika omwaka gw'okujaguza obu gulikahika; omu mwaka ogu, ayaliguzire aliba atakyaliinaho busobozi, nubwo mukama walyo alyegarurre.

²⁹Kakuba omuntu atunda enju erukuraarwamu, enyakuli omu rubuga orunyakuzitiirwe, asobora kugicungura omwaka gumu gutakahoireho okuruga ha mwaka ogu yagitundiireho; omu mwaka ogu gwona, naaba anyina obugabe obw'okugicungura.

³⁰Kakuba etacungurwa omu mwaka ogu gwona, obu enju egi ebiro byona erigumibwa nkooku eri y'ogu kigigura; terimwihwaho omu mwaka gw'okujaguza.

³¹Baitu amaju aganyakuli omu byaro ebitazitiirwe, garaabarwaga nk'agombekerwe omu bwerre, gasobora kucungurwa kandi gasobora kugarulirwa bakama baago omu mwaka ogw'okujaguza.

³²Baitu Abaleevi omu mwaka ogw'okujaguza, nibasobora kucungura amaju aganyakuli omu mbuga zaabu ezi barukulema.

³³Baitu Omuleevi kakuba atacungura enju ye omu rubuga nk'oru, nubwo enju eyaguzirwe eyekaba eri omu rubuga rwabo neesobora kugarulirwa Omuleevi mukama wayo omu mwaka gw'okujaguza; habwokuba amaju goona agaraabaga omu mbuga ezinyakuli omwitaka Abaleevi eri baahairwe omu Isirairi, garaabaga gaabu.

³⁴Baitu itaka kwonka ery'embuga zaabu litagurwe; habwokuba butaka bwabo obw'ebiro byona.

³⁵“Kakuba omuntu wawe afooka munaku atakyayesobora, osemeriire omukonyere, aikale na iwe nkooku wakwikaire n'omu nyaihanga rundi ensuuhuuki.

³⁶Otalimusaba amagoba habwa sente ezi oturukize habwe rundi kwesasuza omu mulingo ogundi gwona, kyonka iwe tiina Ruhanga wawe, nukwo mutaahi wawe aikale na iwe.

³⁷Otalimwohoza sente nukwo akuhe amagoba noobwakuba kumuliisa nukwo omutungeho amagoba.

³⁸Ninyowe MUKAMA Ruhanga wanyu ayabaihire omunsi Misiri, mbahe ensi Kanaani, mbe Ruhanga wanyu.

³⁹“Kakuba mugenzi wawe anyakukuheriire afooka munaku akeehayo kuba mwiru wawe, otalimukoza emirimo ey'obwiru;

⁴⁰aikale na iwe nk'omupagasa kandi nk'ensuuhuuki. Aikale naakukorra okuhika ha mwaka ogw'okujaguza;

⁴¹Okujaguza obu kulihwa, nubwo akurugeho, uwe n'abaana be, agaruke omuruganda rwe, omu butaka obwa baisenkuru.

⁴²Habwokuba bairu bange aba naihire Misiri, tibasemeriire kutundwa nk'abairu kwonka.

⁴³Mutalibalema kubi, kyonka mutiinege nyowe Ruhanga wanyu.

⁴⁴Abairu n'abazaana aba murukugonza kutunga, abo musobora kubagura omu mahanga agabaheriire.

⁴⁵Kandi musobora kubagura hali abanyamahanga abarukwikara na inywe na ha baana baabo abaazaalirwe omunsi yanyu, babe bitungwa byanyu.

⁴⁶Musobora kubagwetera batabani baanyu babe bantu baabu ab'ebiro byona; musobora kubafoora bairu, baitu bagenzi baanyu abantu ba Isirairi, mutalikisura mukalemangana kubi.

⁴⁷“Kakuba omunyaihanga rundi omusuuhuuki aguudahara, mugenzi wanyu anyakumuheeriire akafooka munaku, akeehayo kuba mwiru w'omunyaihanga rundi w'omusuuhuuki ogu, rundi kuba mwiru w'omuntu ow'oruganda rw'omunyaihanga ogu.

⁴⁸Obu araabaga aguzirwe naasobora kucungurwa; mugenzi we wenka naasobora kumucungura.

⁴⁹Isento rundi mutabani wa isento, rundi omuntu ow'oruganda orwa haihi, rundi uwe wenka kakuba aguudahara, naasobora kwecungura.

⁵⁰Abarrane na kimugura, nibaihirra ha mwaka ogu yamuguliiremu okuhika ha mwaka gw'okujaguza. Omuhendo gwa sente ezi araasasuraga nukwo alekerwe, gusigikirege ha myaka; akasumi aka amazire na mukama we, karaabarwaga nk'ak'omukozi ow'empeera.

⁵¹Obu haraaba hakyasigaire emyaka nyingi okuhika ha mwaka gw'okujaguza, kwija kwecungura asasulege naasigikira ha muhendo gwa sente ezi yayeheeriireyo kuba mwiru.

⁵²Obu haraaba hakyasigaire emyaka nke okuhika ha mwaka gw'okujaguza, abalirrege na mukama we, naasigikira ha myaka ei asigaize kukora okuhika ha kujaguza, sente ez'emyaka egi nizo asasulege kwecungura.

⁵³Aikale na iwe nk'omupagasa owa buli mwaka, atalikorwa kubi.

⁵⁴Kakuba atacungurwa omu miringo egi, uwe n'abaana be balekerwe ha mwaka gw'okujaguza.

⁵⁵Hali nyowe abantu ba Isirairi bairu bange, aba naihire omunsi Misiri, ninyowe MUKAMA Ruhanga wanyu.